alexametrics
أفكار

بدم بارد ، شوية دروشة

مدّة القراءة : 1 دقيقة
بدم بارد ، شوية دروشة

- المفروض أنو حركة النهضة حركة إسلامية تسعى لإقامة حكم الشرع كيما قال الله وقال الرسول

- المفروض زادة أنو حزب التحرير حزب إسلامي يسعى لإقامة حكم الشرع كيما قال الله وقال الرسول

- المفروض كذلك أنو الحركات السلفية تسعى لإقامة حكم الشرع كيما قال الله وقال الرسول

وعليه كي نعجنوا هالحركات الكل مع بعضها يولي عنا فائض من التدين والتقوى وكم هائل من الأفراد والمجموعات إللي تحب تحكم بشرع ربي . 

وعلى هذا الأساس ينجم يكون التونسي مطمان بحكم أنو عندو قبة حديدية من الإيمان تنجم تحفظوا من غضب ربي سبحانو  وتنجم زادة تكون له حضوة كبيرة عند ربي بحكم انو عندو خلطة كبيرة من الطهر والنقاء والعبادة والتقوى متاع هالحركات الاسلامية مجتمعة باش يكون دعاهم مستجاب وباش ربي يهبط عليهم السماء مدرارا ويجعل لهم جنات ويجعل لهم أنهارا

وبمناسبة رمضان،  التقوى متاع هالحركات الإسلامية إللي النهار الكل وهي تدافع بقلب برب على ربي سبحانو والنهار وطولو هي تجاهد باش توصل للسلطة وتطبق الشرع متاعو من المفروض أنو هالتقوى هاذي في رمضان تولي كيما الطاقة النووية بفعل الصوم والتراويح والصدقات وكرادن الإعانات الغذائية وموائد الإفطار الجماعية.

و واحد مالناس نتصور إللي الأولوية في إستعمال هالطاقة النووية الإيمانية إللي تنتج إشعاعات خاصة في شهر الصيام هي إستعمال هالطاقة في مواجهة الكورنا خاطر بقية الناس إللي إيمانهم ناقص وشطرهم كفار وربما كفار كاملين ما يلزمش الواحد يعمل عليهم باش ربي يستجيب لدعائهم خاطر إيمانهم ضعيف.

التوانسة يلزم يعملوا على الصحاح إللي ضيعوا عمارهم في الجهاد في سبيل الحكم وتطبيق الشريعة وإحياء الخلافة والرجوع لربي.

هذا علاش أنا عندي ثقة كبيرة إللي مدام عنا النهضة والسلفية وحزب التحرير والمولود الجديد إئتلاف الكرامة زيد عليهم الجماعة متاع جند الخلافة والقاعدة في المغرب العربي وكتيبة عقبة بن نافع وجبهة النصرة إللي شادين الثغور ومرابطين في جبل سمامة والشعانبي ياكل فيهم البرد والشر والشمنطري في سبيل الحكم بما يرضي الله، قلت مادام عنا هاذومة القراب لربي وإللي كيما قلت يشكلو القبة الحديدية الإيمانية ما نخافوش على تونس ولا نخافوا لا مالكورنا ولا مالكورينا ولا مالكورونا

ولا نخافوا لا مالبطالة ولا مالمخدرات ولا مالإجرام ولا مالديون ولا نخافوا على شهرياتنا ولا نخافوا على قراية ولادنا ولا نخافوا من غلاء الأسعار ولا نخافوا لا مالجوع لا مالعطش ولا نخافوا لا من فرنسا ولا من روسيا وامريكا ولا نخافوا لا مالموت لا من الحياة ولا نخافوا عنا أسرة إنعاش وإلا لا،  خاطر الأعمار بيد الله واللي مكتوب عالجبين لازم تشوفو العين، وعلى خاطر وين تتلفت تلقى كان المدب وخوه، كان المجاهد وخوه وعلى كل لون يا كريمة.

رمضانكم مبروك

ومبروك عليكم الدروشة والقبة الحديدية متاع الإيمان والتقوى

تعليقك

(x) المدخلات المطلوبة

شروط الإستعمال

Les commentaires sont envoyés par les lecteurs de Business News et ne reflètent pas l'opinion de la rédaction. La publication des commentaires se fait 7j/7 entre 8h et 22h. Les commentaires postés après 22h sont publiés le lendemain.

Aucun commentaire jugé contraire aux lois tunisiennes ou contraire aux règles de modération de Business News ne sera publié.

Business News se réserve le droit de retirer tout commentaire après publication, sans aviser le rédacteur dudit commentaire

Commentaires

Commenter