صاحب صنعتك عدوك

حكينا الجمعة الي فاتت على نوايا التصويت و ما دارتش الجمعة إلا و بدات الناس الكل ( نقصد بالناس السياسيين ، خاطر بقية الشعب ملطخ في البحورات)  تصوّت في بعضها. تنقّح القانون الإنتخابي و تمّ إقصاء زوز من المترشحين و فيهم شكون ما رشحش روحو الي في الصدارة . إي أكهو عاد و إنطلقت صفارات الإنذار و نواقيس الخطر و أرسلت البيانات المنددة لبرلمانيين فرنسيين و وابل من التصريحات الإعلامية و فجأة تحولت تونس الديمقراطية الناشئة إلى تونس الدكتاتورية ، تونس الإقصاء . هاجت و ماجت .   جماعة تؤيد هذا القانون و ماذابية نحدد إنو موش كلهم من جماعة تحيا تونس و جماعة ضد التنقيح و موش كلهم تابعين لا القروي و لا التراس. ناس تقول كيفاش و علاش توة ؟ و ناس تقول لازم توة قبل الإنتخابات !

الأكيد إلي مجلس نواب الشعب أثبتلنا عكس ما يروج و حتى ما روجتو عليه الحكومة إنو سريع و خفيف و رشيق . فيسع فيسع ينظر في القوانين . فيسع ينقحها و في سرعة البرق يصوت عليها و أثبتولنا نوابنا إنهم قادرين يحضروا بكثافة و ينضبطوا وقتلي الحكاية متعلقة بإقصاء منافسيهم و الحفاظ على مكاسبهم. على ذكر المكاسب، حبيت نوجه تحية من منبري هذا للنيابة العمومية و هيئة مكافحة الفساد و نسألهم على أحوالهم و سمعوشي بالزهر و لا بالصدفة تصريحات بشرى بلحاج حميدة كيف فضحت مظاهر الثراء الفاحش داخل قبة المجلس و شكاير الفلوس و العملة الصعبة ؟؟؟ مصاب نبداو قبل التصويت و التنقيح على قوانين جديدة نطبقوا إلي عندنا راهي تونس جنة و فيها بريكاجي.

الأكيد إنو نحنا المواطنين ما ستنيناش هالأيامات بش نبهوا و نقولوا و نعيطوا راهو ثمة مال فاسد يدور في الإنتخبات و إنت و الجهة و إنت و البلاصة الصوت يتشرى و يتباع بين 20 و 50 دينار. حكينا في السابق الي الجمعيات الخيرية و الطهورات و العروسات الجماعية راهم ماهمش لله في سبيل الله و إنما لخدمة الإنتخابات. حكينا و قلنا إنو الإعلام و بعض القنوات التونسية والأجنبية و الجوامع في مقدمة الأحزاب و لم يتحرك ساكنا للي إقترح القانون و عدّلوا و صوّت عليه. اليوم كيف تبدلت المشامية و الشعب عطاهم إنذار قوي إنو اليوم مستعد يصوت للكائنات الفضائية و هوما لا غاروا .

وو فكروني بالمثل الشعبي صاحب صنعتك عدوك !

أما إستوقفني من جملة النتقيحات الي صادق عليها مجلس نهّاب الشعب " الخطاب الذي لا يحترم النظام الديمقراطي  و الي يدعو للعنف و التمييز و التباغض بين المواطنين" تباغض ؟؟؟؟ وين سمعتها وين سمعتها ؟؟؟ آه تفكرّت " موتوا بغيضكم " تتفكروها يا توانسة يلي قهروكم يا توانسة يلي مرضوكم يا توانسة يلي هججوكم  !!!!! 

حزب النهضة الي اليوم صوت على هالقانون و فرحانين في آخر الجلسة يعنقوا في بعضهم نساو كيف الصحبي عتيڨ في شارع الحبيب بورڨيبة دعا إلى سحل المواطنين و كان الأمر كذلك و مات لطفي نڨض مسحول . و إن لم تستح فأعل ما شئت . و مهما الناس هاذم عملوا و مازالوا بش يعملوا الأكيد إنو الناس قررت إنها ماعادش بش تصوتلهم و ماعادش بش تعطيهم فرصة إنهم يكذبوا و يعملوا الي عملوه في تونس في السنوات الأخيرة .

هالنواب و الأحزاب التعسية الي وقفت جلسة ساعتين بش تترحم على المجرم الإخواني محمد مرسي ، إذا تواصل على المعدّل المرة الجاية بش يقروا الفاتحة على روح الشعب التونسي . الجدل الواسع و النقاشات و الاتهامات الي تخلقت بعد المصادقة على هالقانون أكدتلي حاجتين : إنو السياسيين الحاليين  ماعدا كعبتين و كعبة لا عاد لا يصلحوا لا للسوق لا للصندوق و إنو الي جايين بعدهم يبعدوا عليهم بالصبرو إنو عام 2019 بش يكون عام زمّة  ، أصعب مالسنوات الي فاتوا و الله المستعان.