alexametrics
آراء

مسكينة تونس

مسكينة تونس

 

 

يعيشوا التوانسة هالأيامات على وقع نتائج سبر الأراء المتعلقة بنوايا التصويت. حدث جلل يصيب عقل العاقل بشلل.

أسامي ناس ما عندها حتى علاقة بالشأن السياسي تتصدر نوايا التصويت. أحزاب غير موجودة أصلا و لم تخلق بعد و متصدرة نوايا التصويت. حالة من الذهول تصيب كل قارئ للكعكة الملوّنة و عبد يسأل روحو ياخي أنا عايش فرد بلاد مع الناس الي إتصلوا بيهم ؟ في  الواقع ، إيه فرد بلاد و فرد همّ ! و عندنا مدة نقولوا راهو المشهد السياسي الي تحوّل لكراكوز بأتم معنى الكلمة ما ينجم كان يوصلنا للحالة المزرية الي وصلنالها اليوم.

حسب نوايا التصويت نبيل القروي رئيس لتونس و حزبو الي ماهوش موجود أصلا و يمكن يتوجد بما إنو أصبح مطلب شعبي يتصدر نوايا التصويت. الله يرحم خليل الي موتو اليوم رجع بالنفع التام على بوه. بوه ولد بوه الحنين . بوه الي ساهم في التطبيل بما أوتي من جهد لبن علي في آخر أياماتو. نبيل القروي إلي التوانسة الكل فاقوا على صوتو يحكي بجوارحو و بلغة بعيدة كل البعد عن أناقتو ورشافتو الي مستانسين بيهم في حربو ضد ما تيسر من الندائيين و من مكونات المجتمع المدني. نبيل القروي إلي كيفما قال المكي هلال كارن انعملوا  في جرتو قانون لحماية المستضعفين و الفقراء مالإستغلال السياسي الي يتمارس عليهم : مشاهد مقرفة لناس هازة كراضن و زوز فرارش و يقيدوا في أساميهم على ليستات غدوة يصلحوا للإنتخابات.

ظهور نبيل القروي في نوايا التصويت بهالثقل و الحجم فكرني في الهاشمي الحامدي و عريضتو الشعبية هاك العام. نهار وأنا في قلب العاصمة نسمع في توانسة يحكيو على رئيس الزواولة الي بش يبدّل القصر متاعو في حي التضامن و لي بش يضمن نقل و صحة بلّوشي للشعب العظيم و ماكم تعرفوا شعبنا ما يحبش حتى طرف عالرزق الي ماتت إمّاليه و صار الي صار و ريتو و تتفكروا وكان نسيتوا أرجعوا ليوتيوب لعل تتفكروا المردود العظيم لكتلتو في المجلس التأسيسي.

الأدهى و الأمرّ هو اليوم موجة الإستياء و الغضب الي  إنهالوا في تعاليق بعض الوجوه العامة حول هذا الموضوع . نفس الوجوه العامة الي مدة لتالي بدات كالعادة تجبدلنا في فزاعة الحرية في خطر و الإعلام في خطر وقتلي الهايكا خذات القرار بغلق قناة نسمة. وقتها كانوا يقولوا شبيهم مابداوش بالزيتونة ؟ و نسمة قناة تعدي في الزوالي : إيه تفضلوا مالة هاو النتيجة الحتمية لشخص الأنا الأعلى متاعو متظخم،عامل جمعية خيرية و يصور و يعدي في تلفزتو في إنجازاتو العظيمة . و حالل تلفزتو و بلاتواها السياسية لسب و شتم كل السياسيين إلا المرتزقة منهم إلي يطمحوا يخدموا تحت سيدهم نبيل القروي.

هذا نبيل و مازلنا مصدومين بالمكان الأول و نتصدموا بالثاني قيس سعيد شهر Robocop. أكثر مرات سمعت فيهم قيس سعيد وقتلي كان دمية في القلابس كان يظهرلي مفهوم أكثر، يجبد النفس أكثر و بالتالي تنجم تبعوا. قيس سعيد أستاذ القانون الدستوري الي قال على الدستور التونسي الحالي لا! و على نظام الحكم الحالي لا! و على المساواة التامة لا! و على المساواة في الميراث لا ! و على التحالف مع الأحزاب لا! براف تقول حمة الهمامي مكستم و يحكي بالعربية القحّة. أستاذ قانون دستوري مواقفو رجعية محافظة الأرجح إنو ينجم يتفتف مالمخزون الإنتخابي للنهضة و الأكيد إنو إذا ثمة تحالف ممكن, ما يكون كان مع خواتو الإخوان ! ديمة الناس يشغلها المناصب الثلاثة الأولى : شكون الثالث ؟؟؟ الثالثة عبير موسي . المفاجعة المنتظرة و المرتقبة بمأ إنو في 2011 كانوا 42% مالتوانسة يعتبروا الوضع أفضل وقت بن علي، في 2018 ولاّو 82%. يعني بإختصار عبير موسي تفكرّهم بذاك الزمن الجميل حيث كان الشعب ينعم بالخيرات و ماثماش بطالة و الصحة و التعليم مجانيين و السجون خالية تماما و الإعلام حرّ  و الفنانين  ينعموا بحرية الإبداع و الأمن جمهوري و يحترم حقوق الإنسان : التونسي يحب قفّتو معبية و ياكل لين يشبع في سلام و أمن مهما كان الثمن بما في ذلك العصا و الزلاط!

نتائج سبر الأراء الحقيقة مفزعة و تعكس تصحّر فكري و ثقافي في صفوف هالشعب لا حدود لهما.  أي كائن يبداش فضائي بشوية فلوس و شوية علوم إتصال قادر إنو يقنع الشعب بش يصوتلو ، أي كائن يغازل التونسي في وهمو و في هاجس القرآن و الأسرة و قيمها المحافظة كيف كيف. و شعبنا السمح الي يقرى 6 دقايق في العالم، الي لا يعرف لا مسرح لا سينما، الي برامجو التعليمية ماتراجعتش مالتسعينات ، الي تلفزتو يرتعوا فيها سقط المتاع الحقيقة شنوة نجموا نستناو منو ؟؟؟ لا شيء غير : نبيل القروي رئيس تونس و سعيد رئيس حكومة و موسي رئيسة مجلس نواب الشعب . نضحكوا بيها توة أمّا ولاّت أقرب للواقع ملي نتصوروا .

اليوم الهاوية و القاع و الحيط و عنق الزجاجة و أي مرادف للمصايب نحنا فيه . سنوات من الارتجال السياسي، سنوات من التكمبين و التمكميك، سنوات من العرك و التلاطيخ على المناصب ، سنوات من التوافق و التنافق وصلونا لهوني.. وصلواتونسي مستعد يعطي صوتو لأي كائن المهم ماكانش في الحكم قبل و ماراوهش في منصب قبل ... سنوات من العذاب بش تخلّف حرائق و رماد ....

فهنيئا لحافظ قايد السبسي أولا و بوه الباجي بلي عملوه في نداء تونس . و هنيئا لحمة و جيلاني الهمامي و حزب العمال بلي عملوه في الجبهة الشعبية. وهنيئا لكل الديمقراطيين الحداثيين بحاناتهم الي تعودوا يحبكوا فيها صفقات سياسية تطلع عليها الشمس تموت كيف مصاصي الدماء و هنيئا للسعد اليعقوبي و أمثالو بالإضرابات اللامتناهية الي كان الشعب رهينتها ، هنيئا لمجتمع مدني حدّد سقف طلباتو و معاركو بعيدا كل البعد عن واقع مجتمعي و سياسي لا عالقة لهم به، و هنيئا لنا جميعا بهذا الفشل الذريع . مسكينة تونس.

 

تعليقك

(x) المدخلات المطلوبة

شروط الإستعمال

Les commentaires sont envoyés par les lecteurs de Business News et ne reflètent pas l'opinion de la rédaction. La publication des commentaires se fait 7j/7 entre 8h et 22h. Les commentaires postés après 22h sont publiés le lendemain.

Aucun commentaire jugé contraire aux lois tunisiennes ou contraire aux règles de modération de Business News ne sera publié.

Business News se réserve le droit de retirer tout commentaire après publication, sans aviser le rédacteur dudit commentaire

Commentaires

Commenter

النشرة الإخبارية