alexametrics
آراء

نحنا في حاجة إلى معركة جلاء جديدة

نحنا في حاجة إلى معركة جلاء جديدة

 

من أين أدخل المدينة ؟ من أين أدخل الكرونيك ؟ كل جمعة نقول لازم نحاول نهرب على السائد و على الجوّ العامّ و نستغلّ هالفضاء لبثّ بعض الموجات الايجابية لعلّها تجيب الابتسامات العرضية على وجوه مكشبرة في هالبلاد مالصباح للطياح ... لكن هيهات !! الواقع ولّى غالبنا  ويلاحق فينا حتى في أغرق مافينا و ولّينا نحلموا في الليل بأخبار النهار.

الجمعة الي فاتت حكيتلكم على المحبّة ... بالأخصّ على أولّها محبة البلاد ... و من الجمعة الي فاتت لليوم ... صار الي صار وقعدت نلوّج للمحبة في ثنية  أما  محبتنا لتونس  ماشية و تضعف كيف دولتنا وكيف تعليمنا وكيف إقتصادنا و كيف أملنا في بلاد أحسن !

 

تونس قامت على فاجعة في الويكاند خبر وفاة 12 رضيع في مستشفى الرابطة . 12 صغير ماتوا جرّاء تعفن و كيف ماتوا مدّوا جثثهم لوالديهم في كراظن بعد ماطالبوهم بدفع معاليم المستشفى.  انتهى الخبر. حالة صدمة في الشعب التونسي. حالة إحتقان في صفوف المرضى. حالة من الرعب في صفوف الطبة و الممرضين و وزراتهم. إستقالة وزير الصحة الدكتور عبد الرؤوف الشريف. وزيرة بالنيابة هي وزيرة الشباب والرياضة سنية بالشيخ. ندوة صحفية. الشاهد قالك ماعادش نحب على الكراظن و عندكم شهر في يديكم. نواب يبثوا في الإشاعات و الأخبار الزائفة.  مجلس أمن قومي تحوّل لحلبة صراع بين رئاستين في قطيعة تامة .زيارة فجئية لرئيس الحكومة لإجتماع مديري المستشفيات و المديرين العامين لوزارة الصحة و كالعادة سمعنا  " لا بدّ !!!"  ناس تغلي و طبّة و عاملين :    #BalanceTonHopital في قطاع الصحة قرّروا إنهم يفضحوا واقع و وضع يأكدلّنا إنّو البلاد التالي و ليس القدّام

تصاور زبلة تحت شبابك المرضى، ذبان يدور في قاعة عمليات ، طبة يعملوا في عمليات على ضوّ تليفون ، 30 مولود راقدين فرد فرش بدون حتى مراقبة ، مريض عايلتو تنقل فيه من قسم لقسم في أرض معبية بالزبلة : صور خراب و دمار شامل ... لوكان ما جيتش نعرف الي هوما في تونس و شهادات طبة راني قلت صور صبيطارات  سوريا و العراق في طنبك الحرب. مشهد مرعب يكفي وحدو إنو يعبّر على تفكيك منظومة الصحة و الدولة التونسية أصلا.

 

ما يكفيش ، شوية ، مازال ، الشعب مازال يتنفّس زيدو : نقومو على فاجعة أخرى : معلّم في صفاقس يغتصب أكثر من 20 تلميذ خارج المدرسة . كان السيّد في ساعات الدروس الخصوصية يستغل تلامذتو.  علمنا إنو خرج مالتعليم   خاطرو إعتدى على طفل  و رجع بعد الثورة المباركة . الحادثة هاذي سمعنا بيها توة تقريبا ميات المرات يمكن موش بهالحجم لكن سمعنا بيها و قدّ مالناس عيطت و نبهت على الدروس الخصوصية و باقي شيء : لا حياة لمن تنادي . مدارس و إعدادايات و معاهد جراء إضرابات دامت شهور و دهور ولات فارغة و ڨراجات بعض المعلمين و الاساتذة تحولت لقاعات درس يستغلوا فيها الوالدين في فلوسهم و ينجم زادة و يستغلوا فيها التلامذة في حاجات أخرى .

 

إذا الدولة التونسية تقوم على 3 ركائز حسب شعارها : الأمن و الصحة و التعليم فإنو حسب الفجايع و المصايب الي نراو فيها كل يوم الدولة التونسية أصبحت رسميا دولة معاقة . يرحمو الجنرال عمار  كيف قال "تونس عندها ولية صالحين" ، اليوم ماعادش كشعب ومتابعين للوضع فاهمين باش و كيفاش تونس مازالت واقفة ومابركناش فرد مرة ؟ شنوة الي قاعد يصير ؟ شكون المسؤول ؟؟

ثمة حادثة ثالثة تزامنت مع الزوز المصايب الي حكيت عليهم الفوق : هي إجتماع مجلس الأمن القومي . غادي يكمن الجواب . من غادي تتفسّر تقريبا كل المصايب الي نعانيو فيها و الي الى يوم الناس هذا رغم الكفاء ا ت و رغم التحاليل و رغم الحلول الي نسمعوا فيها ما تبدلّ شيء .

 

 الأولوية اليوم للناس الي شادة البلاد ماهياش البلاد هي الكراسي و السلطة . كيف نراو التشاحن بين رئيس الجمهورية و رئيس الحكومة الي كان الشعب ينجم ما يراهش بما إنو الفيديو هبطت بعد مونتاج على الصفحة الرسمية لرئاسة الجمهورية نفهموا علاش و كيفاش وصلنا لهوني. كيف نشوفوا  كيفاش النهضة تحارب في هيئة الدفاع بالقضاء كيف نشوفوا القضاء تحول لوسيلة ضغط بين الأطراف السياسية، بين بعض السياسيين الفاشلين و الإعلاميين نفهموا علاش وصلنا لهوني .

تصفية الحسابات عبر تكسير الأحزاب و في الإعلام و عبر الوزارات ( الي يجي يجيب جماعتو و يفسّخ الي عملوه الي سبقوا !) خرّبت الدولة و هرّات الشعب التونسي . هرّات الشعب الي يتفرّج مبهّم في  سياسيين و في ناس تحكم تخرج تتكلّم و هي ما عندهاش المعطيات الصحيحة ، و هي تزيّف في الحقائق و الأرقام ، و هي ماهياش قادرة في ندوة صحفية إنها بكل إيجاز تشخّص وضعية  و تعطي حلول أو حتى حل واحد فوري و إستعجالي لإنقاذ تونس .

فلذا شخصيا نظمّ صوتي للسيدة القاضية روضة العبيدي و أنا زادة أتهمّ.

أتهمّ إنو السياسيين بوه على خوه بيمنيهم بيسارهم باعوا تونس على خاطر كراسيهم و مصالحهم و كروشهم . ما ترى كشاكشهم هادرة و بزاقتهم تتناطر في وجوهنا خارجة مالتلافز و عياطهم ينقبلنا في وذنينا كان كيف يتعلق الأمر بشكون فكّ بلاصة شكون ، بش شكون أسّس الأوّل : محسوب شوف كالمعالم الي أسستوها : أسستوا أحزاب خرب يرتعوا فيها الفاسدين و المتملقين و الجواعة !

أتّهم المجتمع المدني التونسي  بنقاباتو بجمعياتو بشبكاتو الرسمية و غير الرسمية و بمموليه إنو باع الطرح كيف اليوم تحولت تحركاتو رهينة رصد التمويلات و في ظل أنشطة مكتوبة في إطار مشاريع ولات اليوم بعيدة كل البعد عن الواقع اليومي وحاجيات لمواطن و المواطنة التونسية !

أتهم الإعلاميين و أصحاب الراي إنهم غطسوا في الأحداث اليومية و تحوّلوا لصدى المحاكم و فضايح الشارع التونسي و نساو إنهم كسلطة رابعة من دورهم و من واجبهم اليوم توعية الشعب التونسي و نشر ثقافة بديلة عن ثقافة الركاكة و المساطة الي نراو فيها يوميا و إنو ما يكفيش إنك تفضح  و تشهّر إذا ماتطرحش بديل و توري للتونسي إنو ثمة إمكانيات و سبل أخرى

أتهم الشعب التونسي   إلّي إختار السكات و الفرجة من بعيد إنو خلّى البلاد ، بلادو ، لناس اليوم همها الوحيد ربح الانتخابات بش ينجموا يبدّلوا إسم نهج ابن عربي بنهج صربيا ، و بش يعطيو تراخيص لجمعيات و أطراف مشبوهة تنشط في تونس بش تغسل دماغ صغارنا و تردهم إرهابيين ، و بش يربحوا صفقات و مارشيات بالأكتاف و المعارف .

اليوم كيفما قالت روضة العبيدي :" نحنا في حاجة إلى معركة جلاء جديدة .... جلاء الفاسدين ، جلاء الفساد، جلاء التهميش ، جلاء التعاطي السلبي ."

إيه نعم نحنا في حاجة لهالمعركة أمّا السؤال الي يطرح نفسو شكون مستعدّ يعارك على تونس ؟ حسب ماقاعدة نرى يظهرلي ما ريت كان الي يعارك في تونس. الأكيد ثمة توانسة مازالوا يحاولوا ما يسيبوش و ما سلموش و ما تعبوش ... أما إذا تواصل الوضع على ماهو عليه زعمة قداش ينجموا يصمدوا في وسط هالكم الهائل من الرداءة ؟؟؟

تعليقك

(x) المدخلات المطلوبة

شروط الإستعمال

Les commentaires sont envoyés par les lecteurs de Business News et ne reflètent pas l'opinion de la rédaction. La publication des commentaires se fait 7j/7 entre 8h et 22h. Les commentaires postés après 22h sont publiés le lendemain.

Aucun commentaire jugé contraire aux lois tunisiennes ou contraire aux règles de modération de Business News ne sera publié.

Business News se réserve le droit de retirer tout commentaire après publication, sans aviser le rédacteur dudit commentaire

Commentaires

Commenter

النشرة الإخبارية