alexametrics
آراء

من الحزب الواحد إلى مجموعة فاسدة واحدة

مدّة القراءة : 4 دقيقة
 من الحزب الواحد إلى مجموعة فاسدة واحدة

 

"ما أشدّ مصائبنا، وأثقل وقعها حين يريد الكثيرون إيهامنا بأنّنا لا نزال في طور انتقال يصفونه بالديمقراطي، فهو في ظاهره فقط كذلك وفي باطنه انتقال من الحزب الواحد إلى مجموعة فاسدة واحدة" من رسالة قيس سعيد رئيس الجمهورية التونسية إلى رئيس الحكومة . دون تحديد التونسية ! علاش ؟ لأنو اليوم بعد جملة من ملفات الفساد كيف ملف البنك الفرنسي التونسي و ملف القمح الفاسد بقبلاط و ملف العقلة على حسابات الشركة التونسية للطيران تونيسار ... يبدو إنو مجلس نواب الشعب و البرلمان تحولوا لحكم يحفظ مصالح الأتراك و غيرهم من الغربان الي يستناو في سقوط الدولة التونسية بش ينقضّوا  على تونس و خيراتها أكثر من أي حاجة أخرى . و بالطبيعة كيف العادة موش القضايا المصيرية هاذي و محاربة الفساد و تطبيق القانون و تطهير القضاء هوما الأهمّ ولاّ أولوية عندنا . المصيري حسب المتابعين و المحللين شكل و طريقة تعامل رئيس الجمهورية التونسية قيس سعيد.

 

الغريب في الأمر إنو الناس قعدت تتفكّه بالخطّ و بحكاية الرسائل الكتابية أما ماريتش برشة فسرولنا علاش رئيس الجمهورية إختار هالشكل في التعامل . و الأهم نسينا محتوى الرسالة و فحواها و قعدنا  شادين القشور . و إنطلقت كيف العادة صفحات مأجورة في حملات من السخرية و التنمر و الإستهزاء و التشكيك حتى في القرات الذهنية للرئيس . عادي ! استانسنا للأسف . أما الي أثر بهتتي و استغرابي هو إنو نفس المنطق و الكلام يقولوا فيه جماعة الوسطية و الحداثية و التقدمية ( موش الناس الكل بالطبيعة ثمة مازالت و الحمد لله ناس عندها شوية قيم و أخلاق في هالبلاد)

: قالك قيس سعيد عندو نوع من التوحّد يخلّيه عايش في كوكب آخر . غريبة ! ياخي قيس سعيد موش كان أستاذ جامعي ؟ ياخي قيس سعيد موش قرّى أجيال في كلية العلوم القانونية و السياسية و الإجتماعية بتونس ؟ ياخي قيس سعيد موش عندو قاعة أساتذة و عندو مجالس علمية و التعليم العالي موش فيه مجالس و فيه تقييمات ؟ يعني السيد بعد ما ضرب أعوام في الجامعة توة فقتوا الي هو متوحد ؟   في الواقع، في زمان يعمّ فيه الفساد جميع البلاد ! في بلاد الناس تحلف و تقسم و تأدي القسم و من غدوة تقلب الفيستة و بلكل وقاحة و تزيد تلقى مبرّرات واهية عادي جدّا إنو كيف إنسان يشدّ في كلمتو و يحاول إنو ما يتنكرّش لوعودو الإنتخابية يولي متوحد . عن الوعود الإنتخابية مانيش بش نطول لأني ما صوتتش لسعيد و ما إطلعتش على وعودو و ما نتفكرش الي نبيل القروي كان عندو وعود انتخابية عظيمة و لا برنامج ماعدا إنو موش بش يتحالف مع النهضة . و نحب نرجع للجملة الي بديت بها الكرونيك و لتحاليل المرتزقة الي مساعدهم وضع النهب و الفساد و قالك : هل يعقل رئيس جمهورية يقول هالكلام ؟ هل يعقل انو تونس الي تعرفت بأنها مثال الإنتقال الديمقراطي و الي بنات هالصورة في العالم اليوم يجي رئيسها   و يقول العكس ؟ لا الحقّ !!! لا يعقل بتاتا !!! الأجانب و العالم الي خايفين عليهم نسيتوا الي هوما يجيوا و يصوروا الاحتجاجات الشعبية و يصوروا شعارت الشعب التونسي من قبيل " فاسدة المنظموة مالحاكم للحكومة ؟ و الشعب فدّ فدّ مالطرابلسية الجدد ؟؟ الشعارات هاذم يقولوا في نفس كلام قيس سعيد ولا لا ؟ على أنا ديمقراطية و انتقال اليوم نحكيو وقتلي كل المؤشرات في الأحمر و نسبة  نموّ ــ 8% في غياب واضح كل سياسات الإنقاذ ؟ على أنا ديمقراطية نحكيو وقتلي اليوم بعد ما الشعب جوّعوه تصير إعتقالات بالجملة في صفوف المحتجين و المحتجات و حالات تعذيب و اعتداء بوليسي   يفكرونا بالنظام البائد ؟ على أنا ديمقراطية مازالانا نحكيو قتلي 3 شباب تكيفوا جونتة في ملعب و هو في الأصل خربة و في الإستئناف  لا أطلقوا سراحهم و لا خففوا العقوبة و القاضي طالب اختبار بش يثبت في الملعب كأنو ماعندوش عينين و تفرج في تقارير القنوات ؟ على أنا ديمقراطية مازالنا نحكيو وقتلي اليوم تونس مرهونة ب 3000 مليار  في فضيحة البنك الفرنسي التونسي في جريمة خيانة عظمى للدولة التونسية ؟ على أنا ديمقراطية نحكيو وقتلي "الدرون" يتباع في المغازات الكبرى في الخارج و في تونس حضرلوا مشروع قانون فيه 90 فصل ؟ على اأنا ديمقراطية نحكيو و نحنا كلّ ماهو صالح للإتلاف مالبذور للزبلة ولّى يجي لتونس ؟ على أنا ديمقراطية مازالتو تخافوا وقتلي المخابرات الأجنبية ترتع في البلاد ؟

لأول مرة أوافق الرئيس قيس سعيد :  مجموعة  فاسدة واحدة و منتشرة في جميع القطاعات والميادين و رأس الحربة اليوم ولّى معروف . واضح المناورات و كل المحاولات بش يقعد الحال مساعد المجموعة الفاسدة الواحدة لازمنا ندعيو للحوار الوطني و التوافق و  سياسة بوس خوك ما صار شيء . و فجأة ننساو التقييمات الموضوعية و ننساو إنو مدة لتالي كان ثمة شبه إجماع إنو المتسبب في هذا الخراب الأخير قبل الفوضى العامة هو الي كتب دستور على قياسو . هو الي عمل قوانين تخدم لوبياتو و مصالحو . هو الي خرب الاقتصاد الوطني و الزراعة  التونسية خدمة لمصالح الأتراك و من لفّ لفّهم . هو من عمل أمن موازي و ميليشيات حفظ القمع . هو الي اليوم ثمة وثائق ثتبت تورطوا في التخابر و الاغتيالات السياسية . هو نفس الي دڨدڨ كل الأحزاب المعارضة و حاول حتى تدمير المنظمات الوطنية كيفما الإتحاد العام التونسي للشغل. نسينا هذا الكل و وقفنا على نوع الخط و الريشة و الخط العربي . كيف العادة كل ما تجينا فرصة لكنس الي خرّبوا تونس و فككّوا دولتها يهيجوا جحافل المتملقين و الخانعين الي الوضع الحالي مساعدهم خاطر يستقاتوا منو بشكل أو بآخر  و بطريقة مباشرة أو غير مباشرة . هوما الي اليوم و كيف كل مرة يكونوا حصن للنهضة و راشد الغنوشي بش يواصلوا تدريجيا و بثبات تدمير تونس و شعبها . هوما الي اليوم يفضلوا يضربوا ساعات بكل وقاحة يحللوا في الشكل و يتفاداو الحديث في المضمون و فتح و متابعة ملفات الفساد و الضغط على الفاسدين لأنو الفساد باتيندا تخليهم يستقاتو ! أما الشعب ؟ الشعب عندو السجون و المنفى و الموت البطيء.

 

الواضح إنو دخلنا في المرحلة الأخيرة قبل ما تستقر تونس يا نهائيا في الظلام و الفساد يا نحاولوا نلقفوا الوضعية و نبنيو . الأكيد إنو الشعب التونسي  في أغلبيتو ( احتكاما للديمقراطية ) قال زادة كلمتو ( تقدم قيس سعيد ب 16 نقطة في نوايا التصويت حسب آخر الإحصائيات) بما معناه إنو مساند قيس سعيد في قراراتو و مستعد يمكن حتى يدفع الثمين و الغالي بش يتخلص فلي توة سنوات ينهبوا فيه و في البلاد و للّي مازال يسمسر و لا ناوي يبيع و يشري نقلّو : ما تبعدش بعيد و ما تضيعش برشة : شوف حكاية نجاح ألفة الحامدي و شوف شنوة صاير حاليا في تونيسار و قارن بين تونس و مصر مثلا ! و بين تونس و المغرب ! و تفكرّ إنو أشقاءنا إلي كانوا يضربوا بينا المثل و كانوا يجيو يداويو عندنا و يبعثوا طبتهم يقراوا و يتعلموا في مستشفياتنا اليوم هوما  بداو التلقيح  ضد الكورونا . فلذا لمحبي الشكل و التزويق و التكنولوجيا : جواب بالخط العربي و بالداكتيلو ! بالريشة و لا بالأقلام اللبدية المهم هو : "ما أشدّ مصائبنا، وأثقل وقعها حين يريد الكثيرون إيهامنا بأنّنا لا نزال في طور انتقال يصفونه بالديمقراطي، فهو في ظاهره فقط كذلك وفي باطنه انتقال من الحزب الواحد إلى مجموعة فاسدة واحدة" . و المفروض اليوم الناس تمشي في جبة موحدة ضد الفساد و الفاسدين و المفسدين أولا بش محاربة الفساد ما توليش باتيندا يملكها قيس سعيد وحدو وثانيا لأنو كل إنسان يحس روحو زعيم و صوت الشعب و هو وحدو على الساحة السياسية بدون خصوم صحاح راهو  ينجم يولي مشروع دكتاتور.

"

 

 

تعليقك

(x) المدخلات المطلوبة

شروط الإستعمال

Les commentaires sont envoyés par les lecteurs de Business News et ne reflètent pas l'opinion de la rédaction. La publication des commentaires se fait 7j/7 entre 8h et 22h. Les commentaires postés après 22h sont publiés le lendemain.

Aucun commentaire jugé contraire aux lois tunisiennes ou contraire aux règles de modération de Business News ne sera publié.

Business News se réserve le droit de retirer tout commentaire après publication, sans aviser le rédacteur dudit commentaire

Commentaires

Commenter

تقرؤون أيضا

03 جانفي 2022 16:04
0
30 ديسمبر 2021 16:29
0
27 ديسمبر 2021 17:00
0