alexametrics
آراء

إمارة الكرم و الخليفة العيوني

مدّة القراءة : 3 دقيقة
إمارة الكرم و الخليفة العيوني

 

 أيها المواطنون ، أيتها المواطنات ؛

 

لقد "بلع" شعبنا الوعي و قعدنا هكّاكة . منين نبدأ و فين نوفى ؟؟؟ أولا خليني نبدأ نهني شعبنا العظيم الذي أبهر العالم بثورة الياسمين . خليني نهني شعبنا السمح الذي ينعم بأول ديمقراطية في العالم العربي . و هنا نورمالمون نعطي المصدح لربيع بودن بش يعبر هو زادة على طريقتو بالتهاني.

 

إذن نهنيكم بإقامة أوّل إمارة في تونس. و عكس كل التكهنات و عكس التاريخ الحديث و القريب و التعيس : أول إمارة تكونت لاهي في سجنان ولا في بن ڨردان و إنما في الكرم و خليفتها هو فتحي العيوني . اية سيدي بعد ما أتحفنا ذاك الشرذمة بغشو و القلق متاعو كيف رئيس الجمهورية التونسية قرر إنو يمشي يصلي في جامع الكرم بدون علمو و كأنو السيد يحكم في دارو و بعد كارثة صندوق الزكاة و الزوبعة في الفنجان الي صارت عليه  ، اليوم يواصل هذا الكائن مهازلو. كيفاش ؟؟

 

وقتلي صارت ثورة البرويطة / ثورة الياسمين ( كل واحد يختار شيساعدو) المجتمع المدني و عدد من الحقوقيين خدموا ، خاصة بعد المصادقة  على دستور الجمهورية الثانية ، دستور ساهمت في صياغته سنية بن تومية، على جملة و ترسانة من القوانين و المراسيم  المنافية تماما للمواثيق الدولية و لحقوق الانسان و حتى للدستور العظيم بيدو.

مثلا قانون 52 متع الزطلة ، الفصل 230 الي بفضلو الحاكم و الطب الشرعي ينجم يبربش مؤخرات الناس في أكبر إعتداء على كرامة و جسد البشر و من بينهم المرسوم 73 الي يمنع من عقد الزواج بين تونسية و غير مسلم . سي الباجي قايد السبسي الله يرحمو ويغفرلو ويسامحو قرر في 2017 بالتحديد في مناسبة 13 أوت الغاء هالمنشور التعيس المنافي للحريات . و كان الامر كذلك فبعد خطاب السبسي أعلنت وزارة العدل إلغاءو و هللنا و زغرطنا  وفرحنا و قلنا ربحنا عركة في حرب طويلة ضد التخلف و الرجعية و الميز المبني على الجنس.

شنوة صار أسيدك ؟؟؟ سي فتحي العيوني خليفة إمارة الكرم قرر انو يذكر المواطنين و المواطنات بالوثائق المطلوبة لإبرام عقد الزواج و من بينها : شهادة في إعتناق الدين الإسلامي إذا كان الزوج غير مسلم و يروم الزواج بمسلمة .

يعني طز في الدولة و طز في وزارة العدل و طز في القانون و طز في الدستور و طز في حرية المعتقد و طز في حرية الضمير و طز فينا ... هو عندو إمارة عندها قوانينها الخاصة و الي عجبوا عجبوا و الي ما عجبوش ينجم  على رأي النايبة الكسيكسي :"يشرب ماء البحر " ماذابيكم موش بحر الكرم خاطر ملوث .

المصيبة أعظم . حسب شهادة بعض التونسيات كيف تم بث هالخبر برشة منهم أكدوا إنهم هوما و أزواجهم الاجانب تعرضوا لكل أشكال الاهانة و التمرميد من الادارة التونسية وقت إبرام عقود زواجهم خاطر موش مستعرفين بإلغاء المرسوم  بالطبيعة بعدة نحنا ماحسمناش المسألة و خاطرنا جبناء و عمرنا ما عملنا عركة صحيحة و على قواعدها مع هالدواعش ديمة يرجعوا لمسمار جحا الفصل الاول من أتعس دستور تقرأ و تكتب في تاريخ البشرية : ودينها الإسلام !!!

يا أخي وقتاش بش تفهموا ويحن عليكم المولى و تستوعبوا انو ثمة توانسة و تونسيات موش مسلمين و موش مسلمات  ؟ وقتاش بش تفهموا إنو في هالبلاد ثمة ناس تؤمن فقط بعلوية العقل و القانون ؟  و ثانيا شكون ينجم يفسرلنا علاش بلديات سنة و بلديات فرض ؟ بعض البلديات يقبلوا و يبرموا عقود بدون أدنى مشكل وأخرين لا ؟ و وقتاش العباد الي مازالوا لا حشمة ولا جعرة يحلوا أفامهم و يقلك ثمة أطراف سياسية تحب تقسم البلاد ؟ هاي مقسومة ! هاو على عينيكم ! هاو عشرة سنوات من حكم الإخوان وين وصلونا : كل بلدية و قانونها و كل  جهة و قراءتها للقانون . جماعة يقلك قانون  و جماعة يقلك لا دين . و في هذا ثمة راهو ناس تعاني و ثمة نساء يتمرمدوا فقط خاطر إختارو شريك حياتهم موش تونسي وموش مسلم .... دولة الكوري ماعادش تدخل يديها في جيوبنا بش تنهبنا اليوم ولات عندها من الوقاحة انها تدخل يديها في قلوب  الناس و تفرض عليهم  باسم الدين شكون تحب و شكون تختار .

موش هذا الي يوجع أكثر . الي يوجع أكثر إنو ثمة ناس تعتبر نفسها من "النخبة" قول من "النكبة" يدعيو إنهم أحرار  يقلك توة بربي هذا وقتو ؟ موش هاذم أولويات التوانسة !!! صحيتو . برافو خبراء ماشاء الله و رؤساء حكومات حققت نجاحات باهرة بش تجيو اليوم تسمحوا لأنفسكم إنكم تحددوا للناس أولوياتها و هي طريقة قذرة في مصادرة حق التوانسة في التعبير عن مشاغلهم . لأنو كيف نحبوا نغزروا من ثقب إبرة  لأي قضية أكيد بش نتفهوها و نحقروها أما وقتلي نغزروا للأمور مالجوانب الكل وقتها نفهموا الي هي فرصة أخرى يستغلوها خفافيش الظلام لفرض ارادتهم و رؤيتهم و تصورهم للمجتمع التونسي . مجمتع معقد مريض متخلف رجعي يحكمو نصّ لا يمت للواقع بصلة . المسألة هي مسألة وجود في ناس قررت تطبيق سياسة مرشدهم في نظريتو العظيمة متع التدافع الاجتماعي و كل يوم نعيشوا كارثة من هالنوع تأكد إنو الإخوان إستولاو على الدولة بما إنو الناس تشوف و تتفرج في التجاوزات وهي ساكتة و لابدة و كيفما يقولو أول الغيث قطرة . أول نهاية الدولة هو خرق قوانينها ومراسيمها بهالطريقة العلنية و بكل تبوريب .... و سلمولي عالمحكمة الدستورية و ندعو التوانسة الى التفكير الجدي في إلغاء كلمة ثورة من قاموسهم .  و أخيرا ياخي فتحي العيوني باندي ولا خليفة في إمارة الكرم ؟؟؟ الواضح إنو الزوز و الي موش عاجبو يشرب ماء البحر و بالشفاء سيدي الرئيس .

 

تعليقك

(x) المدخلات المطلوبة

شروط الإستعمال

Les commentaires sont envoyés par les lecteurs de Business News et ne reflètent pas l'opinion de la rédaction. La publication des commentaires se fait 7j/7 entre 8h et 22h. Les commentaires postés après 22h sont publiés le lendemain.

Aucun commentaire jugé contraire aux lois tunisiennes ou contraire aux règles de modération de Business News ne sera publié.

Business News se réserve le droit de retirer tout commentaire après publication, sans aviser le rédacteur dudit commentaire

Commentaires

Commenter

تقرؤون أيضا

03 جانفي 2022 16:04
0
30 ديسمبر 2021 16:29
0
27 ديسمبر 2021 17:00
0