حكومة في مهبّ الريح ...

و أخيرا شكلّها ... الفخفاخ حكومتو . ما يخفاش عليكم إنو التشكيل في هالأوضاع ولى ياسر صعيب حتى سوم الورد غلا ففي عيد الحب مثلا الوردة ولات ب 7د . أما تشكيل الأحزاب و السياسيين يتطلب أكثر مالورد : يتطلب مناصب وزارية و حقائب و فازات . توة  تقريب 4 شهر بعد الإنتخابات و بعد سقوط حكومة الجملي النهضاوية جاتنا حكومة الفخفاخ النهضاوية . فبحيث النهضة  ضربت 7 وزارات علنا بخلاف المندسين متع العادة و العوايد الي نفيقوا بعد بيهم و الحزب الثاني جاء على برة . ماعدا إسم ولا ثنين كيفما الي كانوا موجودين في حكومة الجملي التشكيلة عموما ما نتصورهاش بش تصنع المعجزات . كيف العادة و العوايد تلموا قسموا الكعكة : هات خوذ و لا رينا مشروع و لا أولويات و لا حكينا برامج و لا وضحنا سي الفخفاخ بيدو شنوة التطبيقة الي إستعملها بش إختار بيها وزرتو. تشكلت الحكومة و في نفس الوقت تشكلت المعارضة و من المضحكات المبكيات للي توة 9 سنين يعملوا في السياسة :  الي كان البارح في الحكم اليوم ولّى في المعارضة و نحكي بالطبيعة على عبير موسي .

قبل ما تبدأ تخدم ولا تقدملنا برنامجها ثمة قناعة راسخة في ذهن الجميع إنو حكومة الفخفاخ في مهب الريح أولا لأنو حزامها السياسي موش أكلي عريض لهاك الدرجة و ثانيا لأنو الأحزاب الي قبلت تحكم مع بعضها الى يوم الناس هذا مازالت تسب في بعضها و نحكي بالطبيعة على الحرب بين النهضة و التيار و حركة الشعب و ثالثا لأنو الثلاثة ملاين الي صوتوا لقيس سعيد أمنيتهم الوحيدة هي سقوط الحكومة و حل البرلمان . برلمان الهانة و رقود الجبانة و نتحمل مسؤوليتي التامة في هالكلام .

هذا البرلمان الناتج عن نظام سياسي هجين لا عندو لا ساس لا راس الناس عافتو من أيمات التأسيسي و رغم الي كنا كشعب مازلنا سنة أولى ديمقراطية إلا كنا عارفين إنو الكوارث الي بش يتسبب فيها اكثر مالإيجابيات . و الى يوم الناس تستمر المهزلة .

توة بلاد واقفة 4 شهر و ممولين بداو يسلوا في رواحهم بالشوية بالشوية و إقتصاد شادد في شعرة و إرتفاع العنف في الشوارع هذا الكل الحقيقة موش مهم و لاهو أولوية ولا هو مشكلة بالنسبة لنواب شعب اختارو في ظرف دقيق خلى شباب معطل ن العمل البارح بركة يعمل محاولة إنتحار في بابو إنهم يصادقوا على .... موش على قانون يشجع الإستثمار ولا قانون يحمي البيئة و لا قانون يحدّ من الفساد ... نوابنا إختارو  إنهم يصادقوا على إنو يتمنحلهم جوازات سفر ديبلوماسية . إيه نعم . أولوية الأولويات عند هم إنهم يسافروا للخارج بجوازات سفر ديبلوماسية علاش ؟ بش يمثلوا توانس في الخارج ... يعني ما يكفيهمش إنهم يمثلوا علينا في الداخل يحبوا يمثلونا في الخارج . باهي فاش بش يمثلونا ؟ في ندوات دولية ، في إجتماعات مع برلمانيين أجانب في بعض المحافل الدولية .  بعد ما تفرجنا في الجلسات العامة و رينا مستويات خطابهم و طريقة تعبيرهم و جهلهم بأسس الإقتصاد و السياسة و ما نحكيش عاد على مستواهم في اللغات نقول : لك الله يا تونس !  هاذم الي اليوم يتكلموا باسم هالشعب المغبون و الي غدوة الكلهم ماعدا الاحرار و الحراير فيهم بش يصوتوا للحكومة النهضاوية موش همّهم البلاد و إقتصادها و تعليمها و عدالتها و الحفاظ على حدودوها و لا مشكلتهم حاجيات التوانسة الي يتنفسوا بقصبة ماعادش خالطين على الحد الأدنى الضروري : مشكلتهم تتعدّى الحكومة بش يحافظوا على كراسيهم .

إنو اليوم نواب ما يصوتوش على برامج و يقبلوا إنو حكومة تتشكل بالطريقة الي تشكلت بيها حكومة الفخفاخ و بش يعديوها ، هذا بش يخلي التوانسة يهزوا يديهم نهائيا و إلى الأبد عليهم بطمّ طميمهم.

و الحكومة بش تتعدّى إيه و من بعد ؟؟؟

أنا نتصور إنو بعد أشهرة و على أقصى تقدير بش تصير منها إستقالات. و إنو بش تاكل بعضها و إنو هالشعب إلي عندو صبر أيوب بش يبدى عاد يدور بيه الدجاج الأكحل لكن هالمرة ثمة معارضة أقوى ببرشة من أشباح المعارضين في الحكومة الي فاتت و الكلنا نعرفوا إذا ثمة معارضة صحيحة شنوة يصير ( تفكروا إعتصام الرحيل)  مع فرق كبير إنو المنظمات الوطنية و الرباعي الراعي للحمار ماعادش هوما بيدهم عندهه نفس رصيد الثقة عند الشعب .

مستحيل نقاوموا الفساد بنفس الناس الي ساهمت في تفشيه و مستحيل نحققوا نمو للبلاد مع الي ساهم في النكبة الإقتصادية الي نعيشوا فيها و مستحيل نعملوا الجديد بالقديم ... فلذا للسيد فخفاخ و من معه حضروا أرواحكم فالقادم أسود مالسواد .