معتقل الرقاب لتكوين الإرهابيين

كل بلاد و أرطالها و هالبلاد كل يوم بغريبتها . آخر الغرايب إكتشاف معتقل ، على شاكلة معتقلات بوكوحرام و طالبان، في الرڨاب : 42 طفل أعمارهم بين 10 و 18 سنة مسجونين في "مدرسة قرآنية" يتعلموا فيها في فنون القتال و الجهاد .

الخبر هذا الي فضحتوا حصة الحقائق الأربعة متع حمزة بلومي هبطت على التوانسة موش الكل بالطبيعة  كالصاعقة . ديمة هالنوعية من الجرائم كيف تبدى مربوطة بالصغار تقلّق أكثر و تصدم أكثر. ثمة توانسة أخرين ــ الأكيد ماهمش توانسة و لا خليني نقول توانسة على الأوراق أكهو ــ يدافعوا على هالمعتقل و على الوالدين المجرمين الي طيشوا صغارهم بين يدين عباد مجرّمة كيفهم و لا أكثر منهم  وصلت بيهم الدناءة إنهم يطالبوا بإعادة فتح المدرسة.

إكتشاف  مركز التدريب الإرهابي بالرڨاب كشف المستور الي تغطّى و غطّاو عليه سياسيي الغلبة توة سنوات بإسم التحالف الوطني و بإسم الوحدة الوطنية و بإسم ضرورة إنجاح العملية الديمقراطية : ثمة ناس عمرها ماكانت وطنية ، ثمة ناس عمرها ماهي بش تولّي وطنية ، ثمة ناس مستحيل تكون وطنية . مثلا الحبيب خذر ، مثلا سيف الدين مخلوف : هاذم الزوز الي ريناهم تنقلوا على عين المكان في إطار مساندتهم لأولياء الضحايا !! نخليكم وحدكم تعرفوا شنوة القاسم المشترك بين محامي الارهابيين و بين النائب المؤسس و النائب الحالي .

ثمة ناس لابدة، راكشة ، تستنى في لحظة تسمحلها بش تغرس أنيابها في تونس و تحققّ حلمها الأزلي الي عمرها ما تخلاّت عليه : إنو تونس تولّي إمارة سلفية و إنو الشعب يولي رعية و إنو ما ثماش تونس أصلا ثمة أمّة . هوما ما كذبوش راهو مالأوّل قالو هالكلام تفكروا الخليفة السادس ، تفكروا كلام الغنوشي و مورو و غيرهم ... ثمة وجوه كيف شورو و اللوز ، صحيح إعلاميا إرتحنا منهم، لكن مازالوا نافذين و فاعلين داخل حزب حركة النهضة و ماجاورها  ؛ ثمة إنسان عاقل في كامل مداركو العقلية يتصور إني الناس هاذي تبدلّت و قبلت باللعبة الديمقراطية ؟؟؟ الإجابة عندي واضحة : مستحيل

تفكروا يا توانة و ردّ بالكم تصدقوهم كيف يبداو يحكيو بلغة القانون و لغة حقوق الإنسان و الحداثة !! تفكروا يا توانسة الشيخ راشد كيف قال " الأمن موش مضمون و الجيش موش مضمون ... أعملوا المخيمات ... " !! تفكروا يا توانسة الشيخ مورو كيف قال في حديث مع رفيق دربو الداعية غنيم الي يدعي لختان الفتيات كيف قال " نحنا حاجتنا بأولادهم !!" . ما خلقوش بدعة ، ماعملوش ستراتيجيا جديدة : ينسجوا على منوال بوكوحرام و طالبان و غيرهم من الإرهابيين . فهموا الي إنتخابيا كان يبوسوا فينيهم ثمة حجم معين من الأصوات ما ينجموش يفوتوه و تلفتوا للفئة الوحيدة الي مازالوا يصنعوا منها قنابل بشرية : الصغار .

الأدهى و الأمرّ في هالكارثة الي تعيش فيها تونس ، إنو من نهار تمّ إكتشاف معتقل الرڨاب لتكوين الارهابيين ، تقريبا كل يوم يتم إكتشاف معتقل آخر و أنا نكتب في الكرونيك : فوشانة و مدنين 3 مبيتات ... السؤال الي يطرح نفسو : هل إنو أجهزة الدولة كانت على علم و تسترت و سكتت ؟؟ و إذا هذا الي صار : شكون سكت و شكون تسترّ ؟ اذا أجهزة الدولة مافيبالهاش و ماكانتش على علم ؟؟ مازالنا نجموا نحكيو على دولة ؟؟ مازالنا كتوانسة نجموا نعيشوا مرتاحين مطمانين ؟؟ و التوانسة الي يسكنوا في هالمناطق و الي في بالهم منهم الأولياء الي حب تصريحات روضة العبيدي صغارهم حاولا يهربوا مالمدرسة و يروحولهم يرجّعوهم بالسيف : شكونهم ؟ تابعين لأنا بلاد ؟ مواطنين توانسة ؟؟؟ للأسف  هالحادثة أكدّت إنو أهمّ حاضنة للارهاب هو الشعب بيدو : الي يعرف و ما يتكلمش ، الي يرى و يحسب روحو ماراش ، الي يعاين و ما يبلغّش ، الي يسمع و ما يعاودش و ما يفضحش ... حاضنة الارهاب في بلادنا هي بعض المحامين و بعض النواب و بعض الوزراء و بعض الأمنيين ... الي مايحبوش على تونس دولة مدنية ، الي ماهمش قابلين بدرابونا الابيض و الأحمر و يحبوا كالشوليقة الكحلة المسودة الملودة ترفرف في بلاصتو ... أما في هذا الكل مازال ثمة أمل : أمل إعلام يؤمن بدورو إنو سلطة رابعة بالحق ، أمل إعلاميين و صحافيين يعرّضوا في حياتهم للخطر و الموت إنطلاقا من مبادئ و قيم و قناعات اليوم الخوانجية و الارهابيين يستعملوا وقت ما يحبوا و يعفسوا عليها وقت ما يحبوا .

42 طفل  تمّ : إغتصابهم ، ضربهم بالفلقة لين ماعادش ينجموا يمشيو على ساقيهم ، تجويعهم و توكيلهم ماكلة بالدود، مرضى بالجرب ، راعيهم القمل ، يرقدوا في فروشات مع بغولة أعمارهم مالثلاثين الفوق، يخدموا في الفلاحة كالعبيد و مولى المدرسة عند حساب بنكي فيه زوز مليارات و بيسين في دارو ؛  من بعد يقلّك يحفظوا في القرآن و في كلام ربيّ !!!

42 طفل خرجوهم من مدارس الجمهورية التونسية و حرموهم من التعليم بش سكروا عليهم مع مرضى نفسانيين ، مجرمين مارسوا عليهم جميع أشكال العنف و التعذيب : إذا هذا كلام ربي  شخصيا نقلكم السماح و لازم غلق جميع المدارس القرآنية في تونس كلها بوه على خوه : مدارسنا فيها معلمين يقريو القرآن و ثمة التربية الاسلامية و الي موش عاجبو الحقيقة ماناش شادينو ينجّم يمشي يعيش في "بوكوحرام " ولا طالبان و يعمل مزية علينا كشعب تونسي و هوخارج يخلي جكنسيتو في باب المتار : خاطر تونس دولة مدنية حب من حب و كره من كره .

و أخيرا و بعد ما الناس الكل حكات على هالغريبة إستوقفني  إنو موش برشة عباد في تحاليلها غاب عليها عنصر مهمّ : مسؤولية وزارة التربية فلي صار. من المفروض إنو المعلمين و مديري المدارس و الإعدادايات في مثل هالحالات  يعلموا وزارة التربية ! المفروض إنو يتم فتح تحقيق في إنقطاعهم عن الدراسة ! المفروض راهو ثمة شكون تنقّل و عاين في ديارهم وين مشاو هالصغار ، شنوة صار فيهم . المفروض : أما بين المفروض و الموجود ثمة لسعد اليعقوبي و المستوري الڨمودي و إضرابات الثانوي و الابتدائي الي مشاو فيها بين الساقين جيل كامل . الي خلاو اليوم الوزارة في حالة قطيعة مع مدارسها و معادها : وقتاش الناس بش تفهم الي ثمة رهانات أكبر مالترقية و من الزايادات ؟ وقتاش الناس بش تفهم الي إستمرار هالوضع في التعليم ما يخدم كان أعداء الحياة ؟ وقتاش الناس بش تفهم إنو اذا المدرسة العمومية تتسكر و تتخرب راهو المدارس القرآنية  ــ شخصيا نرفض هالاسم و نسميها كان المعتقلات ــ بش يتنعوشوا ؟؟؟ وقتاش ؟؟؟

يمكن وقت يعاود يصير إغتيال كيفما إغتيال شكري بلعيد و يتشّدوا الي قتلوه و كيف يحلوا عليهم الكتاب يلقاوهم ترعرعوا و تربّاو  و كبروا في معتقل كيفما معتقل الرڨاب ! يمكن وقتها نفيقوا !!! نقول يمكن خاطر لتوة الحقيقة ، حقيقة إغتيال شكري مازالوا ملكمتين عليها في إنتظار شنوة بش تخرج طبختهم السياسية في إطار إنتخابات 2019 و الشعب برد و الشعب ماعادش يهبط للشوارع بالآلاف و الشعب تقهر و قعد يتفرج ...