شفتوها الحرية؟
مدّة القراءة : 1 دقيقة
نظام وانضباط واحترام للقانون ومسؤولية
ونجيو في الصباح في الوقت، ونخدمو وننتجو ونعطيو حق الشعب علينا وحق الدولة ونخرجو في الوقت في العشية
ونخلّصو كلنا الضرائب الي علينا
والزبلة والخروبة وما نحفتروش منها ولو حتى شويّة
واناقشو ونسمعو ونعطيو راينا ونقبلو راي الاغلبية،
ونعبّرو عن مطالبنا من غير عنف وبكل حضارية
ونحاولو نقنعو الناس، موش نعفّسو على الاقلية
ونهار الانتخابات نمشيو نصوّتو ونختارو أفضل من يتحمل المسؤولية
وما نعطيوش أصواتنا و بلادنا للجاهل والكذاب والسارق وللباندية
وما نسلّمو في حقنا وحق اولادنا وما نخلّيو بلادنا وأرض اجدادنا هناني بناني لأعداء الحرية
هذيكا سيدي خويا الحرية، موش فوضى، وتسيّب واستهتار وشعبوية
وسبّان وشتم وهتك أعراض وهمجية
واعتصامات، وإضرابات ، وإشاعات وتعطيل خدمة وتسكير للثنية
وسوء تصرف، وإفلاس وفساد وتشليك للدولة وأكتاف وتوريث ومحسوبية
وقيّد على الديموقراطية
يا خوفي يجينا نهار.......الناس باش تكفر بالحرية، وتقول يا حسرة على زمان الطرابلسية
ويلعن بو الديموقراطية
ويا حسرة يا زمان على النظام والانظباط والخدمة والعصا...... والدكتاتورية
وقتها..........بالرسمي باش ننساو الحرية، والحوار التونسي والتاسعة وحنبعل وقرطاج plus والوطنية
ونعدّلو أوقاتنا على تونس7 ونرجعو للعناية الموصولة ورفع التحديات ونقراو كان جريدة الحرية
ونردّو بالنا وقتها لا نبكيو على تونس وعلى الحرية الي ضيّعناها بإيدينا
ولا نندبو على ذكريات الديموقراطية.
وأولادنا وأحفادنا كيف يسألونا، نطبّسو روسنا ، ونقوللهم، خسارة ....... ما كناش أهل للحرية.
تعليقك
Commentaires