alexametrics
آراء

عيادي و سنين دايمة !

مدّة القراءة : 3 دقيقة
عيادي و سنين دايمة !

لا حال يدوم ، لا حال يدوم رمضان البارح و العيد مازالو نهارين. عيد السنة بش يكون عيد على خلاف الأعياد الي سبقوه . حسب آخر القرارات الحكومية ممنوع الجولان نهار كامل و حتى تراخيص العمل نهارتها ماهياش بش تصلح . يعني عيد السنة كل فول بش يتلهى في نوارو و في دارو . بالنسبة لشعبنا السمح توة شهرين و هو في حجر صحي شامل للأغلبية الي فيه ( رسميا) و بعد ما تسكرت البلاد و البلايص الي مستانسين نتقابلوا و نتلموا فيه ، يظهرلي ما نختلفوش اثنين كف نقولوا انو التوانسة متشوقين بش يعرفوا وقتاش ترجع تحل البلاد و ترجع الحياة العادية : مالجوامع للبيران.  تكلموا في هالموضوع المعنيين بالأمر : وزير السياحة و رئيس الحكومة . لكن للأسف بعد ما سلعناهم بكل تركيز و شوق : خرجنا بوالو . حتى شيء . الى يوم الناس هذا ما نعرفوش وقتاش ترجع الحياة العادية و وقتاش نجموا نرجعوا نعيشوا كيف ساير الناس بمن فيهم الإيطاليين الي الكورونا قتلت عندهم قريب ال 35000 مواطن. في إيطاليا رجعت الحياة تدريجيا و كل الأماكن السياحية و العامة رجعت حلّت بالطبيعة مع إحترام التراتيب الصحية اللازمة كيف التباعد الاجتماعي و التعقيم و لبسان الماسك الخ. 

نحنا في تونس الى حدّ الآن 47 حالة وفاة و الى هذه اللحظة البلاد مازال مسكرة ، عبد كان جاء من محبي نظرية المؤامرة راهو قال : الحكومة تحبنا نقعدوا في ديارنا خايفة مالدعوات للاعتصام و الاحتجاج الي قاعدة تكبر على وسائل الاتصال الإجتماعي. لكن مانيش من محبي نظرية المؤامرة و خلينا نقولوا الي حكومتنا خايفة علينا بلحق و خايفة على صحتنا . إيه جميل جدّا لكن متى و كيف بش يترجم هالحب للشعب على أرض الواقع اذا استفحلت الأزمة الإقتصادية و إرتفعت نسبة البطالة ؟ ما تخافوش حدثنا رئيس الحكومة فعطانا نظرتو للأوضاع و حلولو.

 

أولا السيد رئيس الحكومة تمنالنا  عيد مبارك . بارك الله فيه و ثانيا شكرنا على كلّ ما قمنا بيه . لا شكر على واجب .

ثانيا إلياس الفخفاخ فكرنا إنو ثمة عالم قبل / بعد الكورونا و أكدلنا إنو البعد بش يكون تحت عنوان " الأزمة" اكبر أزمة بعد الحرب العالمية الثانية .

ثالثا فكرنا إنو حكومتو عمرها أقل من جمعة لكن هذا ما منعهاش إنها خذات قرارات جريئة و إبداعية و ما تلهاتش بالسفاسف. نحب نعرف شنوة يقصد بالضبط رئيس الحكومة بكلمة سفاسف ! كيف نرجعوا لأهم القضايا الي شغلت التوانسة هالأيامات المتعلقة بحرية الرأي و التعبير و حرية الضمير و إلغاء القانون 52 الي سي فخفاخ كان حاطو ما بين نقاط حملتو في الرئاسية و نرجعوا للحرب الدايرة في مجلس نواب الشعب بين الدستوري الحر و حركة النهضة بما فيها حول أملاك الغنوشي و السياسة الديبلوماسية لرئيس مجلس نواب الشعب و دعوة بعض الأطراف لإستفتاء شعبي حول تغيير النظام السياسي و تصريحات قيس سعيد المتعلقة بالموضوع ... يمكن هاذي السفاسف الي يحكي عليها فخفاخ . كل واحد و تقييمو للأمور لكن ما نتصورش إنو هالمسائل نجموا نعتبروها سفاسف هي جوهر الموضوع و جوهر الأزمة الي نخرت تونس و سلمها الإجتماعي و إقتصادها و أمنها و الي إذا ما نظرناش فيهم بش تتواصل الحروبات الي كل مرة تعرقل رغبة التوانسة في التغيير . نتجاوزوا السفاسف و نمشيو للرسمي و الصحيح : الكورونا و الازمة العالمية هاذي كشفت على الفقر و على هشاشة التشغيل و على إهتراء القطاع العمومي و الصعوبات المالية : هوما راهم حقيقة نعرفوها أما كشفتها الكورونا أما ماعادش نجموا نتجاهلوها ! 

كما إنو" التلاحم الرائع بين المجتمع و الدولة  و الإبتعاد على التناحر العقيم و التركيز على ما ينفع الناس" هذا شنوة قال فخفاخ .  . مليح . باهي برشة . لكن  التلاحم  الصحيح الي نجموا نبنيو بيه دولة القانون و المؤسسات را هو ما ينجم يصير كان  بمقاومة و فتح ملفات الفساد و ملف الثروات المنهوبة و المليارات المهربة بطرق ملتوية . ا

التلاحم يصير كيف نحنا المواطنين الي محبوسين في هالحجر و نتفرجوا في الحرايق شاعلة في تونس و نعرفوا شكون وراها و يتحاسبوا الي عملوها . كيف نواب المعارضة يطالبوا بجلسات مسائلة بش يعرفوا زملائهم منين جابوا الفلوس و الثروات تمّ العملية في كامل الشفافية موش تولي حرب و فيها سبان و عنف مادي و لفظي . التلاحم يصير كيف يصير الإعتداء بالعنف على نواب كيف كيف يتحرك القضاء و النيابة العمومية بالسرعة اللازمة كيفما تحرك في قضايا أخرى نعتبرها من السفاسف و ما تنفع الناس بشيء .

و عرفنا الرهان الي هو التحكم في الفيروس و العودة لحياة إقتصادية عادية مثلا نجموا نقصوا في مدة الحجر الصحي و الي بش يجي لتونس تختارلو الدولة نزل و يدفع هو ثمن الإقامة في إطار دعم السياحة . و عرفنا زادة الي مقاومة الفساد ماعادش كلام اكهو مثلا الدولة ضربت الاحتكار و تحضر في مخطط خماسي الاستراتيجي لفترة 2021 ــ 2025 و بش يحدر في بداية سنة 2021 و بالتالي يصبح رباعي على أمل نحققوا الي ما حققناهاش في العشرية السوداء الي تعدات .

في كل الحالات الي نشدوه هو " بش " : بش نعملوا ، بش نخدموا ، بش نقدموا ! و نعملوا على النوايا الصادقة الي تنجم تهزنا للجحيم . الكلام هذا الكل سفاسف فارغة مدام النظام السياسي على ماهو عليه و مادال الي ساهرين على سن القوانين و تطبيقها كيفما نراو فيهم هوما جماعة باربوات كل واحد عامل قانونو و كل واحد يدافع على نظرتو لتونس . كان من الانفع إنو الخطاب يقترح حاجات عملية و أرقام واقعية و تواريخ اكثر تحديد لكن هذا موش ممكن مادام ماثماش احزاب تحكم على أساس برامج واضحة و مادام وزير يقول إي و وزير يقول لا . في كل الحالات عيدكم مبروك و سنين دايمة ... و الدايم على ما نراو كان الكلام و ال "بش" و الباقي يجيبوا ربي و لا الشعب كان حب يفيق من سباتو العميق .

 

 

تعليقك

(x) المدخلات المطلوبة

شروط الإستعمال

Les commentaires sont envoyés par les lecteurs de Business News et ne reflètent pas l'opinion de la rédaction. La publication des commentaires se fait 7j/7 entre 8h et 22h. Les commentaires postés après 22h sont publiés le lendemain.

Aucun commentaire jugé contraire aux lois tunisiennes ou contraire aux règles de modération de Business News ne sera publié.

Business News se réserve le droit de retirer tout commentaire après publication, sans aviser le rédacteur dudit commentaire

Commentaires

Commenter