alexametrics
آراء

مسلسل اللطخات : الحلقة الاخيرة

مسلسل اللطخات : الحلقة الاخيرة

 

أيامات بعد الحلقة الثانية من مسلسل اللطخات تتواتر الأحداث و الأخبار و الكوارث إلى درجة إنّو  "ناتفليكس" نتصور  تنجم تشري تونس و تعمل  "سيري" أقوى ببرشة من ناركوس ولا ڨايم أوف ثرونس .

 

 غرافيك تركيبة مجلس النواب الي عاطي عالقوس قزح يأكدلنا إنو الوضعية الحالية الي عايشتها تونس ما تنجم كان تتواصل و تتعقّد. النهضة الأولى في تشكيلة فاشلة و معاها إئتلاف الكرامة من غير أغلبية و البقية إختاروا الكل المعارضة . و مازال المجلس ما تلمش و تحسوا تفرفش : الكلها بدات تسب في بعضها و كلها توزع في صكوك النظافة و الفساد . الخوانجية كشروا على أنيابهم و بداو يتهددوا و يتوعدوا و كسكسلوا يرجع لأصلو أثبتولنا إنهم لاهم حركة مدنية ولا عندهم مع الديمقراطية ملي في ليلة إحتفالاتهم شدوا فرخ صغير عمرو 22 سنة فشخوه بطريحة . سيف الدين مخلوف مدلهم يد الدعم و المساندة و بدا يراجع في مواقفو ويسلّ في روحو من منتخبيه قالك ماطلبناش قطع العلاقات مع فرنسا و لا طلبنا طرد السفير  : حبيبات, و طاح راح  . مساكن الي صوتولو يستناو بش تتصبلهم منحة الملح و الثروات المنهوبة .  مالمرسى بدينا نمقدفوا : من قبل ما طبوا المجلس بداو يتراجعوا في وعودهم الإنتخابية .

 

تركيبة المجلس من حيث نوعية النواب : حاجة تعمل 66 كيف.  ناس بكري قالوا " شدّ مشومك لا يجيك ما أشوم !" و هذا الي صار. في المجلس الجديد بعد المحامين و الطبة و المعلمين عندنا مهن حرة جديدة دخلت لمجلس نواب الشعب . نوع من  التوانسة : عندنا شيخ روحوا بيه مطرد من كندا و متعلقة بيه قضايا و شبهة الإرهاب الي هو الشيخ الجزيري. من بين أهم تصريحاتو قالك المرا كيف تولد عند طبيب راجل تحس بالمتعة الجنسية : مرة أخرى يثبتلنا هالجرثومة إنو الخوانجية بأصنافهم أولا يخمموا بنصفهم اللوطاني و ثانيا إنو المرا عقدتهم . هو الحقيقة نحمدو الهيئة إنها تمكنت من إسقاط قايمة هالهايشة و رتحونا من فضيحة  تضحّك علينا العالم . و يبقى السؤال كيفاش تم قبول قايمات  الجزيري و حزبو ؟ الله يسامحك يا الباجي . و ثمة النائب محمد صالح اللطيفي شهر سطيش و مهنتو كناطري سابق . إيه نعم قريتوا مليح كناطري : يظهرلي بعد ما ساندوا برشة سياسيين قبل و ما عملولهم شيء قالك نهبطوا بيدينا . و ضرب المڨرون في ماجل بلعباس و تذبحوا العلالش و زغرطوا النساوين و جونا فسفس . هو لاما حالة كيفما قال النائب  سيف الدين مخلوف  التهريب  و الكنطرة  شيخات ، حاجة تفرهدوا و تعملوا كيوفوا هو الي نهار كامل يتحلبد من سفارة لسفارة . و إن لم تستح فصوت لها النوع مالعباد و اكهو.

مازلناش نفيقوا شوية من هول الصدمة و نستناو في الهيئة المستقلة متع الإنتخابات تعطينا النتائج الأولية للإنتخابات و سمعنا خبر إطلاق القروي ... إطلاق سراح القروي.  ملاّ قضاء و ملاّ قدر !!! و في نفس الوقت الناطق الرسمي للمجلس الأعلى للقضاء قال بش يخبر الله بكل شيء و أعلن الحداد و حط تصيورة برفيلو كحلة . كمّل دخّل في التوانسة غولة كلي ناقصين و اكهو تعدات ليلة غبشة على القضاء : الي يفسرلنا في فقه القضاء و الي يحللّ والي يهلّل و الي يندب . و الحصيلة فلخر واضحة : حكاية نبيل القروي كملت ضربت الثقة متع التوانسة في السلطة القضائية و يرحم خليل . مابطاش نبيل و جماعتو بش هبطوا فيديو : قروي بشوش زاد حسّ بالمقهورين و المظلومين . قري يحب مرتو و يمجد فيها . قروي شاب و كلو نشاط و حيوية و إنطلقت في الربع الساعة الأخير الحملة الرئاسية في انتـظار المناظرة .

 

ليلة الأحد بش يوفى مسلسل اللطخات و بش ندخلو في مسلسل آخر ، و أهم حاجة إننا نخليو الي ربحوا الإنتخابات ياخذو دور البطولة و يتحملوا مسؤولياتهم قدام منتخبيهم و الوعود الي قدموهالهم . لازم نخليو النهضة و من معها يحكموا وحدهم من غير لا وفاق و لا وحدة و لا إنقاذ : يزيهم ما تخباو وراء الناس و دڨدڨوا أحزاب . و الشعب العظيم هذا زادة لازم يتحمل مسؤولية قراراتو ، على أمل يكون عندو ما يكفي من الصبر  في الفترة القادمة خاطر السنوات الجاية أكسح ببرشة ملي تعداو.

تعليقك

(x) المدخلات المطلوبة

شروط الإستعمال

Les commentaires sont envoyés par les lecteurs de Business News et ne reflètent pas l'opinion de la rédaction. La publication des commentaires se fait 7j/7 entre 8h et 22h. Les commentaires postés après 22h sont publiés le lendemain.

Aucun commentaire jugé contraire aux lois tunisiennes ou contraire aux règles de modération de Business News ne sera publié.

Business News se réserve le droit de retirer tout commentaire après publication, sans aviser le rédacteur dudit commentaire

Commentaires

Commenter

النشرة الإخبارية