alexametrics
آراء

2019: الموتى بش ينتخبوا !

مدّة القراءة : 3 دقيقة
2019: الموتى بش ينتخبوا !

 

 

أسبوع حافل كالعادة و العوايد و الله لا تقطعلنا عادة بالمهازل المدوية :

 

-  تصدّر خبر قتل محامي لسارق دخل دارو تقريبا كل الصحف و الإذاعات و ناس تحلل و ناس تناقش و ناس فرحانة و ناس تتشمت و رينا فيما رينا ناس و وجوه معروفة عادة ما تطربنا بخطاباتها الرنانة حول عقوبة الإعدام و لوبانة تطبيق القانون و الرجوع للقضاء تساند و الحال إنو مبدئيا لازم ننطلقوا من فكرة ساهلة إذا اليوم كل واحد يتظلم ولا يظلموه ياخذ حقو بيدو وحدو رانا نتحولوا من دولة القانون إلى دولمة يحكمها قانون الغابة  فلذا مالازمش نستغربوا إنو المحامي يتوقف و الأكيد إنو إذا عندو رخصة سلاح و ثبت إنو هو دافع على روحو فلا خوف عليه  أما لازم نوعاو إنو القانون فوق الجميع ( الي للأسف حاجة ولات تضحك التونسي) 

 

-  على المستوى الرياضي : هزيمة تشيّب الراس للمنتخب التونسي قدام نظيرو السينيغالي و ثانية قدام نظيرو النيجيري . زوز ماتشوات  التوانسة يدعيو فيهم بش يفرحوا و هوما الي الفرحة ما عرفوهاش توة أعوام ، وفاو كالعادة بالغلبة و القهرة . و الكيراتين مروحين و الأكيد إنو حال كورتنا ما يختلفش على حال أوضاعنا العامة في البلاد :  إذا عملنا حويجة باهية رانا بعدها محظرين مجموعة من النكسات الوحدة أتعس من أختها  . ياخسارة الطيارات و الرحلات إلي سخرّناهم و يا فرحة ما تمت . كيف العادة تعودنا و هذا بفضل قدرة الكائن البشري على التأقلم إنو نحولوا شوية خيبة الأمل بإننا علقنا آمالنا على المنتخب الجزائري آش خلّى الشاهد كيف عرضوا مواطن جزائري قالو " كيف تربحوا إنتوما كا إننا ربحنا نحنا " و نسمع بيها لين عشتها ، أنا و بقية التوانسة " عيش بالمنى يا كمّون" .

 

- ثمة طبيبة كتبت عبر صفحتها الفايسبوكية إنها قررت تغادر المستشفى و هي في قلبها حسرة كبيرة لأنو المريض الي تابع فيه و الي عمرو 40 سنة توفي 3 أشهر بعد ما إنقطع على شرب دواه ( Sintrom  )   و ما إنقطعش إراديا بما إنو هالدواء مقطوع . الطبيبة هاذي تأكد إنها إتصلت بكل المصالح المختصة من وزارة الصحة ( كارهم يردوها صحة و مصلحة )  للصيدلية المركزية و كان ردّهم على حجم الخراب و الدمار الشامل الي ألحقوه المرتزقة و الخونة و السياسيين الكناطرية بتونس " إيه عاد واشبيه " . عادي يموت تونسي عمرو 40 سنة خاطر دواء مقطوع و ينو العيب ؟؟؟ عادي جدا ! ثمة ما أهم يا دكتورة و يا توانسة يلي قهروكم مثلا تصويرة الغنوشي في خلعة خارج مالبحر و لا إعلانات الترشح للرئاسة الي ولاو في نسق يقرب لنسق الإعلانات الإشهارية وقت المسلسلات في رمضان . عادي تموتوا خاطر ما ثماش دواء ياخي موش الشاهد قال بش نقضيو على الفقر ؟؟ كيفاش بش نقضيو على الفقر بالقضاء على الفقراء الي تضطرهم الحياة إنهم يداويو في المستشفيات العمومية . لوكان جينا نعيشوا في دولة تحترم نفسها حالة من هالنوع كانت كافية لطرد و محاسبة عدة مسؤولين و دفع تعويضات لعايلة الضحية  ولّى خلينا نقولوا ضحايا. و الأدهى و الأمر إنو الأسبوع هذا كانت السيدة وزيرة الصحة مدعوة لجلسة مسائلة أمام مجلس نواب الشعب ، رفعت الجلسة 5 دقايق تقريبا بعد وصول سنية  بالشيخ و السبب هو عدم إكتمال النصاب و غياب النواب. مجلس نواب الشعب هذا في تشكيلتو الحالية و في أدائو الحالي الحقيقة يتطلب إنو العالم ياقف و إنو كل الخبراء في جميع المجالات من جميع أنحاء الكرة الأرضية يجيو لباردو بش ينكبوا على دراسة الكائنات الموجودة داخل قبة باردو علنا نفهموا الداء الي أصاب تونس و نلقاولو حل و لو إنو الحل واضح لكن نحتفظ بيه لنفسى بش ما نوليش كيفي كيف الغير "ثورجية ".

- الحرب الداخلية في حزب الإخوان المسلمين "النهضة" : بعد ما توافقوا و عينوا رؤساء القايمات للانتخابات التشريعية : الغنوشي قال لا لوجوه معروفة للنهضة كيفما عبد اللطيف المكي و عبد الحميد الجلاصي و قامت القيامة و توجهوا بعض القيادات النهضوية للإعلام و دعاو أبناء الحركة للضغط على المكتب التنفيذي و إلخ : حاجتين يا نحنا ظالمينهم و هوما ديمقراطيين بلحق و يؤمنوا بالديمقراطية و الغنوشي دكتاتور ، يا هوما ظالمينا كيف يحبوا يقنعونا إنو ثمة صراع داخل النهضة .  إلي يدخل للنهضة عبارة دخل بيت الطاعة و ماعليه, كيفما فكرهم بهذا علي العريض إنو ينحني لقرارات الشيخ الغنوشي, الي قرّر حسب التغييرات الي أجراها إنو يوسع المساحة الجغرافية لربح النهضة و هكاكة ماعادش نقولوا إنو النهضة تربح في الجنوب التونسي و في المناطق المهمشة (خذا العبرة من خسارة أردوغان في إسطنبول ). الغنوشي يحب يربح هو وحزبو في مدن عادة ماكانت معادية للنهضة في نتائج الانتخابات الفايتة الكل : بعدّلنا وجوه وأصوات ولات تعمللنا الحكاك ، حط وجوه قادرة على تجميع القواعد النهضوية و المتعاطفين معاها : بدل متحجبة بغير متحجبة  وهات من هاك اللاوي. في واقع الأمر حرب النهضة ما تعنيليش لأني شبه متأكدة إنو المكي و الجلاصي و غيرهم في الأخير بش ينضبطوا لقرارت شيخهم إلي يهمني : وفاتش الحرب  بين الوطد و حزب العمال ؟؟؟ قدروش الحداثيين التقدميين يقدموا في إمكانية قايمات موحدة لكنس الإخوان ؟؟؟ بداوش أحزابهم يحضروا في قايماتهم و يعطيونا في أسامي ؟؟؟ ما سمعتش يمكن سقيفتي طوالت أما ما سمعتش !!!

 

كان هاذي ومضة عن أسبوع حافل كالعادة و العوايد و الله لا تقطعلنا عادة بالمهازل المدوية ،  أما دعوة لوزارة الصحة و الصيدلية المركزية ركزولنا في الدوايات متع الدم و القلب و السكر ... على هالمعدّل بش ينتخبوا الموتى ( و لو إنو في بلد العجايب صارت ).

تعليقك

(x) المدخلات المطلوبة

شروط الإستعمال

Les commentaires sont envoyés par les lecteurs de Business News et ne reflètent pas l'opinion de la rédaction. La publication des commentaires se fait 7j/7 entre 8h et 22h. Les commentaires postés après 22h sont publiés le lendemain.

Aucun commentaire jugé contraire aux lois tunisiennes ou contraire aux règles de modération de Business News ne sera publié.

Business News se réserve le droit de retirer tout commentaire après publication, sans aviser le rédacteur dudit commentaire

Commentaires

Commenter

تقرؤون أيضا

03 جانفي 2022 16:04
0
30 ديسمبر 2021 16:29
0
27 ديسمبر 2021 17:00
0