و أخيرا أتت

25 جويلية 2021 : الشعب التونسي المقموع . الشعب التونسي المفقّر . الشعب التونسي المهمّش . الشعب التونسي المقتول عمدا من قبل حكومات  جابت لاكريموجان و ماجبتش الأوكسيجان لمرضى الكورونا خرج بالآلاف في كل جهات و مدن تونس بش يوقّف مهزلة دامت أشهرة بحكومة شطر وزرتها بالنيابة و برئيس حكومة واضح إنو ولّى لعبة في يد الأغلبية الحاكمة .

ساعات قبل عيد الجمهورية :

يظهرلي ضروري إننا نتفكروا شنوة الوضع الي كانت عليه تونس ساعات قبل و أيامات قبل عيد الجمهورية : أرقام قياسية لموتى الكورونا . نقص حاد في الأكسيجين في جميع المستشفيات . طبة و طاقم طبي على حافة الإنهيار. جثث الموتى في السبيطارات مكدسة على بعضها . بعد ما سمعو إنو ثمة سخط  شعبي و نية للتحرك في عيد الجمهورية : اعتقالات لبعض المدونين و هرسلة للبعض الآخر . مجلس نواب شعب يكتب و يملّس و يعمل فيه مرشد الإخوان فرع تونس في شاطح باطح بإسم الإجراء ا ت الإستثنائية . و في خضم هذا الكل رئيس حكومة  و الي قاعد من وزرتو في نزل في حمامات يفطروا و يسكروا على البيسين .  و بش يغطي الفضيحة في ظرف دقيق يقرر إنو يقيل وزير الصحة الي هو بيدو خذا قرار في ليلة وضحاها إنو يحل مراكز تلاقيح للشباب و هذا إلي تسبب في خلق حالة فوضى رهيبة . و  في هذا الكلّ يخرج عبد الكريم الهاروني مطالبا بالتعويضات قبل 25 جويلية . تعويضات صندوق الكرامة و إلا قالك فشباب النهضة موش بش يسكت . و  في الواقع التصريح هذا كان القطرة الي فيضت الكأس . أكهو وخّر وخّر ظهر الشعب الي ركبوا عليه وفى و 25 جويلية هبط الشباب أما موش شباب النهضة : الشباب التونسي .

عيد الجمهورية :

في العشرية السوداء ستانسنا بالتجييش على فايسبوك : آلاف تلقاها تبدي في إستعدادها  للتحرك و في الشارع نهبطوا كعبتين و كعبة . يوم عيد الجمهورية قمنا نتصور الكل بغصة و خوف إنو يكون يوم عادي و إنو الشعب ما يهبطش للشارع لكنس منظومة فاسدة مالحاكم للحكومة . و الحقيقة كان العكس تماما و أول الصور الي وصلتنا كانت المسيرة التاريخية في سوسة و من بعد توزر و من بعد صفاقس و أحواز مجلس باردو و الكاف و باجة و جندوبة . كل الجهات تحركت  وخرجت للشارع و المرة هاذي موحدة شعاراتها و عارفة مليح العدوّ: حركة النهضة و رينا مشاهد عنف و حرق مقرات النهضة . سخانة تنقب الرأس . كورونا عايثة فسادا في شعب حتى من تغذيتو في السنين الأخيرة تقهقرت مما أثر على مناعتو و لكن الناس هبطت و تحدات حتى التهديدات الأمنية لسيء الذكر المشيشي.  مسيرات تاريخية و حركة ماصارتش قبل من مواطنين و مواطنات تعبوا و تهدّوا  . مواطنين و مواطنات غير متحزبين في أغلبهم و عندهم إنتماء وحيد : تونس . و نحنا هكاكة و الشبيبة تحظر لمسيرات و إحتجاجات ليلية . يحصل ما لم يكن في الحسبان . أتت و أتت في أونها :  تفعيل الفصل 80 من دستور الجمهورية التونسية و تجميد مجلس نهاب الشعب و رفع الحصانة . النتيجة ؟ آلاف التوانسة في الشارع مساندة للقرارات هاذي و لقيس سعيد و فرحة على غمة انزاحت على قلوبهم . 

بعد عيد الجمهورية :

 حزمة من القرارت و الإقالات . تطمينات على الحريات . ماراطون مقابلات مع المنظمات و الجمعيات الوطنية . مواقف شبه مساندة من كافة الدول مع التذكير بضرورة إحترام الدستور و المؤسسات .  بعد 25 جويلية بالنسبة ليا ماهوش قيس سعيد و إنما القضاء التونسي . القضاء التونسي الي ملف بشير العكرمي القاضي المتستر على أكثر من 6000 ملف إرهابي فضحوا و لّى واضح إنو قضاء غير مستقل رغما محاولات و صمود بعض القضاة الشرفاء فيه . النهضة  التلميذ النجيب لبن علي فهموا مليح إنهم مستحيل يبسطوا نفوذهم و يعديوا مشروعهم الإخواني الرجعي رغم أنف الجميع إلا بالقضاء . القضاء إلي يرقدّ القضايا و الي يتلف وثائق و الي يخبي تقارير و الي يسرّع وقت ما يحب إنت و المشتكى به . و رينا ناس تدخل و تخرج بالفلس و بعد التصريحات . آش قالك آش قال عليك شادين دوسيات عليهم . باهي و نحنا المواطنين و المواطنات الي حياتنا تحوّلت لجحيم يومي شنوة ذنبنا ؟ فاش غلطنا ؟ غلطنا في كوننا وقت الثورة حبينا القضاء التونسي يسترجع عافيتو و رفضنا تماما المحاكمات الشعبية ؟ ذنبنا إنا كنا مؤمنين بدولة القانون و المؤسسات ؟ ما بعد 25 جويلية لازم تكون مرحلة تطبيق القانون على الجميع و الي عندو دوسي وقيت يخرج و يتحاسب عليه . خارج قضاء متسقل و قضاة مستقلين هذا الكل مجرد زوبعة في فنجان .