اشربوا ماء البحر : يعدي التعيينات !

شربتوا من ماء البحر ؟ آه نسيت رمضان : صايمين ! علاش التوانسة و العرب بصفة عامة ما نصوموا كان عالماكلة ؟؟؟ علاش ما نصوموش مثلا على السرقة و النهب و الفساد و الكذب و التكمبين ؟ إيماننا لازموا تنمية بشرية يظهرلي  !علاش ماء البحر يقول قايل !؟ السيدة النائبة المحترمة الي المواطنين التوانسة الكل ( موش كان المواطنين الي صوتولها) يخلصولها في شهريتها جميلة الكسيكسي قالتلنا اشربوا ماء البحر !!! عرفتوها جميلة الكسيكسي ؟ النائبة الفاضلة الي أول ما بدى المجلس يخدم نعتت عبير موسي بالكلوشارة و قيمت كالحبورة الي كلات يظهرلي جمعتين و لا ثلاثة و صار فيها إعتصام الحزب الدستوري الحر .

الكسيسكسي عادت إلينا من جديد بعد التعيينات الأخيرة الي تو نرجعولها من بعد و قالتلنا هاذوكم كفاءة و طنية و إذا موش عاجبكم اشربوا ماء البحر.

السيد إلياس فخفاخ ، بعد ما أعلن إنو بش يقتطع من أجورنا المقطوعة خلقي و بعد ما الإقتطاع مسّ حتى المتقاعدين ، قام عين  أسامة بن سالم ( قيادي بحزب حركة النهضة وصاحب قناة تلفزية غير مرخصة) وعماد الحمامي (قيادي بحركة النهضة ووزير صحة أسبق) في خطة مستشارين لدى رئيس الحكومة.

عماد الحمامي من غير ما نحكيلكم عليه  تعرفوا إنجازاتو و تعرفوا حالة الفوضي الي عاشتها وزارة الصحة  بمخلتف هياكلها وقت ما شدها . أما القوة و الإبداع و الحوكمة الرشيدة و مقاومة الفساد و كالشعارات الي ولاّو يضحكوا و يبكيو فرد وقت يتجلاو في تعيين  أسامة بن سالم. السيد مؤسس أول قناة غير قانونية مجهولة التمويل بشهادة البنك المركزي مستشار لدى حكومة الإصلاح والشفافية. باظت يا جدعان . من غير عاد ما نحكيو على مواقفو السياسية و الايديولوجية الي عاطيين بظهرهم للحريات و للقوانين و للدولة المدنية .

الناس كيف سمعوا بالتعيينات تصدموا و أصابهم الذهول مالأول و بعد الكلها قتلك :" رجعولنا فلوسنا !!!  و ما تمسوش شهارينا" ! عادي جدا . لكن تواصل جميلة كسيكسي و من معها و من مثلها ( لأنهم الحقيقة من طينة أخرى) قتلك وشبيه هذا مشكل التراخيص و القنوات لازم نحكيو فيه و حتى الهايكا نحكيو فيها ! إيه علاش لا نحكيوش في حاجة أخرى ؟ مثلا، إنو تونس اليوم يحكموها ناس احترفوا التبوريب و الإعتداء على الإرادة الشعبية ! لدرجة إنو عبد يتسائل علاش خسارة الميت و خسارة الكفن ! علاش كل انتخابات الناس تحرق أعصابها و الدنيا تاقف إذا رئيس الحكومة جايب صفر فاصل في الانتخابات و اذا النهضة تتلهوث كل مرة بالقوة على كل المناصب ؟ و الياس فخفاخ الي يقنع في الشعب التونسي انو لازمو يضحي و يمد من شهريتو بش يعاون تونس في الحرب موش كان بدى بحكومتو كان أنفع ؟؟؟؟ هل يعقل اليوم إنو حكومات في بعض الدول شعوبها قدنا مرتين و ثلاثة عندهم حكومات فيهم 16 وزير و نحنا عندنا 32 وزير بخلاف الي برتبة الوزرة !! أكبر وأحلى حوكمة رشيدة !

بعد '' ڨلب الذيب " و"النوبة" تتابعون حصريا مسلسل التعيينات من القصبة . تعيينات ظاهرة عيناني في إطار المحاصصة و المحاباة  : رضيني تو نرضيك ! عينلي جماعتي و تو نريڨلك أمورك !  و هذا بخلاف التعيينات الاخرى في مناصب ماهياش مسلطة عليها برشة الأضواء !!!

احساس المواطنين التوانسة و أنا منهم  ينطبق عليه المثل التونسي " غيب يا ڨطّ ، ألعب يا فار" . حصروا الشعب في الحجر الصحي و إنطلقوا في التعيينات و في الصفقات و الإتفاقيات  المهزلة الي يحبوا بيها البلاد لتركيا وقطر . أما هذا موضوع آخر لازمو كرونيك كاملة .

المؤسف الحقيقة في الوضعية ، هي التواطؤ متع الاحزاب الي في الحكم و الي تحالفت مع النهضة و الي من توة لازمها تعرف إنو هالحكومة في ذهن الشعب ساقطة و مالها إلا مسألة وقت و هوما للاسف بش يسقطوا معاها كيفما نداء تونس قبل.