الكثرة و قلة البركة

كنت نتصوّر الّي وقت يجدّ الجدّ . وقت نحسّو و نراو في بلادنا  تعيش في سقوط لامتناهي بش نحشموا على أرواحنا و نراجعوا مواقفنا و  ناقفوا و نقيموا . أما هيهات : مع الأناوات المريضة و الزعامات الفالصو على بلاتوات التلافز و شبه الثورية الي خلات الناس الكلّ تعاملت و باركت و نظفت أسقط الأطراف السياسية ماعادش ثمة حتى أمل إنو يجي كالنهار الي الناس تتلمّ فيه بش تواجه موحدة العدو.

إلي صار في الفترة الأخيرة من عنف و من تدهور خطير للوضع السياسي و الإقتصادي و المهزلة المتعلقة بالميزانية و قانونها أكدلنا إنو اليوم مستحيل نصنعوا الجديد بنفس المسامر المصددة و الوجوه القديمة و الاصوات المزعجة الي تخرج كيف غربان الشؤم تبكي و تولول على تونس و كأنهم خاطيهم و ما حكموش و ماساهموش في دعم منظومة الحكم كل من موقعه .

الحقيقة شخصيا ، كنت من الناس الي دعات و مازالت تدعو كل المواطنات و المواطنين الي يحبوا البلاد إنهم يخرجوا على صمتهم المقيت و يحاولوا يعطيو برايهم في شوارع بلادهم الي تفكّت منهم من طرف عصابات سياسية و مالية و اقتصادية و "جمعياتية" تخدم في تنسيق ممنهج و واضح . لكن ما يروعني إلاّ إنو كيف العادة و العوايد و الله تقطلعهم كل العوايد ؛ الدعوة للتظاهر ولاّت عشرات الدعوات . الدعوة للحوار أو بالأحرى للحمار ولاّت دعوات . الدعوة للتفكير ولاّو دعوات : نفس الأسلوب و الممارسات . نفس الدناءة . نفس المقاربة. نفس المنهج . نفس الاستراتيجيا لبلاد ماشية و تتحوّل تدريجيا لزريبة ولو إني أعتبر الحيوانات أكثر إنسانية من بعض الوحوش الآدمية .

دوب ما لحمت في المجلس بعد تصريحات العفاس و العنف الي تمارس تحت قبة البرلمان ، انطلقت مبادارات مواطنية و جمعياتية للتظاهر حول حقوق المرأة التونسية و منزلتها و كرامتها . و ما يروعني إلا اني قريت في بعض الرسائل الي وصلتني على الخاص و الي زادة تم نشرها للعموم : بعض الدعوات " الكلاندو" ، "السكريتو" شقالك آش قال عليك ؟؟؟ بش ما ما يحضروش التجمعيات و ما يجيوش اليساريات و بش يغيبوا النسويات : كل واحد يقلك منّي تخلق !!!! نفس السكتارية . نفس الدغمائية . نفس العقم الفكري و السياسي الي خلّى اليوم أكبر و أعرق المنظمات قابلة للاندثار باندثار من ينشط و يحكم فيها منذ عقود. نقاوة ثورية ؟ ثمة ناس تنجّم تحشم أما شخصيا أنا ما نحشمش : نفضّل نحط يدي في يدّ تجمعي و دستوري قدّم نقدو الذاتي و قال إنو أخطأ و ميسالش خلي تكون عندو مقاربتو للوقائع التاريخية اما وطني ، يؤمن بتونس و بدستورها و بمدنيتها و بدرابوها على  واحد منتمي لحزب همّو الوحيد إلحاق تونس بالأمة الاسلامية و تطبيق شرع الله . ثمّ يا أخي قولولنا و فسرولنا موش إنتوما توة عشرة سنين نفختولنا قلوبنا  بحكاية الديمقراطية و الشرعية و الإحتكام للصندوق ؟ إذا حزب ممتثل للقوانين و لا يدعو للعنف و يؤمن بمدنية الدولة تنجموا تفسرولنا علاش تعتبروا مناضليه و مناضلاتو مواطنين درجة ثانية و تعتبروا أنفسكم وكلاء على بعض القضايا دون غيركم  ؟ ميسالش ما تجابونيش . نعرف إنو التاريخ الأظلم و الحاضر الظالم و المستقبل المظلم فيهم الأجوبة الكلّ و إنو بش يجي النهار للأسف وين بش توصل الزنقة بالهارب و إنو الحقيقة بش تكون بمثابة  تصادم كوكب آخر بالأرض كيفما الّي قضى على الديناصورات . و بش نكون ايجابية و بش ما نفقدش الڨرام أمل الي يخليني نجم نواصل الحرب ضد الجهل و البهامة خليني نقول ميسالش هوكة نهار بنهار : نهار للثوريين و الثوريات و المناضلين و المناضلات الي سيرتهم الذاتية أنظف مالنظافة ، الي يعتبروا أنفسهم فوق الجميع بإسم تاريخهم النضالي و نهار لبقية الشعب : الي يراو فيه رعاع و ما يمتلكش القدرات بش يختار و يتباع و يتشرى المهمّ الهدف واحد : تونس دولة مدنية و ديمقراطية يحلو فيها العيش للجميع إلا لأعداءها .

اما لا :ما يكفيش . ماناش مقسومين بما فيه الكفاية . لازم نزيدوا نقسموا حتى التحركات الشعبية . لازم نفتفتوا أي نفس تحرري و مدني و ديمقراطي في الشارع . كيفاش ؟؟؟ صارت مبادرات و دعوات مواطنية للتحرك في الشارع و بالأحرى في ساحة باردو : تجي بعض المنظمات تدعو لتجمع يوم 18 ديسمبر . هوما و نحنا و إنتوما : هذا المنطق الجديد . شنية هالقداسة و بأي حق اليوم بعض المنظمات و التشكيلات السياسية تعطي لنفسها في حق إنها تكون فوق النقد و المحاسبة ؟ و بأنا حق اليوم كيف هوما يقولوا الي هذا الطرف داخل أو خارج المجموعة نطبسوا روسنا و نقولوا صدق الله العظيم ؟ و علاش طرف موش الآخر و خليني نكون واضحة : بأنا حق اليوم الاتحاد العام التونسي للشغل يدعو لحوار وطني يقرّر فيه إنو إئتلاف الكرامة ما يشاركش أما النهضة تشارك ! شكون الي وفّر الحماية و الغطاء السياسي تحت قبة البرلمان للعفاس و لمخلوف بش يعملوا الشاطح باطح الي صار ؟ و إذا غدوة قيس سعيد يقرّر مثلا إنو قلب تونس مايشاركش و لاخر يقرر إنو الدستوري الحر ما يشاركش :إيه شكون الي بش يتحاور و على شنوة ؟؟؟ الحوار عندو شرط أساسي : حب الوطن ... و اسمحولي و مع كامل احتراماتي و بعد ما استغليت شخصيا هالفضاء بش كل مرة نوجه التحذير تلو الآخر كيفما رئيسنا المفدى إنو الناس الفاعلة اليوم في المشهد السياسي و أسثتني 1% منهم كلهم موجودين فقط لمصالحهم الشخصية الضيقة بما فيها تلميع صورتهم و تكبير قاعدة المتابعين على قنواتهم ولا حساباتهم الفايسبوكية .

فلذا أدعو كل المواطنين و المواطنات الي يحبوا هالبلاد إنهم يفيقوا للمناورات الي قاعدة تصير تحت غطاء الحوار . كفاكم ضحكا و استهزاء بذكاء البعض منا : تحكموا عشرة سنين مع بعضكم و تكنتروا عشرة سنين في بعضكم و كيف تخربت البلاد اليوم تحبوا تلموا بعضكم و تعملوا حوار ؟؟؟؟ في الواقع لا : تحبوا تزيدوا تربحوا الوقت بش تزيدوا تعبّيو أكثر و مبروك عليكم دعواتكم و مبادراتكم  بالعشرات و بالميات : الكثرة و قلة البركة . على كل حال حسم أمر الحوار :سعيد قال لا، على الأقل على الطريقة الي تقدّم بيها. يزي مالحوار مع من يؤمن بالعنف و التكمبين.

الطوفان البشري جايينو للأسف و بش يهزّنا الكلّ و الشعب الي تحملّ بن علي و بورڨيبة نتصوّر عندو الطاقة انو يتحملّكم أما في عشرة سنين شفنا ـ و بشهادة الي عاشوا في الفترات الكل ـ الي ما شفاهوش أجيال  . في العشرية الماضية، تونس عاشت الي ما عاشتوش في خمسين سنة : نخليكم اذن تتفكروا وقت ما الشعب في الخمسين السنة الي فاتو ماعدا عشرة سنين ثورة انتفض شنوة عمل و نستدعيكم انكم تخدّموا خيالكم الضيق بش تتصوروا شنوة بش يصير فيكم إذا الشعب قرّر إنو يهبّ ... و هنيئا لكم وقتها بما أردتم.