حبيب الجملي ما لقاش نساء.

وين لوجت سي الحبيب؟

تونس فيها نساء، تشرف و تعرف. نساء تقرى و تخدم و تقدم و تبني.

تونس فيها نساء تملى وزارات و إدارات و قصورات.

تونس ولادة.

بنات تونس وقفولها وقت سكتت الغدارة.

نساء تونس هزولها راسها في المحافل.

نساء تونس موجودين في الوقت و غير الوقت.

تونس تعرف وين تلقانا سي الحبيب. تونس تعرف أحنا موجودين من غير ما تلوج علنا.

سي الحبيب، كلامك عيب. عيب عليك. موش علينا.

سي الحبيب، أنا، و برشا نساء كيفي، عطيت وقتي و جهدي و تعبي لتونس.

برشا نساء خدمت تونس في 10 سنين التالية. خدمنا البلاد. دافعنا عليها. بكينا علها. عملنا انتخابات. بنينا أحزاب. ضربنا على دستور. دفنا شهدانا. كلينا الضرب. صحنا في الشارع. جبنا رؤساء. نحينا حكومات.

صحيح، موش شادين الصف على كاس تاي. هانا باهتين في العجب، في قلة المعروف. خليناها واسعة و عريضة.

الي يحب على نساء تونس، يكون في بالو كاس وسع البال و السكات تعب. الي حاجتو بيا يتفضل يقنعني.

سي الحبيب، انت ما تعرفناش.

لكن شوارع تونس تعرفنا. جنازات تونس تعرفنا. شكري بلعيد يعرفنا. جبال تونس تعرفنا. حقول تونس تعرفنا. جامعات تونس تعرفنا. و معاملها. و ملاعبها. و صبيطاراتها. و محاكمها. و مسارحها. و جرايدها. و تلافزها.

علم تونس يعرفنا.

نساء تونس تعطي. و ما تاخو شي. موش على خاطر ما يستاهلوش. لا. على خاطر الدنيا غدارة. على خاطر فما ناس ما تحبش تلقانا.

أحنا لا عطينا لجال عباد و لا كذبنا.

أحنا نعطيو لتونس.

و يظهرلي يزي من ضياع الوقت و الجهد و الكلام. مع الناس الي حاسبتنا عسكر كردونة الكل. شكون؟ الي يخطبو علينا في الانتخابات، و يعيطولنا في التصاور، و يلقاونا في التعب، و ينساونا في الوسع و الراحة و الجاه. الجماعة الي يكتبولنا الشعر نهار 13 أوت، و ما يعيطولناش نهار أخذ القرار. جماعة نساء و نصف لكن نصف شنو؟ جماعة موش وقتو.

الجماعة الي ما لقاتش تونس فيهم الخير، موش باش نلقاوه أحنا.

شكون وقف اليوم و جاوبك على كلامك؟ شكون منهم؟

مانا إلا نساء.

النساء مقدمة في الصف و موخرة في الرتبة؟

يزي.

العيب عليك. و عليهم. و الغلطة منا. قعدنا نلوجو على الي ما ضاعش و ضيعنا رواحنا. الغلطة منا الي نسكتو. الغلطة منا الي مازلنا نسمعو كلامكم. الغلطة منا الي مازال يجد علينا الكذب. الغلطة منا الي مازلنا نستناو في حاجة منكم.

وقيت نلقاو رواحنا.