غابة كلابها ديابة

قمت اليوم الصباح  و أنا في رأسي هالأبيات:  "   غابة كلابها ديابة

نازلين في الناس هـم

واحنا يا ملح الغابة

هم يحرك هم

ضايعين وسط ديابة

مش فاضيين نهتم

فاهمين و نتغابى ..

مش راضيين نتلم

هم هم هم"   - احمدفؤادنجم

بصوت بعيد ما نعرفوش و ما سمعتوش قبل . صوت تقول خارج من تحت الأرض . الأرض إلي سقاتها حسب الأرقام الرسمية دموع  14000 عايلة  خسروا العزاز عليهم و الكلنا نعرفوا إلي الرقم هذا أكثر ببرشة.  في وقت كل دول العالم رجعت تقريبا تعيش بطريقة عادية . في وقت نحنا التوانسة الي مازال عندنا شوية زهر و كيف نروحوا لديارنا نلقاو الضو و الماء و نجموا نحلوا التلفزة وو نتفرجوا في أكبر المسابقات الرياضية و نراو ناس تعيش و تشرب و تاكل في الشارع و تشجع في فرقها الرياضية و يشطحوا و يعنقوا في بعضهم لأنّو دولهم و حكّامهم يحترموا شعوبهم و يخافوا من شعوبهم و يخافوا على شعوبهم . لأنو لوجيكمون بدون شعب ما ثماش حاكم . هذا الي يقولو العقل السليم . أما الواقع التونسي الي نعيشوا فيه حاليا نسف كل التحاليل العقلانية و الموضوعية و خلاّنا قدّام  الحالة الي الحقيقة نعجز في وصفها ولا حتى في تشخيصها  .

ثمة إجماع شبه كلي إنو المنظومة الصحية على وشك الإنهيار . مقارنة ببقية الدولة و عدد سكانها تونس تتسمى تعيش في كارثة صحية فعلية و دولة منكوبة . كيف تشوف التصاور الي توصلنا من مختلف المستشفيات الجهوية ما تنجم كان تحط يديك على رأسك و تسلّم أمرك لقوى الغيب كان بالطبيعة تؤمن بها . خاصة كيف تشوف في المقابل شنوة قاعد يصير :

في المقابل رئيس حكومة شعب منكوب بكل معاني الكلمة عندو 4 مدن كبرى تحت حجر صحي شامل . لقّح  كان لنصف مليون ( ما وصلنالهمش ) مواطن و قيد للتلقيح كان مليون و نصف .  رئيس حكومة دولة فيها إرهابي بدون جواز سفر يدخل لمطار تونس قرطاج و يخرج تحت حسّ مسّ و من غير حتى قلق و بالزهر يتم إيقافو خارج المطار . رئيس حكومة في وقت أكبر جائحة عرفتها الإنسانية حديثا ،الطبة و الإطار الطبي هاجين بالمئات للدول الغربية و ما نجموش نلوموا عليهم . رئيس حكومة في بلاد على حافة الإفلاس قايم الصباح . مسخر فلوس الدولة و ضرائب المواطنين بش يوجه لإذاعة مصادرة تمّ بيعها و مخصصّ تقريبا ساعة من وقتو بش يهنّي صحافيين على حق من المفروض مكتسب و على وضعية من المفروض راهي تحلت أشهر قليلة بعد الثورة و خارج في حوار إذاعي على غفلة مع حمزة البلومي بلاش ماسك ولا وقاية و يضحك فرحان وقتلي الشعب قاعد يموت على قارعة الطريق . مشهد أكثر قرف و رداءة و خيوبية مستحيل تنجم تشوفو العين و يخركوا شرذمة بش ما نقولش كلام أكبر يقلك ربحنا الحرية . 

في المقابل رئيس جمهورية كيف كيف بأموال الشعب المنكوب يهز روحو و يسافر لإيطاليا بش ياخذ دكتوراه شرفية  في القانون . و في مشهد شبه سريالي مواطنين رامينهم كيف الزبلة فوق المادات عاطينهم أوكسيجين من دبابز مصددة كان ما قتلتهمش كورونا تطيح عليهم دبوزة تقتلهم و الرئيس يدولش في إيطاليا . و زد على الغلبة غلبة أخرى : السيد رئيس الجمهورية التونسية عيط لصاحبو شهر رضا لينين عمل معاه قهيوة يظهرلي و عداهلنا على الصفحة الرسمية متع رئاسة الجمهورية آش قالك آش قال عليك يحكي معاه على الوضع في البلاد و الحوار و تشريك الشباب و مشروعو السياسي متع الأفقية . يعني ولات عادة علنية إنو كل مرة لامم تشكيلة و معدي فيديو عادة ما يكون فيها هو يتكلم و الي قدامو محنطين ساكتين يسمعوا فيه ناقص يطبسوا و يقولوا " سمعا وطاعة " . إي و الشعب يا سيدي الرئيس و الموتى و التلاقيح . علاش المساسية و علاش كل ما تصير موجة و تبدأ الناس تموت بالمئات وقتها تتحرك بش تجيبلنا طرف تلاقيح و ترجع تركش ؟ راهو 500 ألف جرعة ما يعملوا شيء ! راهو الشعب الي أقرّت الحجر و الي اليوم رجعت تعيش بطريقة شبه عادية لقحت بالملاين لشعوبها . إنت كنت مالناس الي خرقت الحجر الصحي و الي دعيت رئيس الحكومة إنو يراجع قرار الحجر و شنوة قدمت سايدتك للشعب ماعدا الغرف المظلمة و  الخطاب السياسي الارتجالي و المتشنج الي خلاك تخسر المعركة قدام شيخ الاخوان المسلمين . و لو كان في كلامك الشعب موافقك وقتاش بش تفيق إنو الطريقة الي تتعامل بيها خلات الناس زادت فقدت الأمل ؟؟  وقتاش بش تفهم سيادتك إنو اليوم تحب و لا تكره راك دخلت عالم السياسة و مطالب إنك تجيب نتائج للتوانسة ؟ ووقتاش سيادتك تفهما إنك وحدك بكالربع صلاحيات ماك بش تنجم تعمل شيء ولازمك حزام و أحزاب معاك ؟ و لازمك حتى دعم دولي ؟ ووقتاش تفهم الي تونس لازمها تشوف أسواق جديدة و شراكات جديدة و تنوع تعاملاتها  و ما نقتصروش على الاتحاد الاوروبي الي في هالمحنة سكر على روحو و تلهى بالدول الي تابعتو ؟

حسب ما نراو تونس على أبواب السيناريو الإيطالي إلي هزّ العالم عمناول و خاصة مع السلالة الهندية الي اليوم تدور .  أما تونس يحكموها كمشة انتهازيين و فاشلين  ، عندهم رقعة صحيحة تخليهم ما يحشموش كيف يخرجوا و يحكيولنا على مشاريع قوانين لازمها تتعدى بش نعلنوا حالة طوارئ صحية . تونس ماعادش لازمها قوانين لأنها ولات "غابة كلابها ديابة نازلين في الناس همّ "على رأي الفاجومي .