العضم موجود : رمضانكم مبروك !

أصعب الأحاسيس هو خيبة الأمل . شهر لتالي وقت بدى إنتشار الكورونا فيروس في العالم و وصل لتونس ، كنا كلنا أمل  في إنو العالم بش يتغير . و إنو ثمة موازين قوى إذا ما تقلبتش على الأقل تتعدّل . كنا مقتنعين إنّو العلاقات بين الدول ينجم يولى ركيزتها ماعدا الربح المفرط ، سعادة و كرامة الإنسان . لكن هيهات و بعد شهر و خاصة بعد إنتشار الوباء و إرتفاع عدد الضحايا في عدوة دول بان بالكاشف إنو التغيير إذا موش ممكن فإنو ينجم يكون سلبي و أثارو أتعس على البشرية .

لكن خلينا لاهين في أمورنا و شمدخلنا في العالم : نحنا مالنا و مالهم كيفما يقول المصري ! نحنا في تونس شنية أحوالنا . توة شهر بعد الحجر الصحي العام و القرارات الي خذاتها  الدولة التونسية للحد من إنتشار الوباء و مقارنة ببعض الدول نجموا نقولوا ( إذا الارقام صحيحة ) إنو تونس نڨزّتها و بينت رغم ضعف إمكانياتها المادية و حتى البشرية ( في قطاع الصحة خاصة) و رغم الأزمات الي ماعادش تتحسب ، إنها قادرة على حماية مواطنيها وإنقاذهم من أسوأ السيناريوات.  نجموا نقولوا إننا ربحنا معركة ، لكن هذا لا يعني إننا ربحنا الحرب ، خاصة كيف نشوفوا و نحللوا بعض الاحداث الوطنية المتعلقة بالأمن و حماية الحدود ولا بالعنف السياسي والموجه ضد المرأة ولا بمحاربة الفساد و المحتكرين و لا زادة بفرض إحترام القانون في تونس و زادة فيما يتعلق بتحضير ما بعد الحجر الصحي العام. الفخفاخ أعلمنا إنو بش يتم رفع الحصر تدريجيا و لليوم في جلسة مسائلة ولا حوار و لا كارهم يسميوهم جلسات سيدي حاضر يا شكاية : وزير النقل ماكانش قادر إنو يقدم و يوضح ستراتيجيا لسياسة النقل بأنواعو في تونس بعد الكورونا ... من الكثافة للتعقيم لغيرو !!!

الدول الي تنجم تقول انها مستقبلا ربحت حربها ضد الكورونا هي الدول الي بش تكون قادرة بعد العودة للحياة "العادية" إنها تمنع من الأزمات الإقتصادية و الإجتماعية الي يستناو. لكن نحنا قادرين على هذا ؟ الحقيقة كيف نشوفوا كيفاش  وسط الجمعة تمّ إختراق معبر راس جدير و كيفاش دخلولنا في دريجين لعب العشرات من التوانسة بصراحة نتسائلو . إذا هاذم كانوا عالقين في الحدود علاش ما تمش السماح بدخولهم بعد الثتبت من هوياتهم و الي أمورو واضحة يمشي 14 يوم حجر و الي أمورو موش واضحة كيف كيف 14 يوم حجر صحي في الإيقاف . لكن فيسع ما عرفنا الي حبوا يخترقوا الحدود التونسية و يدخللوا شكون بشعاراتهم و بالكلام و السب و الشتيمة الي توجهوا بيها لتونس و رئيسها و شعبها.

لكن على المعدّل و علّي نراو فيه توة يا ذنوبي كان بش نربحوا حاجة ماعدا الي ربحناه 9 سنين الي فاتوا : الهمّ و الغمّ ! فرحنا توة جمعتين على رقمنة ليستة فيها العايلات المعوزة و الناس الأكثر إحتياجا و نحنا هكاكة تنطلق مرة أخرى فضيحة و مهزلة قالك ثمة 4000 موظف  تمتعوا بالإعانات و هوما يخدموا موظفين و أمورهم هانية . المصيبة إنو حمدوالله في هال 4000 ثمة 5 % و يمكن أقلّ هوما الي طلبوا الدولة و قالولها "ايجا هز متاعك رانا ماناش مستحقين" قبل ما تفيق بالطبيعة وزارة الشؤون الإجتماعية . حادثة في الواقع فضيحة تلخص الوضعية المزرية الي تعيش فيها الإدارة التونسية و بالتالي دولتنا. المؤسف إنو الحكاية هاذي كيف العادة بش يتجندلها الإعلام التونسي أسبوع على أقصى تقدير و كيف العادة بش تدخل طي النساين كيفما حادثة السيارة الادارية الي فرشختها بنت الوزير و كيفما الهبة الصينية و كيفما أحداث الرش في سليانة و كيفما أحداث 09 أفريل و كيفما الإعتداء على الإتحاد العام التونسي للشغل و كيفما حكاية الأمن الموازي و كيفما حكاية إغتيال البراهمي و بلعيد و الليستة وحدها يلزمها مساحة الكرونيك مرتين . و الي إعتادو على نهب أموال التوانسة و ضرب أركان الادارة و الدولة التونسية واعين إنو هالشعب العظيم الذي أبهر العالم بش ينسى . و بش يغطس في التفاهات المعتادة و العركات الفارغة كيفما ثمة عضم لرمضان ولا لا ، الرؤية لازمة ولا لا ، ڨلب الذيب في المحاكم ، النوبة موش في يوتيوب و غيره من أمهات القضايا الي يساهموا في بناء حاضر تونس و مستقبلها !!!!

و كأنو مأساة ما تكفيش لازم نزيدوا : و لعلها أعظم و أكبر مأساة عرفها الشعب التونسي من 14 جانفي 2011. مهزلة ما يسمى بمجلس نواب الشعب . مستوى و إنحطاط يأكدولنا إنا وصلنا للقاع و باقي نحفروا. كيف العادة العركات لا تبقى في مستوى الأفكار و لا نقد الحجج بالعقل و الأرقام و إنما بالسبان و كيف العادة يتكتلوا كل الأحزاب الكرطونية ، البودورو ، الي يستناو في رضاية سيدهم الشيخ على النائبة عبير موسي . و درجة القباحة ماشية و تطلع و أنا متأكدة إنها بش توصل لعنف مادي عواقبو وخيمة . نجموا نختلفوا مع عبير موسي لكن إختلافنا ما يلزمش يعمينا على إنو بعض الممارسات اليوم تستحق ضغط شعبي بش النواب أمثال اللومي و مخلوف و عفاس يتحاسبوا بالقانون  و تتنزع عليهم صفة " النائب المحترم" الي تتفنن السيدة رئيسة المجلس سميرة الشواشي في نطقها . المؤسف انو هالمشاهد عن وعي و لا عن غير وعي بش تزيد تساهم في عزوف المرأة التونسية عن النشاط السياسي و تخلي هكاكة كان المرتزقة و المتملقين يطلعوا لمجلس ولّى اليوم أكثر من أي وقت مضى يمثل الفشل الذريع للتجربة الديمقراطية في تونس .

هذا الكل نتصور موش مهم : المهم العضم موجود! الملسوقة موجودة ! ثمة مسلسلات ! ثمة دجاج و لحم .... المهم كولوا و أرقدوا و رمضانكم مبروك !!!!