مرناق : انتحار شاب بعد حجز عربته المتجولة

 أقدم شاب يبلغ من العمر 25 سنة يدعى محمّد أمين الدريدي، على الانتحار اليوم السبت 24 سبتمبر 2022 بالمرناق ، و ذلك بعد حجز عربته المتجولة من قبل اعوان التراتيب البلدية . و شهدت منطقة المرناق حالة من ذلك الحين حالة من الاحتقان و الاستنفار على خلفية انتحار الشاب . 

و كتب الصحفي وليد الماجري وهو شهاد عبان على الحادثة " 

بش نحكيلكم على قصّة الظلم الّي وصّلت شاب عمرو 25 سنة للانتحار توّة في مرناق .

محمّد أمين الدريدي، شاب في مقتبل العمر، 25 سنة فقط، زوّالي من عايلة خبزيست. محمد أمين يخدم دهّان، صانع بنّاي، صانع نجّار (...) أيّ حاجة ينطّر بيها الفرنك يخدمها وما يعيفهاش.

أغلب صحابو ركبو الشقف وحرقو للطليان آما هو اختار الجمعة الّي فاتت انّو يمشي للسّوق متاع مرناق (ديجا حومتو هاذيكا) وعمل نصبة صغيرة يبيع فيها في زوز صنادق عنب وخوخ باش يطيّر الفرنك.

جماعة أعوان التراتيب البلدية يخلّيوه يخدم عادي من غير ما يكرّهوه في حياتو؟؟ يجي منّو هو ؟ كيفاش ياخي الدّنيا مسيّبة؟ ماو لاباس تبيع في صندوق عنب؟ ويني الرخصة متاعك؟؟؟

بالطّبيعة ثمّة 200 نصبة على طول الشارع الّي يشقّ السوق لا عندهم رخصة ولا والو ولا يدور بيهم حدّ ولا يكلّمهم حدّ، أما مادام محمد أمين جاء  للسوق جديد لازم نمرّرولو عيشتو بالمحاضر والخطايا الّي سومهم أغلى من سوم الزّوز صنادق غلّة الّي بيع فيهم أصلا.

باختصار شديد، اليوم الصباح، السبت 24 سبتمبر، مشى محمد أمين كالعادة يخدم على روحو، حطّ النصبة متاعو في آخر السوق باش يبعد عالمشاكل، هبطو عليه جماعة التراتيب كالعادة كي غربان الدم، حجزولو البسكولة ومنعوه مالعمل. من قوّة الصدمة هزّ روحو ومشى للدّار علّق كوردة في الثريّا وشنق روحو بعد نصّ ساعة فقط من واقعة حجز البسكولة ". 

ر.ع