نعلنوا الموت السريري للقطاع العمومي?

أية شنية الأحوال ؟ شنوة عامل فيكم الحجر ؟ هبلتوا ولا مازلتو ؟ في كل الحالات ... أنا موش بعيد. أنا كيفما برشة توانسة الي ندافعوا على دولة القانون ، سمعنا الكلام و طبقنا تعليم وزير الصحة و الرئيس و الخ. و شدينا ديارنا لين ديارنا قريب هيا تخرج و تخلينا . أما نحنا يظهرلي طلعنا شوية .

نتفرج كيفي كيف برشة تحت هول الصدمة في فيديوات و تصاور و شهادات بعض الناس على التوانسة كيفاش شادين ديارهم !!! كياسات معبية و  في باب دزيرة النصابة رجعوا و الحوم تغلي : ولاد الحومة راكشين قدام القهوة المسكرة و النساء تتلم في المارشي و في الديار و تبارك الله حجر أمورو عال العال. أول جمعة في أفريل ، رينا مشاهد مرعبة من قدام مراكز البريد و المعتمديات و الناس الكل بدات تعيط و رينا وزير يبكي ... و رينا مادام نصاف بن علية تعيط و رينا وزير الداخلية يتهدد و يتوعد في الي موش بش يحترموا القانون و رينا دوريات أمنية على الكياسات الكبيرة و كراهب تفكت و باڨات تدور باقي في الكياسات الكبيرة .... و بالزهر في البلايص الي موش لازمها برشة مراقبة, وقتلي الحياة تستمر عادية في بلايص أخرى تحت أنظار الأمنيين . و رينا زادة تدشين مسلك صحي في صبيطار سهلول في سوسة مخصص للكورونا فيروس : من قوة الصدمة نسينا الفرحة ! حلفوا علينا في هالبلاد كل شي منكد ! تدشين فيه حضبة قريبة المياة عبد فوق بعضهم ، فيهم الي لابس ماسك و فيهم الي لا!  يدوروا مع بعضهم ، كونفة ، تقول خارجين في مسيرة و منهم كيف تخطفو كاميرا ينحي الماسك الصحي و يتبسم !

لقد بلغ شعبنا درجة من الوعي تحبس المخ ! في الواقع المشاهد هاذي تنجم تخلينا نعملوا إستنتاج و نطرحوا سؤال !

الإستنتاج إنو مصداقية الي يحكموا تعادل الصفر و هي السبب في ضعف الدولة. و اذا الناس قاعدة تدور و تحوس و ماهياش تحترم في الحجر : علاش ما نرفعوش الحجر الصحي ، خلينا نمنعوا ما تيسر من الإقتصاد و خاصة نمنعوا رواحنا من هبلة مؤكدة و خلي الطبيعة تلعب دورها !؟ 

 بعد تقريب شهر من الحجر ، تأكد أكثر من أي وقت مضى إنو أزمة تونس هي في حكامها . حكامها الي الشعب اليوم يغزرلهم بإحتقار و مقتنع إنهم إذا وصلوا للسلطة موش حبا فيه و لا تونس و إنما حبا في السلطة و الي تجيبوا في ثنيتها.  صحيح الناس يقلك الحكومة عندها شهر و خلطت عليها الكورونا أما برشة في الحكومة عندهم أعوام في الحكم و يعرفوا واقع البلاد يعرفوا وين هربت بينا . نفس الناس هاذم الي يعملوا ندوة صحفية بش يقولوا لا مجال لخرق القانون و من بعد لا يطبقوا الي قالوه و لا يراجعوا موقفهم و الأتعس من هذا الكل كوما بيدهم يخرقوا الترتيبات الي حطوها .  

و نحنا هكاكة ، يجينا الجواب ! المشكل لا هو في شعب، لا في حكومة ، لا في قانون ، لا في هذا الكل ... المشكل يا سادة مادة و نشكروها على هذا ! المشكل و أخيرا وراتهولنا التلفزة الوطنية التربوية في تعاون مع وزارة التربية .

أعلنت وزارة في بادرة طيبة إنها بش تتدارك دروس تلامذة الي في الحجر عبر دروس بش تتقدم في تلفزة مخصصة للغرض . كانت بادرة طيبة لين شفنا مستوى الأساتذة و المعلمين و لا على الأقل جزء منهم الي نحنا نعرفوا هو كبير في الواقع.

مستوى اللغة وحدو كفيل بش يفسر إنو في هالعشرين سنة لخرانين عملنا تنڨيزة بالتوالي حاجة يظهرلي ميات السنوات بش نصلحوها . الأساتذة الي ولاو اليوم نكت و تفريكة في فايسبوك كيفاش تم اختيارهم ؟ صار كاستينغ ؟ المتفقدين اختاروا أحسن ما ثمة . الله أعلم أما الي نعرفوه إنو مصيبة تونس العظمي هي تدهور المستوى التعليمي.

زعمة النقابات  متع التعليمين الثانوي و العالي كيف يراو المهازل هذيكة ، يخمموا في  إجتماع حتى عن بعد و يخمموا كيفاش يرسكلوا أساتذتهم ؟ زعمة نحشموا على رواحنا و نخمموا بعد 10 سنين خراب نصلحوا الجامعة التونسية و التعليم في تونس ؟ زعمة نجموا نفسروا للأساتذة إنو خدمتكم على الدروس الي تقريوهم للطلبة و إنما يشمل زادة مرافقتهم في نقاط ضعفهم و تنمية مهاراتهم كيفما قاعد يصير في التعليم الخاص ؟؟؟ زعمة موش وقيت نعلنوا الموت السريري للقطاع العمومي ؟ و حاجتين يا نعملوا اللازم بش يمنع يا للأسف نسكروا المكينات و نخليوه يرتاح للأبد !

ما تنساوش شدوا دياركم الصعيب تعدى مازال رمضان في الحجر كهو !!!