alexametrics
آراء

وداعا بجبوج

مدّة القراءة : 2 دقيقة
وداعا بجبوج

 

طول عمري، في قلبي، كانت عندي بلاصة خاصة للعزايز . خبرتهم تحكي و بكلام مطروز من ذهب . و تحسهم عندهم القدرة إنهم يطمنوك و يهونوا عليك أي لحظة : يمكن هذا علاش كيف برشة توانسة حبينا الباجي قايد السبسي. هذا يبقى في جانب ذاتي و خاص. لكن كيف نتفكروا الفترة الي ظهر فيها الباجي قايد السبسي و الذيوبة و الحنوشة و الضبوعة الي دايرة بتونس ، تونس الجمهورية المدنية ، يستناو فيها تبرك بش ينهشوها ، نتفكروا الدور الي لعبوا الباجي قايد السبسي في التوحيد و في خلق فضاء للحوار و خاصة و هذا الأهم في نظري وقتها : في خلق عدو جدي و قوي للنهضة إلي بعد سنوات راحة و إستجمام في بلدان  الغرب الكافر ، رجعوا مشمرين على ذراعاتهم بش يقطعوا الخمر تدريجيا ، بش يقطعوا اليدين متع المعتصمين ، بش يأسسوا الأمة و بش يضمنوا الجيش و الأمن.

 

في الثمانية السنوات الأخيرة وين ظهروا زمرة من السياسيين ثمة زوز إحترفوا فن الخطابة و كل واحد على طريقتو : الشهيد شكري بلعيد و البجبوج. نتفكر زادة إنو في كل حواراتو الأولى ضحكنا برشة ، فالح في التنكيت و ضامر ، كلمتو ديمة على لسانو و ما رشفها لحدّ و هذا مالحاجات الي خلاتو يتحبّ. و أنا نتفرج في عمر أحفادو ساعات ننسى وقتاش تولدت و هو موسوعة و ذاكرتو و حفظو للتواريخ و الأسامي و الوقائع كان ديمة يخليني باهتة و نتفكروا في آخر لمة نهارعيد الإستقلال درس التاريخ الطويل الي عملوا و الي مغزاه كان واضح : الوحدة الوطنية الي للأسف هو بيدو ساهم بمساندتو المطلقة و العمياء لولدو في إفشالها .

 

العالم الكل ركّز مع معطى و هو موش صغير إنو الباجي قايد السبسي هو الرئيس الي صوتلو مليون مرا. و الحال إنو مستحيل ننساو الدور الكبير  الي لعبوا في مزيد  تركيز حقوق المرا التونسية . في فترة حكمو تم التصويت على قانون مناهضة العنف ضد النساء و كان له من الشجاعة عكس غيرو و عكس حتى بورڨيبة في إنو يحكي  في المحظور و هي مسألة المساواة في الإرث. و لو ما نجحناش في النقطة هاذي لكن كان عندنا كشعب و بلاد ما يكفي من الفخر إننا حكينا في الموضوع  رغم إختلافاتنا و مرة أخرى أكدت تونس إنها عكس بقية الدول العربية قدمت أشواط فيما يتعلق بالحريات و بالمساواة و حقوق المرأة .

 

لكل حدث حديث و الحال إنو موش وقت تقييم فترة حكمو لكن كلمة حق تقال و ما نتصورش نختلفوا فيها ثنين : الباجي قايد السبسي دخل تاريخ تونس الحديثة من الباب الكبير و خرج زادة في يوم تاريخي إلي هو عيد الجمهورية و كأنو التاريخ أو الصدف أو تلك القوى الخارقة قررت إنو إلى الأبد إسم الباجي يقترن بالجمهورية التونسية، حب من حب و كره من كره . و خبر وفاتو ما عدا الحزن الي أحدثو فينا ثمة زادة نوع من الخوف الي يرافقوا : الخوف على الجمهورية خاطر يعيش في تونس من خانها و الخونة كثر و أنواع و أزمة الثقة الي ولات اليوم بيناتنا نحنا الشعب و هوما السياسيين ما تنجم كان تعقد الأوضاع . خان تونس إلي كان يعرف الأوضاع الصحية للباجي و لم يعجل في إرساء المحكمة الدستورية . خان تونس الي كان يعرف الأوضاع الصحية للرئيس و أحدث بلبلة في قانون إنتخابي رفض الرئيس ختمه و قرر هو يعديه للمطبعة الرسمية . خان تونس كل من تقلد مناصب الحكم و السلطة و ما قراش حساب للوضعية هاذي . خان تونس كل شخص رفض إنو يمشي في سياسة توحيد القوى و الجهود إرضاء لذاتو المريضة .

الله يرحم الباجي قايد السبسي و يحمي تونس من الخونة . تونس تعيش .

 

تعليقك

(x) المدخلات المطلوبة

شروط الإستعمال

Les commentaires sont envoyés par les lecteurs de Business News et ne reflètent pas l'opinion de la rédaction. La publication des commentaires se fait 7j/7 entre 8h et 22h. Les commentaires postés après 22h sont publiés le lendemain.

Aucun commentaire jugé contraire aux lois tunisiennes ou contraire aux règles de modération de Business News ne sera publié.

Business News se réserve le droit de retirer tout commentaire après publication, sans aviser le rédacteur dudit commentaire

Commentaires

Commenter

تقرؤون أيضا

03 جانفي 2022 16:04
0
30 ديسمبر 2021 16:29
0
27 ديسمبر 2021 17:00
0