قضاء بالوجوه و حريات في خطر !
و كأننا بدينا نراو في شوية ضوّ في آخر هالنفق المظلم متع الحجر الصحي . إنطلقنا على بركة الله في المرحلة الأولى من الحجر الصحي الموجه: برشة قطاعات رجعت تخدم نسبيا و الوضع الى حد الآن موش كارثي و الأمور ماشية . معجزة ؟ حسن إدارة الأزمة ؟؟؟ الكورونا كيف وصلت لتونس ظهرلها بش تبع النسق العام متع البلاد في التكركير و دزان النحّ و ماكانش الفيروس بالخطورة الي ريناها في ايطاليا مثلا.
اول يوم حجر رينا تصاور يأكدوا انو المستحيل موش تونسي و الي نحنا شعب قادر على إبهار العالم فعلا :
ميتروات و كيران تقول في الهند ! شطر العباد ماهياش لابسة ماسك الوقاية و نتفهمهم نظرا إنهم يا إما موش موجودين، يا غالين على نسبة كبيرة منهم ! و رينا زادة كالجماعة الي ما نعرفش كيفاش وقت المطر يجبدوا يبيعوا السحايب، المرة هاذي يبيعوا في الماسكوات بدينار : قلتلكم شعبا يبهر العالم ! في كل الحالات نتمناو إنّو الفيروس ــ لأسباب يعرفها أهل الإختصاص ــ بلحق كيف وصللنا تعب !!! سينون يا خيبة المسعى !!!
السيطرة على الفيروس و الوضعية الشبه مستقرة الي نعيشوا فيها ، سمحتلنا إنا نبداو نخمموا في ما بعد الكورونا : الإنعكاسات الاقتصادية و الاجتماعية و غيرو ... و كيف العادة و العوايد نعاودوا ديمة نرجعوا لنفس المواضيع : الفساد و الحوكمة الرشيدة و الإحتكار و الإقتصاد الموازي و الخ. بالنسبة للمواضيع هاذوم كيف العادة ، رمينا جملتين تلهوثنا بيهم عالمواطنين و اكهو : هاو الإحتكار جريمة حرب ، هاو المحتكرين مجرمي حرب و غيرو من الكلام ... الكلام هكاكة الحقيقة فالحين فيه الي يحكموا اما الفعل ما ثماش !!!
نيابتنا العمومية و قضاءنا بصراحة لازم نتفهموهم عندهم أولويات أخرى في زمن الكورونا ! لازم نكونوا متفهمين ! لازم نصبروا ! لازم نوسعوا بالنا ! ناس مغمورة بالخدمة و القضايا ! مثلا على سبيل المثال : قضية ع.ح و س.ش ! قضية سورة الكورونا و أخيرا قضية الرابور علاء !!
بين الثلاثة قضايا ثمة رابط مشترك هي السرعة الغريبة الي تتحرك بيها النيابة العمومية . فيما يتعلق بقضية التحرش الي تعرضتلو عربية حمادي مانيش بش نحكي فيها برشة على خاطر توة على ذمة التحقيق و الي عندو حق ياخذو . أما الجانب الي يعنيلي و نتصور يعني برشة تونسيات هي نجاعة النيابة العمومية في التحرك و الوقت و المجهود يعطيهم الصحة للدفاع على حقوق المرأة . أما بربي علاش كان مع عربية هالنجاعة؟؟؟ علاش النساء الي تعرضوا للعنف كيف يمشيو بش يشكيو يسمعوا : وسعا بالك مدام و توة حجر ارجع لدارك خير ما ترصيلك في الشارع !! كورونا و أمراض !!!! و برشة جمل و إجابات تعمل العار سبق و حكات عليهم الجمعية التونسية للنساء الديمقراطيات !
القضية الثانية الي بصراحة تضحّك و تبكّي في نفس الوقت . هي قضية "سورة الكورونا" الي هي راهي ماهياش سورة و ماعندها حتى علاقة بالقرآن فقط شكلا ، خذاو فازات كالمصحف الي نشريوه و نحنا في المكتب. آمنة الشرڨي بارتاجاتها و جاها إستدعاء من إدارة الشرطة العدلية بتاريخ 4 ماي 2020 وتعرضت على الاستماع ، البارح، من قبل النيابة العمومية . القضية هاذي تفكرنا بقضية جابر هاك العام و برشة قضايا مماثلة عشناها في 2012 حول حرية المعتقد و الضمير. و لا يزي في 2020 نيابة عمومية تتحرك على قصيدة فيها «كوفيد والفيروس المبيد، بل عجبوا أن جاءهم من الصين البعيد، فقال الكافرون إنّه مرض عنيد...» و لازيد تنتهك نيابتنا حق المحاكمة العادلة بما إنو تمّ منع محامية آمنة من الحضور خلال الاستماع أمام النيابة، وتمّ منعها من حق الدفاع أمام النيابة العمومية و زيد استجوبوها 7 ممثلين من النيابة العمومية ! 7 يا بو ڨلب، نتصور حتى كان هاك العام شدوا أبو عياض و ماسيبوهش يهرب من جامع الفتح راهو ما استنطقوهش 7 مالناس ! أمور تدين و مقدسات في رمضان كلها تولي جوها فسفس !!!
لكن موش هاذي بركة المصيبة . المصيبة هي كل ما تعرضتلوا آمنة الشرڨي من تهديدات بالقتل و الإغتصاب و العنف و الهرسلة من قبل الرعاع ، الجهلوت، المتخلفين ، الفرارات المسيبين على فايسبوك، لكن نيابتنا لم تحرك ساكنا وقتلي برشة منهم هبطوا تصاورهم و أساميهم ! ايه الدين أهم و لو إنو نعاود نقول لا علاقة لسورة الكورونا لا من قريب و لا من بعيد بالقرآن و فلنفترض جدلا انو عندها علاقة ما نتصورش نيابتنا العمومية عندها دخل بالموضوع .
وختامها مسك لهذا الأسبوع : قضية الرابور علاء الي توقف من أجل استهلاك القنب الهندي ! مرحبا بيكم في الجمهورية التونسية : وين الدولة ماعندهاش تحاليل الكورونا أما عندها تحاليل الزطلة ! اكهو كل دولة و أولوياتها يبدو إنو من بين أولويات حكومة الترويكا 2.0 هي الزج بأكبر عدد ممكن مالتوانسة في الحبس ! بأقل مواطن يكسرلهم في روسهم : خلي يكملوا يريڨلوا أمورهم يعينوا ما تيسر و يصححوا شوية إتفاقيات يكملوا يبيعوا الي قعد في البلاد و هذاكة الكل . فيما يتعلق بقانون عدد 52 بصراحة عبد ما ينجم يقول كان الله يسامحك يا الباجي قايد السبسي . ديمة كان يبدأ بوادر إصلاح القوانين و تعديلها و ياقف في وسط الثنية ! ماهو كالعام بعد ما غنّالنا كافون مع مراد الزغيدي في الحملة الانتخابية و وعد الشباب انهم ماعادش بش يدخلوا للحبس على الزطلة ما حاولش ، حسب رايي، كيفما يلزم بش ينحي قانون العار و اكتفى بتنقيح و قالك السلطة التقديرية للقاضي ! ثمة ناس تتشد تروّح (كان القاضي زاهي و عامل كيف) و ثمة ناس تتشد و تضرب اشهرة في الحبس ! 30% من المحبوسين مشدودين على قضايا استهلاك مخدرات : وين كانوا يعملوا جونتة البرة يوليو يضربوا في المرهوجة و انواع اخرى مالحرابش داخل الحبوسات و من غير ما نحكيو على استقطابهم من طرف الدواعش و الارهابيين ! خاطر في الحبس بوه على خوه ! ماثمة حتى سياسة إعادة إدماج و محاولة انقاذ ما يمكن انقاذو !
شكرا للنيابة العمومية على نجاعتها و شكرا لإلياس الفخفاخ على صمتو هو وحكومتو في قضايا الرأي هاذم, هو الي بنى حملتو على الدفاع على الحريات . علاش يقول قايل شكرتهم ؟؟؟ خاطر بداو يغلبوا على التوانسة لدرجة إنو الناس بدات تحب تعاود تخرج للشوارع و ثمة حتى حديث على إعتصام رحيل جديد قاعد يتحضر على صفحات الفايسبوك !!! زايد إنا للشارع و إنا اليه راجعون ( تمشيش تتعدى مس من المقدسات هاذي زادة) !!! و وقيت ضغط كبير لإرساء محكمة دستورية على أمل ما تطلعش مايلة للتخونيج !!!
تعليقك
Commentaires