عرس ديمقراطي ماذا أيها ...

و أنا نكتب في الكلمات الأولانين في راسي تتعاود جملة "الصبر لله و الرجوع لربي" من ملزومة عبد الرحمان الكافي . الصبر على حجم الخراب الي نعيشوا فيه و نراو فيه . يبدو إننا مهما نبهنا و تنبأنا بلي بش يصير و مهما حكينا و حلّلنا الوضع العام و حذرنا مالعنف الي تفشى في المشهد السياسي في الفترة الأخيرة لكن لا حياة لمن تنادي . تأكدنا اليوم بأحداث الجمعتين لخرانين إنو الشعب في واد و السلطة في مستنقع بعيدة عليها كل البعد .

عشنا توة تقريب الأسبوعين على وقع الاحتجاجات الشعبية الي وفات باعتقال عشرات الميات من الشباب و الي بالطبيعة كيف العادة كانت دولتنا قوية وعادلة في التعامل معاهم بما إنو حسب ما صرح بيه بسام الطريفي نائب رئيس الرابطة التونسية للدفاع عن حقوق الإنسان , بيناتهم قصّر و تعداو للسجون في عوض مراكز الإيواء . ثمة أبحاث تتبدّل فيها كان الأسامي و تتعاود ، بخلاف عاد الوقاحة متع الي يحكموا و الي بالنسبة ليهم  حركات اجرامية و شباب منحرف و هات من هاك اللاوي . و رينا إنو التحركات الليلية رافقتها تحركات في وضح النهار هو راهو يطالبوا في الناس تتحرك في وضح النهار موش خوفا من التخريب و التكسير و السرقة و إنما بش الشرطة الفنية تنجم تصوّر مليح كيفما في 26 جانفي .

و توة بش نحكيو على 26 جانفي ، موش الخميس الأسود لسنة 1978 . 26 جانفي الي المفروض المشيشي يقدّم تنقيحو الوزاري قدام مجلس نواب الشعب . المشهد للي تواجدو في الشارع كان سريالي . مرعب و مخيف . نجم نقول الي شخصيا منذ 20 سنة ما تغيبتش نهار على أي مسيرة صارت في الشارع التونسي  و بحياة عمري ماريتش تطويق امني و عسكرة للشارع التونسي كيفما نهارتها  . و هذا الي خلّى في بداية الجلسة العامة بعض النواب الي مازالت فيهم ذرة كرامة يدينو هالسياسة . باردو تحاصرت . باراجات من كل المنافذ و حتى إذا بعض المواطنين تمكنوا إنهم يوصلوا, عاشوا هرسلة أمنية من البوليسية الموجودين الي منعوا حتى المترجلين انهم يمشيو في الشارع . إستعراض عضلات و يبدو انها كانت فرصة للمشيشي إنو يبهرنا بالمدرعات الي مازال كيف شراهم و جابهم لتونس وقتلي فشل حتى في تسجيل تونس بش تاخو تلقيح  الكورونا . شرطة فنية متمتعة بكل التقنيات الحديثة بش تصور وجه المتظاهرين و من بعد بالطبيعة كيف يخلولها الجو و  يزيدوا الفاشيين يركزوا رواحهم في السلطة يجبدوا التصاور و الناس من ديارهم كيفما صار في الأحياء الشعبية وقت الإحتجاجات الأخيرة . لأنو الي نساو بش يقولوه إنو عدد لا يستهان بيه من الموقوفين ما تمش إيقافهم وقت الإحتجاجات و إنما بعد خرجوهم من ديارهم . وقفوا كل المسيرات الي جاية لباردو وحتى جنازة هيكل الراشدي, في سبيطلة , الي قتلوه وقفوها وضربوها بالغاز و تواصل العنف في أحواز شارع الحبيب بورڨيبة و في نهاية  نهار مقرف  بعد ما ترمى في أحضان النهضة و إئتلاف الكرامة يخرج المشيشي و يقول حرفيا : "اليوم عرس ديمقراطي" .

هي ماتجي كان هكة الديمقراطية التونسية تحوّلت لعرس و طلاق و زواج عرفي و زواج متعة و جهاد نكاح و هي في الأصل ماعندها حتى علاقة بالديمقراطية كيفما تفاهمت عليها البشرية . رئيس حكومة خرق الدستور و تحالف مع الأطراف السياسية الأكثر عنفا و المحرضة على التقاتل حتى . رئيس حكومة ينال في ثقة نواب تحت تطويق أمني و عسكري و يحب يقنع الشعب البائس و اليائس إنو هو عايش في ديمقراطية . ديمقراطية الهانة و رقود الجبانة .

باهي يمكن أنا كثرتلها في النقد و ما نيش نشوف في نصف الكأس المعبي . بالك أنا متشائمة بطبعي . و نحنا هكاكة  فرد نهار يوصلولنا زوز فيديوات :

ــ فيديو إيقاف عائلة في الكياس في وضح النهار و معاهم صغارهم في سيارة . التعامل الأمني ما نتفكرش ريتو حتى مع الإرهابيين . أم في كرهبتها معاها زوز صغار طفلة في الخمسة سنين و في يدها رضيع . الطفلة كيف رات المشهد تعيط و تبكي و تدور ماهياش عارفة عند شكون تترمى . بوليس بطولو بعرضو يسقّف معصرة داخل للكرهبة مرمي بجثتو على مرا في يدها صغير و يسب و يعيط و الناس واقفة باهتة في عجب ربي و ثمة شكون من المواطنين يصور يخزرلو البوليس و يقلو : " صورني ايه زيد صورني " يعني بلغة أخرى ماعندك ما تعمل . و من بعد يقلك ثمة إحتقان و  كره للأمنيين و يستغربوا عنف الشباب . و بعد ماراجت الفيديو و حكى عليها الإعلام يخرج توضيح من وزارة الداخلية يحشّم و يبرّر  في السلوك الوحشي الهمجي المليشي .

 و نحنا مازالنا تحت الصدمة تقريبا ساعة ولا ساعتين بعد تهبط فيديو لاعتداء بالعنف من قبل مخلوف على رئيسة حزب الدستوري الحرّ. مشهد آخر يعجز حتى اللسان عن وصفه أولا لأنو كيف تتفرج فيه كمرا تحسّ روحك إنت بيدك تعرضت للعنف و ثانيا للسقوط التام للخطاب الموجود فيه تحت قبة برلمان . قالك عرس ديمقراطي  !!!! هو في هالبلاد شنوة قعدلنا بعد عشرة سنين ؟ قعدتلنا شوية كرامة عملولها إئتلاف و رزاونا فيها نهائيا . مرة أخرى عصابة إئتلاف الكرامة بعد ما زاد سيدهم الشيخ و بوهم الروحي الغنوشي خرجلهم بيان يستنكر فيه العنف الي تمارس عليهم من قبل التيار تحلّوا في العريض و تحولوا الى باندية بأتم معنى الكلمة و الفيديو تكفي بش تأكد هذا : المشية و دزان الأكتاف و تعويجة الفمّ و الزدمة على مرا بهاك الطريقة تدلّ على المعدن لها الكتلة الداعمة و المحرضة على العنف و الإرهاب . الأدهى و الأمر هي صمت المؤسسات الرسمية للدولة و على رأسها رئاسة مجلس نواب الشعب و كذلك بقية الرئاسات . قعد شوية أمل في بعض منظمات المجتمع المدني الي مباشرة أعلنت دعمها و مساندتها لعبير موسي .

مناخ العنف هذا و التبوريب الي اختارت تمشي فيه النهضة و باراشكوها إئتلاف الكرامة فكروني بالمناخ السياسي في 2012 الي انتهى بإغتيال الشهيدين البراهمي و بلعيد و الفرق هو إنو الشعب ميت ــ حي و ما نتصورش مازال عندو نفس بش يعمل عركة كيفما عركة إعتصام الرحيل فلذا نجموا نقولوا هنيئا للإسلام السياسي والتيارات التكفيرية بتونس و شعبها : زعمة بش نعيشوا عشرية سوداء على الطريقة الجزائرية ؟ ….