إيقاف البحيري : أول الغيث قطرة ... و العاقبة للبقية

من الواضح و كيفما تكهننا إنو 2022 بش يكون عام التقلبات السياسية : فيه إنطلاق أهم المواعيد الي كان أعلن عليها قيس سعيد في 14 ديسمبر 2021  و من بينهم الإستشارة الواطنية . أما الي لا كان على البال و لا على الخاطر هو التطورات الأخيرة الي شهدتها الساحة القضائية في علاقة بالساحة السياسية و خاصة بحزب حركة النهضة .

فوجئنا ليلة رأس السنة الميلادية 31 ديسمبر 2021 بإيقاف القيادي الإخواني نور الدين البحيري . نور الدين البحيري أشهر على نار من علم فهو عند تقريبا 90% من التونسيين وزير العدل الي قتل و نهائيا حلم الشعب التونسي في قضاء مستقل و نزيه  .

نور الدين البحيري وزير العدل بين 2011 و 2013 و طبق المثل الفرنسي الي يقول "أضرب الحديد مادام سخون" . 2011 مازالت الدولة مرهوجة و كل حزب و طرف  يغني و جناحو و يردّ عليه ... تمسمر وقتها في العدل و عاث في الوزارة و القطاع فسادا . و هذا يقولوه بعض القضاة الشرفاء إلي من أول نهار فضحو تدخلو السافر في التعيينات و تدخل زوجتو المحامية في القضايا و في سير القضاء فيما يتعلق ببعض الملفات .

نور الدين البحيري هو زادة صاحب القولة الشهيرة " لوكان عندكم 50 ألف بوليس نحنا عندنا 100 ألف إرهابي" و ما تحاسبش و ما تحاكمش و ما تفتحش تحقيق في التصريح هذا  الي هو وحدو كافي بش النيابة العمومية تفتح تحقيق في شأنو . نور الدين البحيري من القياديين الإخوانيين الي ما خرجش من تحت جناح الغنوشي و دعمو و ساهم بطريقة غير مباشرة في الإجهاز على حركة النهضة .

نور الدين البحيري إلي بعد العدل تعين كوزير معتمد عند وزير الرش علي العريض و ساهم هو و جماعته الي عينهم في طمس الحقائق فيما يتعلق بقضايا إغتيال الشهدين بلعيد  البراهمي و حسب دوسيات هيئة الدفاع هو ساهم في الإغتيالات زادة و وفّر الحماية اللازمة للإرهابيين و الجماعات الإرهابية بش يرتعوا و يصولوا و يجولوا في تونس على راحتهم .

إيقاف نور الدين البحيري عكس ما يروجولو بعض الإعلاميين و الحقوقيين و السياسيين السمسارة كانت بمثابة عيد وطني للشعب التونسي . حالة الاستبشار تجاوزت كل الانتظارات لسبب بسيط هو إنو الكلنا و كل واحد من موقعو لاحظ تدهور أداء المرفق القضائي و كلنا فقنا على حجم الخراب الي لحق بالقطاع خاصة بعد العملية الإرهابية الي صارت في باردو و الكلام المرعب و الحجج الي كان قدمها المحامي الفرنسي لضحايا عملية باردو .

نور الدين البحيري قيادي آخر تولى الحكم و السلطة فقط لخدمة مصالح حزبية ضيقة و الحق هو حتى خدمة مصالح حزبية ما تجيش  لخدمة أجندات أجنبية همها الوحيد تفكيك الدولة التونسية و ضرب نموذج للتعايش السلمي و المدني و الي مقارنة ببلدان المنطقة نجموا نقولوا تقدمي .

إيقاف نورد الدين البحيري أثار حالة هلع في صفوف حركة النهضة و باراشوكاتها من جمعيات مجتمع مدني موالية و  مطبعة و من إعلام مطيع و غيرهم ... حالة هلع لأنو و أخيرا دخلنا في الصندي . لأنو و أخيرا بش يبان للرأي العام الوطني و الأجنبي إنو العركة مع الإخوان و العركة الي البعض بش يقزموها يقلك إيديولوجية ما كانتش كذبة و كان عندها ساس و ساسها إنو الإخوان المسلمين فرع تونس  قبلوا بش يدخلوا في اللعبة الديمقراطية و يتظاهروا إنهم حركة تخلات على شعاراتها القديمة المتعلقة بالإسلام السياسي شكليا فقط بش تستولي عالسلطة و من بعد تبني و تحقق مشروعها و الكلنا نتفكروا كلام الغنوشي و ديلو كيف حكاو على الجيش و الأمن الموش مضمونين و من بعد فسرولنا بكل ثقة في النفس و كأنها خلت لهم و كأنها تونس ماجابتش نساء و رجال أحرار إنهم حاجتهم بصغارنا و في هذا الإطار بالطبيعة تندرج الجمعيات القرآنية و المدارس القرآنية و معتقل الرڨاب و الدورات التكوينية لإتحاد القرضاوي .

و اليوم ، بعد حجم الخراب بعد خطورة ما ورد في الندوة الصحفية لتوفيق شرف الدين و بعد الوثائق الي تقدمت و بعد ما بان بالكاشف إنو ثمة جزء من القضاء التونسي موالي و مطبع و رافض المحاسبة لأسباب هوما لازم يجي نهار و يقولوها للشعب التونسي و لو إنو الشعب ليس غبي و يعرف كيفما كان يعرف إنو النهضة مشرفة على تسفير شبابنا لسوريا و غيرها ... ثمة ناس تحب تعاود تغرقنا كيفما تفننت في ذلك في العشرية الي فاتت في الشكليات و في لغة تطبيق القانون . يا سادة يا مادة يا أصحاب الباتيندات الحقوقية خاصة و من معكم : نحنا معاكم راهو إنو ماذابينا القانون يتطبق أما أنا قانون تحكيو عليه و كيفاش تحبوه يتطبق إذا اليوم وزير العدل في سنوات التأسيس لدولة ما بعد خلع بن علي تطبع في الباسبورات للإرهابيين و توزع و تبيع في الجنسيات التونسية و تضرب في وثائق رسمية و تسرق في  وثائق متعلقة بالاغتيالات .

ذكر فإن الذكرى تنفع الساقطين :

في العشرية الي فاتت و خاصة بعد مهزلة الحوار الوطني و بعد  مهزلة التوافق و بعد ما باجي قايد السبسي تلاعب بمنتخبيه و إلتقاو الخطوط المتوازية وقتلي هيئة الدفاع كانت تعمل في الندوات الصحفية حول موضوع الغرفة السوداء و حول تورط النهضة و حول تورط سيء الذكر البحيري في تدجين القضاء ... نتفكر في بعض البلاتوات كانت الحوارات بمثابة : مهبلة و ناخذوا بخاطرهم ! و بعد يتم إستدعاء المتهمين أكثر من المدافعين !  نتفكر زادة إنو في العشرية الي فاتت كان ثمة شبه إجماع إنو النهضة جزء كبير من المشكل لكن هذاكة بيدو كان شكلي في إطار تقاسم الأدوار  لإقتسام سلطة أنجح و أنجع .فلذا لا سماح و لا رباح ... و الله يرحم بلعيد البراهمي و كل شهداء الوطن  .