طارت السكرة و حضروا المداينية ؟

ناس بكري يقولو "تطير السكرة و تحضر المداينية " و يبدو إنو حضرهم بلحق . تقريب الأسبوعين بعد 25 جويلية و بعد قرار تجميد مجلس نواب الشعب و  إقالة المشيشي و تفعيل الفصل 80 وين وصلنا ؟

بعد الفرحة العارمة للشعب التونسي الي عاشها التونسي وقت ما استجاب رئيس الجمهورية للمطلب الأكثر شعبية على الإطلاق اليوم الفرحة متع الغمة الي انزاحت بدات تخلي في بلاصتها لغمة و اكهو. 11 يوم بعد 25 جويلية  و مع الظرف الاقتصادي الحرج و الوضع الصحي الكارثي مازالت تونس بلاش حكومة . إذا الرئيس استجاب لها المطلب الشعبي فجأة و قبل ما ينظّم الأمور و يحدّد فريق العمل الي بش يعانوا في بناء الجمهورية الثالثة فيا خيبة المسعى و إذا هذا داخل في إطار استراتيجية عمل مؤسسة رئاسة الجمهورية فيا حبذا لو كان يحكيو معانا و يفسرولنا خلي ينقص القيل و القال و تنقص الإشاعات الي لا تنجم تطمننا كتوانسة و لا تنجم تطمن الداعمين للدولة التونسية .

كان من المفروض إنو في الأيام القليلة الي بعد تجميد المجلس تكون ثمة قرارات ثورية و لو إنو الحق هالكلمة متأكدة إنها ولات عاملة حساسية للشعب . و كان من المفروض إنو المحاسبة  تم على قدم و ساق و إنو نتأكدوا قبل ما نحلوا هالمعمعة مثلا انو القضاء التونسي مستعد إنو ما ياخذش عطلة قضائية بش دوسيات الفساد يتحلوا  و الفاسدين ما ياخذوش الوقت إنهم يعاودوا ترتيب أثاث بيوتهم و يستغلوا الفرصة بش يعاودوا يبنيو صورتهم و يزيدوا يستغلوا الظرف بش يعملوا حملات ضغط و مناصرة ضد الشعب التونسي و رغبتو الواضحة في التخلص من مجلس نواب شعب تحول لأكبر عدوى لانتشار الفيروسات بأنواعها و التخلص في الحزب الداعم للفساد و المفسدين حزب حركة النهضة .

عشنا الأيامات الأولى على وقع البلاغات و عشنا على وقع إصدار بطاقات الإيقاف و المداهمات بش الناس الي عندهم أحكام ضدهم و إستغلوا الحصانة يواجهوا كيفهم كيفما أي مواطن القضاء و الي خاطيه يروح و الي مورط يشد الحبس لكن فيسع ما فهمنا إنو لا سرعة التحرك و على ما يبدو لا الدوسيات بالحجم الكافي و لا بالجرم الي طول عمرنا نسمعوا بيهم بش الناس هاذي تتحاسب . الحصيلة إيقاف ياسين العياري و فيصل التبيني : قضايا ثلب و قذف . ماهر زيد و مخلوف و زقروبة و العلوي و السعودي نيڨاتيف يروحوا . و الحال إنو علقليلة واحد منهم شعب كامل شدوا في حالة تلبس و إعتداء بالعنف ضد زميلتو نائبة في مجلس نواب الشعب . لا علينا مانا عاد في ديمقراطية و القضاء مستقل و الرجاء عدم التدخل في الشأن القضائي : هانا نتفرجوا و هانا باهتين في عجب ربي . فيما يتعلق بماهر زيد الي خذا بطاقة كف التفتيش الي تم احترامها يظهرلي سمعنا زوز شهادات وحدهم يكفيو  بش النيابة العمومية تعاود تفتح التحقيق : شهادة ألفة الرياحي و شهادة المحامي عماد بن حليمة ... أما استنى يا دجاجة  كيفما نستناو في إقالات أهم ملي صاروا كرئيس الهيئة العليا المستقلة للانتخابات الي لو كان خدم خدمتو كيفما لازم و حسب تقرير دائرة المحاسبات فيما يتعلق بالتمويل الأجنبي للأحزاب راهو المشهد  تحت قبة باردو كان مختلف نوعيا لكن ما علينا الدول لا تدار بالعاطفة و عبر فايسبوك لا بالتهم الجزاف الغير مبنية على دوسيات و وثائق . إيه أما راهو الوقت بعد 25 جويلية هو غير الوقت قبل و انتظارات الشعب التونسي إرتفعت ما إرتفاع منسوب الأمل و كل انتكاسة بش تقضي هالمرة و بصفة نهائية على الشعب و الحاكم و السلطة و الدولة .

11 يوم كانوا كافيين بش جماعة لا دين لا ملّة يعاودوا يتموقعوا و يعاودوا يقسموا الأدوار كيما عودونا توة عشرة سنين : 25 جولية إنقلاب . 26 جويلية الغنوشي يحب يدخل للمجلس . 27 جويلية محاولة تجييش قواعد النهضة قدام باردو لإعتصام الشرعية . الأيامات الي بعد رينا التهديد و الوعيد و كل أنواع الانحطاط والسفالة من ضغط : الي يقول ما عادش تعطيوهم تلقيح ضد الكوفيد و الي قال هاو بش نسيبوا عليكم الهجرة الغير النظامية و سمعنا النغمات الكل لحد وين إجتمع مجلس الشورى و قاللنا الي 25 جويلية موش إنقلاب والي النهضة مساندة قرارات قيس سعيد و الي النهضة ــ أضحكوا بالشوية ــ مادة يديها لمواجهة الفساد .  و موش النهضة بركة ناخذ فقط و على سبيل المثال سهام بن سدرين و قلبان الفيستة الي بصراحة أكدلنا حاجة بركة :  مدى قذارة الحياة السياسية في تونس . قذارة و رذالة و نذالة و كل الأوصاف المربوطة بيهم لدرجة إنو الناس هاذي تحولت عند الشعب التونسي إلى أنواع من الوحوش الآدمية .   و يبقى السؤال إلى أي مدى إنسان ولا مؤسسة و لا نظام ينجم يطمح إنو يبني جمهورية ثالثة  خالية من الفساد مع الوجوه البايدة ؟ الجواب نتصور واضح لا يرجى خيرا إذا هالناس الي خربت و عاثت في تونس توة عشرة سنين بش يتم رسكلتها وإعادة إدماجهم من جديد .

الأغرب إنو ثمة توجه وطني عبر بعض القنوات الإعلامية و الشخصيات "الوطنية" و الوجوه المعروفة بش يقويو هالسلوك و بش يقنعونا و هوما في الأصل يستبلهوا فينا إنو : ثمة ناس تغيرت و إنو ثمة شق معتدل داخل النهضة و إنو الناس الي تواطأت معاهم و عداتلهم سياساتهم القذرة كانوا مضروبين على يديهم و مغلوبين على أمرهم و ناقص نسمعوا الطاغية الغنوشي و الحال إنو كلهم كانوا على علم بلي قاعد يصير و بالعبث الي مارسوا رئيس الحركة و عصابتو و حزبو و كلهم كانوا يعرفوا كل شيء على العنف و إستعمالوا و الأموال الأجنبية و ابتزاز رجال الأعمال و إستغلال القضاء و الخ فلذا و بدون إطالة و من غير لف ولا دوران لأنو يبدو إنّو الأمور ما تعجبش : سنلاحقكم . سنحاسبكم . سنحاكمكم . و لكم الحق في الدفاع و في محاكمات عادلة إذا بالطبيعة القضاء ما قالش لا . خاطر إذا القضاء فوّت على نفسو الفرصة هاذي بش يحقق إستقلاليتو و يطبق القانون بدون محاباة سياسية و بدون الرضوخ للتهديدات و لغة "عندي عليك دوسيات" أعرفوا رانا بش نفوتوا فرصة مستحيل ترجع بش تونس تكون ديمقراطية فعلية موش وهمية كيفما في العشرة سنين الي فاتوا و المصالحات المطروحة بدون محاسبة هي ألغام بش تنفجر على الجميع إذا موش اليوم ، يوما ما .