شتانا بين فييلندا و بين تونس !!!

ألم ترى كيف أبهر العالم التونسي العالم ؟؟؟ كان ماريتش نحمدوه على نعمة الفيديوات . الجمعة إلي فاتت عاش الشعب التونسي على وقع الحرب المفتوحة بين عبير موسي و الإخوان المسلمين . حرب وفات بانتصار عبير موسي بعدما خرج بيان من رئاسة المجلس إعتذر فيها للسبان الي تعرضتلو عبير موسي . و شفنا فيما شفنا الشطيح و الرديح متع نوابنا العزاز و الغالين الي وفات مشاكل تونس و ماعادش عندهم مشاريع قوانين استعجالية و تلهاو ولقاو الوقت و هوما مازالوا ما تصبتلهمش أول شهرية إنهم يطلبوا جوازات سفر ديبلوماسية بش يصولوا و يجولوا في أصقاع البسيطة و يعملولنا آش قالك آش قال عليك : الديبلوماسية البرلمانية.

نوابنا يحبوا يعملوا ديبلوماسية برلمانية . ماهياش نكتة و لا تفدليكة و راسكم يحبوا يمثلونا في العالم مع برلمانات أخرين . نحمدو العالي و القدر و سعيد الي رفض إنو يعطيهم هالجوازات على ذمتهم : لا يزي الفضايح و الغلبة الي نعيشوا فيها كل يوم هوني ، يحبوا يكملوا يفضحونا قدام العالم. ممارسات النواب داخل مجلس نواب الشعب مالمجلس القديم مرورا بهذا إلي هو أتعس تخلي عبد يمدّ وذنو  للنظريات متع رضا لينين و يقول هيا فوّر عليا و كان إتخذت زيدها لصّ.

المجلس هذا ما نصبوش مارد ولا كائن فضائي ، شعبنا السمح الذي أبهر العالم هو الي طلّعلنا هاللأعجوبة لكن نفس شعبنا إلي نهبوا ولا نكرهوا شكّل هالمشهد السياسي بتصويتو ، نفسو نفس الشعب ، صدقوني هو بيدو، يبارتاجي في تصاور رئيسة حلومة فيينلندا و يقارن في تصاورها بتصاور الحبيب الجملي . و نتفهّم الغلبة بعدة توة 9 سنين و نحنا نسمعوا في ثورة الشباب و دور الشباب و المرا التونسية و دور المرا التونسية و كل ما تطلع حكومة ولا رئيس نستمتعوا بغياب تام للشباب و للنساء زادة .

نفس شعبنا إلي كل ما تصير عركة سياسية و فيها مرا نائبة ولا وزيرة تولي العركة ماعادش سياسة أما عرك حمام و حارزات و ننساو السبب و نركزوا مع التفاهات ، يتقهّر خاطر فييلندا الشقيقة عيّنت مرا و عمرها 34 سنة و نفس المرا هاذيكة شكلت حكومة فيها 12 مرا وزيرة مقابل 7 رجال . و إلي يقهر أكثر إنو 4 من وزيراتها عمرهم أقل من 35 سنة . حبّس توة و خلينا نتسائلو علاش التوانسة هوما بيدم الي طلعولنا هالمجلس في باردو يتقهروا على تشكيل حكومة فييلندا ؟؟؟

التونسي كائن عجيب : مثلا  يحلف و هو يسكر " وراس هالمعصية " ، يقول بسم الله قبل ما يضرب كعبات بيرة، كان تڨرّع منهم يحمد الله ، يحبّ نقل و صحة و تعليم في مقاييس الدول الأوروبية أما كان يلقى كيفاش يقلب الدولة في دينار ولا 1000 ما يبخلش ، ما يدفعش ضرايبو أما يطالب الدولة إنها توفرلو أحسن الخدمات في أحسن الظروف ، يشري السلعة المهربة و يعيش بيها و من بعد يجي يقلك الإقتصاد الموازي هرد البلاد ، يصبّ بنزين مهرب و من بعد يقلك  الكانطرية خرّبوا الإقتصاد،  ماهواش عنصري أما العباد السمر عندهم ريحة ، ماهواش ميزوجيني أما المرا لازمها تتضرب بش تتربّى ...؛ و نجموا نعملوا ليستة  نقعدوا جمعة نكتربوا فيها و ما نوفاوش الأمثلة الي تخلي التونسي يجيب الجملي و يبكي على Sanna Marin …

الحبيب الجملي إلي مازالولو 24 ساعة على إنتهاء الآجال الدستورية بش يعلن على تشكيلتو ـ و لا تشكيلة الغنوشي عادـ الي بيها بش ينقذ البلاد  و يحسن الإقتصاد الوطني و تو نشوفوا آش فيها شباب و آش فيها نساء . و يبقى الأهم على ذكر رئيسة حكومة فييلندا الي قالت أنا كل الي يهمني هو تنفيذ الوعود إلي على أساسها إنتخبوني ، نموت و نعرف شنوة ناوي سي الحبيب يعمل بش يحسّن الأوضاع الإقتصادية إلي في صورة ما قعدت على حالها و الأكيد إنها بش تتقهقر أكيد بش تجرّ معاها كل المكاسب الي تحققت و أولها الحريات .