زغروطة للحزب الجديد

نهار الأحد معروف بثقلو ... ملايكتو ثقيلة و تزيدها شوية برد و سحب رعدية و أمطار و تبدى تغفلق و تجبد في النفس بالسيف . في مثل هذه الطروف الصعبة قرّر يوسف الشاهد الإعلان عن حزبو و إسمو الجديد . تحيا تونس !

"تحيا تونس" لا مانيش نعيّط ، لا مانيش في مسيرة ، لا ما مات حدّ ، لا مانيش نرفع شعار ... حزب يوسف إسمو "تحيا تونس " . ذاكرتي بعد ما تواتر عليها الأحداث في هالثمانية السنين لخرانين ولاّت ذاكرة منقوبة ، طاسة أصلا : تحيا تونس ؟ تحيا تونس ؟ وين سمعتها هالغناية ؟ زعمة وين ؟ زعمة وين ؟ آه تفكرّت " فبحيث ... تحيا تونس" .

أتقدّم بكل عبارات التهنئة و التقدير على روح الإختراع و على الخيال الخصب و على النفس الشبابي لمن سهر على إختيار الإسم ( صوّتوا عليه القواعد قالك كان صوتوا بركة خير ) نحّاو "فبحيث" وخلاو الباقي . مسكين نداء تونس نحّاولو القيادات و القواعد و الشعار و خلاّولو النخلة الي على هالمعدّل ماهي بش تصلح كان بش يطلعوا فوقها و يرميو رواحهم .

شخصيا كنت من الناس الي إستفزّني الإسم ، حرّكلي نعرتي و عملّي الجاير في المخّ : حسيتها مصادرة لجملة تعوّدنا كاتوانسة في أصعب الظروف و وقت الكوارث و المصايب الي هابطة على روسنا كالمطر نقولوها "تحيا تونس " ضدّ الإرهاب و ضدّ السراق و ضدّ الفاسدين و ضدّ الي يحبوا ينظموا أمورهم في السرّ ... "تحيا تونس " بخلاف إنّها شعار النداء و بالتالي شعار مسروق و بخلاف إنها جملة التوانسة الكل تدلّ على إنو الشباب موش بالضرورة مبدع و لا بالضرورة عندو خيال .

الإعلان عن حزب يوسف الشاهد شكليا ماكانش فيه ولا لدقيقة نفس جديد ، روح جديدة تدلّ إنو القيادات الحالية داخلة ُرح 2019 بنفس جديد. إختيار الجهة و المكان و نوعية الخطاب الي ساد في جلّ المداخلات بما فيهاكلمة سليم العزّابي ڨربعت كالطاسة عند التوانسة : كلام فارغ و نفس التعويم : نتصارعوا أما كان لزم نتحالفوا ... نداء جديد في نسخة للأسف بش يغيب عليها أهمّ ما خلّى النداء يوصل للحكم : الإجماع حول الزعيم . و الدليل إنو إبّان الإعلان عن تأسيس هالحركة هاجت العباد على فايسبوك و تسيّبت اللسانات و الناس الي ما قلّقهاش إسم الحزب، و الّي ما قلّقهاش إختيار معقل الزعيم و إلّي ما قلّقهاش الوجوه المصدّدة الي كيف نراوها نتفكروا مصايبنا و نتفكروا ناس بكري كيف قالوا " كان جاء فالح راهو من بارح ".

مثلا السيد مصطفى بن أحمد الي تقريبا تكلّم في كل وسائل الإعلام زعمة يوسف الشاهد ولا سليم عزابي يتصوروا إنو وجه يطمّن ، وجه يشهي الشباب و الا الشعب التونسي الي عاف السايسية إنو يرجعلها ؟ يمكن هكة يظهرلهم : الأكيد و الواضح إنو السياسيين بما في ذلك الشباب منهم بينهم و بين الشعب  دنيا .

ثمّ و هذا في نظري الأهمّ من كل شيء الزعيم الشاب يوسف الشاهد موش عندو سنين توة يحكم ؟ على أنا أساس قرّر يبعث حزب آخر للمشهد السياسي ؟ من المفروض حزبو الجديد يتبنى على أساس تقييم موضوعي لفترة الحكم الي فاتت، على أساس أرقام متعلقة بالإقتصاد و الأمن و البطالة و المديونية . من المفروض يا سي يوسف قبل الإسم و قبل التصويت الديمقراطي ( يلعن بو الديمقراطية على وزن يلعن بو الكرة ) على التسمية ، يكون الإعلان عن تأسيس حزبك فرصة لمصارحة الشعب و ووضع النقاط على الحروف و توزيع المسؤوليات في الفشل قبل انجاح ، كان تكون فرصة تفكرّنا فيها بنتائج حربك على الفساد و المفسدين ، حرب كان الشعب و الشباب فيها وراك و كانو أكثر دراية بعلم الإتصال كيف عملولك أشتاغ #ڨو_دجو  لين خيّبت آمالهم و تأكدوا إنهم يمكن هوما وقفوا لتونس أما إنت قعدت ... تتفرج و ساكت و مغمّض عينيك على ناس هازة تونس لهاوية فقط خاطر مصلحتك و رغبتك للبقاء في السلطة كانت أقوى من حبك و إختيارك لتونس.

فهنيئا لنا جميعا بالحزب الجديد  الي كيفما قال أحمد فؤاد نجم "زغروطه للحزب الجديد / حيدمر الحزب اللى فات ... مع ان طرزان الوليد / زات نفس طرزان اللى فات."

هنيئا لنا بالحزب 200 و آش الي لمّ الڨديم و الڨدم و حبّ يعمل الجديد عملا ب " إنما الأعمال بالنيّات" .

و هنيئا لنا كشعب بمزيد تشتت الأصوات و بمزيد الحروبات و بمزيد العرك على البلاتوات و بمزيد التخلويض و الدليل المواجهة بين بن سالم حاليا و جلول الي سبقوا كوزير تربية : حروبات و صراعات نتائجها زوز :

أكثر قوة للخوانجية و أكثر كره من شعبنا للسياسة ... يتبع في إنتظار البرنامج ... و تحيا تونس كيف نحنا ما حييناش