حبّ و حكومة و عيشة مشومة !

ماهو قبل ... يعني 9 سنين لتالي ، كنا الكلنا متشوقين بش نحكيو في السياسة و ننعموا بالديمقراطية . شوق حققتو الثورة . لكن توة مديدة بعد العرض الي نتفرجوا فيه بين بلاتوات السياسة و الجلسات العامة متع مجلس نواب الشعب بصراحة عبد خلوقو دارت و روحو طلعت . و رغم الي الكلنا نبداو نحلفوا و نتكتفوا بش ماعادش نتبعوا : شيء قلبنا ما يعطيناش و حتى كان عطانا الشيء خالط ورانا . لعنة السياسة حلّت بينا. و كأنو الي فينا موش مكفّينا ، في راس العام مازالنا ما هضمناش الي كليناه ، يخرجلنا كالجملي و سرسطنا أسامي كالحكومة الهايلة الي تفرشخت : كانش راس عام و العباد لاهين في رواحهم و ياخذو في القرارات للعام الجديد الي بالطبيعة موش بش يطبقوا منهم ولا قرار . المرة هاذي و كأني تنغيص حياة التوانسة ولات هواية عند السياسيين متاعنا : إختار سي فخفاخ نهارة عيد الحب بش يعلننا على تشكيلة حكومتو. ريتو أمور قلة ذوق و تايمينغ و فازات ولينا نحنا التوانسة أبطال العالم.

صحيح عيد الحب موش عيدنا لا نذبحوا فيه و لا نمرمطو كيفما بقية الأعياد أما التوانسة يقولوا بيه : تبدى تشوف في التمعشيق في الشارع و يا شكالط يا نوار يا دبادب يا ڨاطوات و نستغرب الحقيقة من اختيار التوقيت . حاجتين يا الفخفاخ يقلك شعب غاطس خليني نستغل الفرصة يا الفخفاخ يحبنا و يحب يهديلنا كادو في عيد الحب : حكومتو .

و علّي قاعدين نراو فيه ما ظاهرلي هالحكومة تنجم لا تكون هدية و لا عربون محبة : حكومة طبخها الغنوشي في دارو و موش راضين عليها الأحزاب كان تعدات راهي أولا بش تعيش تحت رحمة  الأحزاب الي حسب ماقاعدة نعاين ناوين يعملوا من عذاب وزرتها صنعتهم . الشيخ شادد في حكاية الوحدة الوطنية و الأحزاب خايفة من لطخة المرة هاذي بش تقضي عليهم نهائيا و إلى الأبد. و سعدك يلي إخترت المعارضة . نرجعوا عاد لغدوة ، عيد الحب و المحبة و الذوق العادم في إختيار هالتاريخ للإعلان عن الحكومة : الحقيقة قبل كنا نقولوا الي السيايين التوانسة موش فالحين في الإتصال  طلعوا ماهم فالحين في شيء . و بما إنو ما ثمّة حتى عبد بعقلو نصح الفخفاخ و قالو : تاريخ خايب راهي الناس بش تنبر بيه و بش تبدع في التنبير ، أنا ننصحو يغلّف الميكرو و الصالة الي منها بش يعطينا حكومتو بالورد الأحمر و يعمل مزية حقيقي موش بلاستيك . و نقترح زادة إنّو ما يجيش وحدو موش باهي في هاك النهار الفضيل ، ياحبذا لو يخرجلنا اليد في اليد هو ولّي صممّ معاه هالحكومة .

ماذابينا زادة ا يعملش كيف نظيرو أولا يحفظ مليح أسامي وزرتو و بعد ما يكمل يسرسطهم يعطينا بالتدقيق شنوة ناوي يعمل هو وياهم و شنية أولوياتو و قداش لازمهم وقت على خاطر الندوات السخافية الي نضربوا بالسوايع نستناو فيها و في لخر نلقاو فايسبوك سبقهم في الخبر بصراحة ولات تعبنا نفسيا . و أنا نشك إنو سي إلياس بش يكون قادر على هذا على خاطر أوراقو تخلبزت بعد ماكان ماشي في القلم الثوري و رجع توة للقلم متع الوحدة الوطنية : هذا بش ينعكس حتما على السياسات الي ناوي يتبعها و ينفذها . و زيد حتى الوحدة الوطنية بصراحة المرة هاذي فالصو : لا الغنوشي السبسي بش يكون قادر على التوحيد و لا الأحزاب متع اليوم هي أحزاب البارح و تقريبا أغلبهم يستناو فيه في الدورة بش  يصفيوا حساباتهم إلي معاه و إلي مع الغنوشي و النهضة . فلذا ننصح الي عندو حبيبو ولا حبيبتو غدوة يبعد كل البعد عالتلافز و الراديوات و يمشي يدولش ، يشري وردات خلّي نواورية شارع الحبيب بورڨيبة و بقية المدن زادة يتفرهدوا . ننصحكم إنكم تتلهاو برواحكم و تلفوا على جواجيكم و تعبيوا قلوبكم بالمحبة و عينيكم بالناس الي تحبوهم : الدنيا فانية و ما باقي كان غلب السياسة .