روضة باردو

حرت و ضاع دليلي الجمعة هاذي . قلت زعمة على شنوة نكتب ؟ نكتب عالرفاهية و الرخاء الي يعيش فيها التونسي ؟ ولا نكتب على التحكم في الأسعار الي نجحت تعملو الحكومة ؟ قلت موش كان نكتب كيفاش نسبة البطالة طاحت بالشطر و رجعنا ننتجوا في الفسفاط و قاومنا المهربين و المحتكرين ؟ خممت زادة نحكيلكم كيفاش الجنرال سي عبد اللطيف قاهر الكورونا سيطر على الوضع و بفضل قدراته الخارقه قضينا على الفيروس و حققنا اشعاع عالمي و رجعوا الطيارات و تحلوا المطارات  و جاونا التوريست و التوانسة ما تغشوش كيفاش الحدود تحلت و ماطردوش عبر صفحات التواصل الاجتماعي توانسة اخرين خوفا على صحتهم و على حياتهم السعيدة في ربوع الخضراء. بالطبيعة ما نجمش نكتب عليهم خاطر اولا ماصار منهم شيء و على هالدزة ماهو بش يصير منهم شيء و ثانيا خاطر فهمتوا الي كثر الغلب يخليك تنكّت و تضحك مالغلبة .

أما أنا قررت نحكيلكم على تصويرة و على فيديو .

أولا نظرا لجمالية الوضعية و  التناسق الرهيب بين الاسود و الغبرة (  كلمة اختفات مع ناس بكري و يقصدوا بيها اللون الوردي) . أسود كرهبة سي نبيل و غبرة سورية نائب الشعب سيف الدين مخلوف. تمرفيقة على الكرهبة فكرت التوانسة بمهن و قطاعات حيوية تعيش في برشة توانسة كيف بيعان المشموم و بيعان المشوار.  أما سي نبيل في كالكرهبة و السيڨار فكرني قداش ساعات  موش الفقر بركة ماهوش " ساكسي" ، ساعات حتى الفلوس زادة. و حسب هكة النظرة الاولى للصورة نجموا نسمعوا سي نبيل يحكي مع سيف الدين مخلوف على البترول و الملح . محاداثات و مشاورات حثيثة لطريقة صرف ارباحهم الطائلة للمواطنين. ... بالطبيعة كيف كيف هذا خيالي. كيف تثبت كيفاش مخلوف متمرفق على شباك الكرهبة أنا نتصوررهم يحكيو على الحب . حبهم للبلاد .  يتناقشوا في باركنيغ على الحب وطريقة انقاض ... نقصد انقاذ تونس. يحكيو على أنقاض تونس . نتصور هاذي أصح قراءة للصورة . أنقاض تونس الي ساهموا بقدر كبير في تخريبها و احباط عزيمة شعبها و القضاء على أمل مستقبل زاهر و وردي كيف سورية سيف الدين مخلوف. أنا نتصور حكاو على مرسي . مرسي أول رئيس مدني يطلع بإنتخابات ديمقراطية و بعد أول ما ربح المدنية و الديمقراطية أول حاجة ضربهم.  علاش نحكي على مرسي ماهو سيف الدين مخلوق و عصابتو البارح في جلسة عامة مخصصة للتصويت مشروع قانون الاقتصاد الاجتماعي و التضامني هزوا صدروا في المجلس تصاور مرسي. بالطبيعة بش تقوم الحرب بينهم و بين موسي و كان الأمر كذلك. إنما الحياة أولويات و يظهرلي ولّى أكثر من واضح إنو أولية المجلس بكل مكوناتو و اطيافو الهدف متاعو القضاء على الفقر و البطالة و التهميش و الامراض بالقضاء على الشعب التونسي .

و الآن و بعد التحليل العميق و الخيالي لصورة مخلوف متمرفق على كرهبة  نبيل القروي نجموا نحكيو على ثاني إبداعات المجلس. و بش نلقاو كيف كيف مرة أخرى القروي أما غازي و سيف الدين مخلوف في باركينغ المجلس و مرة اخرى ثمة كراهب في العملية. الفيديو هاذي تورينا زوز نواب في قمة البذل و العطاء . زوز نواب  في أوقات العمل المخصصة يلعبوا . ماكمش تحلموا ولا أنا المرة هاذي سيبت خيالي يسرح . الفيديو القصيرة الحزينة و المؤثرة فيها زوز أبطال : غازي القروي في دور حارس شخصي لسيف الدين مخلوف في كرهبتو. و من بعد يخرج رئيس الحكومة علينا بكلام من قبيل بش نقصوا مالشهاري و من جرايات المتقاعدين . هوما يلعبوا و نحنا شهارينا تنقص . هوما يفدلكوا و نحنا سعدنا كل يوم يتكب أكثر شوية في هالبلاد. توة كان جاو فالحين و موقفين البلاد على ساقيها نقولو ميسالش خليهم يرتاحوا و يتفرهدوا . أما هاذم توة مللي دخلوا تحت كالقبة وهوما كولني ناكلك و البلاد كل يوم تقدم بالتوالي .

 الي يحكموا و يعملوا في السياسة هكاكة هواوي و على الطاير و بلا مشاريع عندهم أزمة قيم هذاكة متفاهمين فيه أما عندهم غياب تام للرمزية و لقيمتها . وقتلي اليوم البطالة بعد أزمة الكورونا تضربت في ثنين وقتلي بش نعمل ـ 4 ولا ـ5 في نسبة النمو وقتلى آلاف العايلات جاعت و ضعات و تشردت و شركات سكرت و عملا تم طردهم و نراو النواب في هاك المشاهد السريالية ما  ينجم التونسي كان يزيد يفقد ثقتو فلي يحكموا و يكره السياسة و يبعد عليها . وقتلي كل جلسة عامة عبد يضربوا السكر و الدم مالعياط والحروبات و تشقشيق الاحناك بمداخلات فارغة من كل محتوى في 90% من الحالات و وراء الكاميراوات يرجعوا يفدلكوا و يلعبوا عبد ما ينجم كان يطلب سيدي محرز بش يكمل يعطينا دزة خفيفة و نبدلوا هالنظام السياسي الي ما ربحنا منو كان الكوارث و المصايب.