الصبر لله و الرجوع لربي!

كميونة ... تركتور ... يعبيو النساء على بعضها... فحادث ...فموتى ... فحملة تعاطف...  ففولارة خضراء تعلقت و لبسها الي يسوى و ما يسواش... فرملي ... فجرثومة ... فوفاة 12 رضيع ... فكراظن ... فبلاد خاضت ... فلجنة تحقيق ... فما ثمة والو !!!  فنمرّ إلى نغم متع سنية مبارك !!!

هوموش الحادث الأوّل من نوعو للعاملات الفلاحيات ... و الأكيد موش الأخير بما إنو كيف السيد يوسف الشاهد توجّه لمنطقة السبالة بش يتقدم بالتعازي لعايلات الضحايا عرضو تركتور معبي العباد كيف الهوش. و كيف العادة و العوايد ركبوا عالحدث  و حوّلوه في ظرف أقل من ساعة إلى ورقة لشن حرب سياسية مسّخة و قذرة ضد بعضهم . هوما شكون ؟؟ هوما الي نماهمش نحنا ! هوما الي أولوياتهم الكراسي و موش الشعب ! هوما الي هاجسهم الوحيد نسب ونوايا التصويت و معاهد الإحصاء ! هوما الي توة سنين في الحكم و ما قدموش حاجة عليها القيمة لا للصحة و لا للنقل ! هوما الي كل ما تصير كارثة تهزّ البلاد يدعيو لسنّ قانون ( مورد رزقهم و يرزيهم فيه)  و لا لحوار وطني ( يرحمو الي قال حمار وطني) ! هوما الي ضربوا شهور يتعاركوا في التلافز و في الصحف و عبر الوزارات و المجالس بأنواعها على مناصبهم و على شقوقهم ! هوما الي يحسوا بينا كان كيف تتخذ الدنيا و يسيل الدم و يتحلوا الجبابن بش يتحفروا فيها القبورات ! هوما الي سكتوا و ما علقوش و ما وقفوش البلاد بعد ما تكلم السيد الدوعاجي رئيس لجنة التحقيق كيف تكلم و قال " أطراف من خارج مستشفى الرابطة أمرت بعدم إجراء التحاليل اللازمة لكشف مصدر الجرثومة" !! هوما الي كيف صار إجتماع طارئ في مجلس نواب الشعب بعد حادثة السبالة جاو منهم 3 نايبات فقط !!!!

هوما الي القانون يتطبق عندهم بالوجوه هذا نسكّرولو  ب ما إنو خارج على القانون وماهوش يحترم فيه ولا خر متاعنا نطفيو عليه الضوّ !!! هوما الي يقتلوا الميت و يخرجا في جنازتو و بعد ما يدفنوه يولي يتبرعلهم و كيف تضيق عليهم السبل و يتفضحوا يمشيو للكليات و الجامعات آش قالك آش قال عليك ندوة علمية ... يا ربي و إنت ربي حتى العلم في هالبلاد إستفعلوا فيه !! هوما الي كيف يدخلوا لحرم جامعي يحلوا فانيكهم فوق الكراسي و يتشلڨحوا تقول يعملوا في كعبات على حرف بحر !!! هوما الي فجأة يوليو ناجعين، فاعلين، قادرين، أشهرة قبل الإنتخابات !!!! هوما الي ماكشفوش على الحقايق الي الشعب عايش بوجيعتها وحيرتها  : التنظيم السري و شكون قتل براهمي وبلعيد !

كميونة ... تركتور ... يعبيو النساء على بعضها... فحادث ...فموتى ... فحملة تعاطف...  ففولارة خضراء تعلقت و لبسها الي يسوى و ما يسواش... فرملي ... فجرثومة ... فوفاة 12 رضيع ... فكراظن ... فبلاد خاضت ... فلجنة تحقيق ... فما ثمة والو !  فنمرّ إلى نغم متع سنية مبارك !!!  هاذي دورة الحياة في ربوع  تونس الّي ولاّو فيها الي دايرين بالسلطة أكثر ببرشة ملي دايرين بالوطن! أما هالمرة ماعادش نغم لسنية مابرك ... ولّى نغم لفهمي الرياحي!

فهمي الرياحي إلي أحيا و حفّل حفل إختتام مؤتمرحزب الشاهد !!!  إلي البارح خذا الكلمة بعد سليم العزابي في هاللمة الكبيرة ! و نسج الشاهد على منوال بوه الروحي الباجي قايد السبسي و بدا خطابو بدرس حول تاريخ تونس بعد الإستقلال و الحركة الوطنية التونسية و كأنو يجاوب في الباجي بعد الدرس الي عملو في قصر قرطاج . و من بعد ذكرنا إنو المرا التونسية هي كل شيء : مالة هاك المليون متع الباجي لازمهم شوية تبندير و فازات و عطى ضريبة للي حاولوا يخليو المرا التونسية "مكمّلة" و الي حاولوا يرجعوا بنساء لتونس بالتوالي : يحكي على حلفائو في النهضة ! يا سي يوسف نحنا راهو كيف صوتنا للنداء ، نفس النداء الي عيّنك رئيس حكومة على هذا السبب و إنه من المضحكاتر المبكيات اليوم إنك 5 سنين بعد ترجع تجبدلنا نفس اللوبانة وقتلي كارك سيادتك اليوم تقول بالأرقام و بالوثائق شنوة الي صرا و شنوة الي تحقق 5 سنين من بعد للنساء الي ولاّو اليوم كيف الشباب كيف الأمن أوراق إنتخابية للأسف تنجموا تلتاعوا بيهم وقت يجدّ الجدّ !!!

عجبني السيد رئيس الحكومة يوسف الشاهد كيف حكى على خيبة أمل التوانسة و قال بعظمة لسانو " الي يشوف التسيّب و الفوضى و عدم إحترام القانون ينجم يحصل عند هالإحساس ... موش جاي من الدميقراطية  و المشكل الناس الي تتصور انو الديمقراطية هي الفوضى ، كل واحد يعمل الي في مخو وانو حرية التعبير انك تسب و تغالط وتهتك أعراض الناس  إضعاف الدولة و إضعاف سلطة الدولة ...الناس هاذم هوما الي قاعدين يكرهوا في التوانسة في الديمقراطية ". شكرا سي يوسف ! شكرا على هذا  الدرس  القيّم في التربية المدنية و الحال كان كلامك يعجب برشة و عندو قيمة أكبر لوماكنتش إنت الحاكم و إنت الدولة و إنت عليك تطبيق القانون و إحترامو ... وإنت المسؤول الأول عن تقوية ولا إضعاف الدولة بسايساتك و قراراتك و الإجرا ء ات الي تاخذها . غريب إنو السيد رئيس الحكومة يحكي و كأنو خارج السلطة و كأنو خارج منظومة الحكم . علاش زعمة ؟ نتصور خاطر حصيلة سنوات حكمو كارثية !!

و تخمّر رئيس الحكومة بعد ما حكى كلمتين على الإقتصاد و فسرلنا الي من أسباب إنهيارو هو الإرهاب و قالك " الناس هاذم ماعندهمش بلاصة بيناتنا . الي يحبوا يقصوا اليدين و الساقين . الي يحبوا يرفعوا راية أخرى ماعادا الراية الحمراء و البيضة متع تونس " و هكاكة صفّق الجمهور تصفيقا حارا و هبوا و فزّوا و فزعوا و هاجوا و ماجوا ... و "أنا بعيّط و... و أنا بعيّط و يقلي يا ابني ما تخافشي حانبنيلك مساكن شعبية و أنآآآآآآا بعيّط !!! "*

تفكرتوه المقطع من مسرحية شاهد ما شفشي حاجة !!! طلع الشهد الي ما شافشي حاجة متاعنا ! ياخي الي دعاو لقطع اليدين و الساقين موش الشورو و اللوز الي هوما من حزب النهضة و الي هوما شركائك و حلفائك في الحكم ؟؟؟ ياخي الصحبي عتيڨ الي دعا لسحل المناضلين ( الله يرحم لكطفي نڨض الي مؤخرا قضيتو للمرة الألف تأجلت)  موش في حركة النهضة الي بيها تقويت و نجمت تواجه الباجي قايد السبسي ؟؟؟ هاو بيناتكم يا سي يوسف ... هاو بيناتكم و عملوا جهاز سري و إنت ماسمعنالكش  عليه كلمة تطمن التوانسة الي يوم الناس هذا عايشين بصدمة إغتيال شكري بلعيد الي كان من المفروض وقتلي تربط تاريخ تونس بحاضرها في معركة التحرر الوطني و الدفاع على الجهمهورية المدنية تسمية الى جانب حشاد و بن عاشورو بورڨيبة و غيرهم !

و ختاما كيف تسمع خطاب الشاهد تقول "هنا وصلت" لو لا الواقع الي نعيشوا فيه و الي يأكدلنا إنو كلام الأحزاب مدهون بالزبدة ... في إنتظار الأرقام و البرامج ما بقالنا كان نقولو " الصبر لله و الرجوع لربي " كيفما قال المرحوم عبد الرحمان الكافي.