alexametrics
آراء

التونسي : قنديل باب منارة

مدّة القراءة : 4 دقيقة
التونسي : قنديل باب منارة

 

حياة عمري يحكيولي على قنديل باب منارة الي ما يضوي كان عالبراني ... دار الوقت وا لزمان و عشتها و ريت شعبنا السمح الذي أبهر العالم بثورته السلمية يلعب في دور قنديل باب منارة ....

التوانسة اليوم عندهم من التحديات  و المصايب و الكوارث  ما يكفي قرون أخرى ... نهزّوا ساق تغرق لخرى ... نصلّحوا الحريات نترزاو في الإقتصاد ... نحققوشي نسبة نمو إيجابية اليوم ياقف الفسفاط غدوة .... نحلوشي أزمة التعليم نلقاو أزمة في النقل .... نقولوشي ثمة أمن موازي و ثمة صغار يدربوا فيهم في "مدرسة قرآنية " بش يطلعوا يعملولنا شوية سبور كيفما قال طروش , من غدوة في سبر الأراء تطلع النهضة الاولى في نوايا التصويت ... حاصيلو مخك يا قف !!!!أما الي يزيد يوقفّلك تقريبا كل نورونات راسك إنو في خضمّ هالأجواء العالمية التوانسة نساو هذا الكل و قرروا إنهم يتحفونا و يتحفوا العالم بخبرتهم في مجال التحليل السياسي و الجيوستراتيجي و الامني كان لزم .

 

بعد إصدار عقوبة الإعدام في مصر ضدّ 9 شبان  ترى تصاورهم تقول  نور رباني خارج من عينيهم ... تقول ممثلين و لا شخصيات مشهورة: قامت الدنيا في تونس و ما قعدتش !!

توانسة يندّدوا  و يدعيو لإسقاط حكم العسكر ... توانسة يدعيو في السيسي لإحترام حقوق الإنسان و تطبيقها  ... توانسة نظّموا وقفة إحتجاجية أمام السفارة المصرية في تونس ... توانسة عاملين عرايض و يدوّروا فيها ... توانسة يبكيوا بعد ما بارتاجاو فيديوات أمّاتهم  يبكيو ...

 

للتذكير  ال 9 الّي نحكيو عليهم مدانين بإغتيال النائب العام في مصر ... واحد منهم قبل منام عينو مخلّي جواب لوالديه يبشّر فيهم إنّو من أهل الجنة بما إنّو إختار طريق الجهاد ... بلاتوات تلفزية و مقالات صحفية و بيانات من جمعيات عريقة كيفما جمعية القضاة التوانسة و الخ ... مانيش بش نغوص في حيثيات القضية  ... و موش لازم نذكّر الي أنا شخصيا ضدّ عقوبة الإعدام ...

أمّا زادة ضدّ الترهدين و التنوفيق و الكذب . التوانسة الي سخفّوهم التسعة المصريين و غاظهم تطبيق حكم الإعدام ضدّهم و قالوا الي الإعترافات صاروا تحت التعذيب عاملين سياسة حلال علينا حرام عليكم : نرجموا الزانيات بالحجر أما ضد عقوبة الإعدام ! نقصّوا يدين السارق أما ضد عقوبة الاعدام ! نغتالوا الي يخالفنا الرأي أما ضدّ عقوبة الإعدام ! نتشمتوا في شكري بلعيد كيف تمّ إغتيالو اما ضد عقوبة الإعدام ! شهداء الأمن و الحرس و الجيش طاغوت يستحوا القتل أما ضدّ عقوبة الإعدام !!! 

التوانسة  و برشة منهم الي  تكلموا في القضية هاذي ماسمعنالهمش صوت و ما قرينالهمش بيان و ما رينالهمش وقفة إحتجاجية وقت حادثة معتقل الرّڨاب !!! ما دافعوش على الحريات و الحقوق وقتها !!! ما تحيرتلهمش حتى شعرة وقت صغار تمّ إغتصابهم لا !!! ثمة شكون قالك مختطفين و كيفاش يعملوالهم فحص شرجي و الحال إنو إذا ثمة فحص اليوم لازم يصير راهو لمخاخ هالفيّة الي في عوض ما تتلهى في همّها و في حالها مغطسة راسها في البلدان لخرى على أمل يعاودوا يحيّروا لوبانة الإضطهاد و القمع  إسطوانة التسخيف و الإستجداء !!! كهو عاد الإنتخابات قربت و توة ذراعك يا علاّف : كلّ شيء يصلح بش نقرقشوا شوية أصوات و نلمّوا صفوف الناخبين !!!

 

و التوانسة الحقوقيين بيدهم ولا خلّينا بش نعملوا الفرق بينهم و بين لخرين نقولوا الديمقراطيين الحداثيين : موش كان تلهيتوا بلي صاير في بلادكم خير ؟ موش كان نجحتوا في تحقيق  أهداف "ثورتكم" خير ؟ موش كان نددتوا بالخمج و الانتهاكات الي في بلادكم خير ؟؟ ويني بياناتكم فيما يتعلق بالرڨاب ( ماعدا قلة تتحب على صوابع يد وحدة ) ويني بيانتاكم بعد حملات التشوية و الدعوة للعنف و القتل ضد الصحفيين ؟ ويني بياناتكم وقت المثليين اليوم يتسجنوا و يتعرضوا لكافة أشكال التعذيب داخل و خارج السجون ؟؟؟

المناسباتية متاعكم في  الدفاع عن حقوق الإنسان و تدخلّكم في شؤون الدول الاخرى وقتلي يساعدكم ولّى مقرف و مخجل و مخزي ...ماسمعناش و لا كلمة علي صاير مثلا في سجون السفاح أردوغان . الحقوق و الحريات ما تتجزأش و ما تتقسمش و مافيهاش أولويات  يا تدافعوا على كل المظطهدين يا  عاونونا بسكاتكم : زايد قنديل باب منارة ما يضوي كان عالبرّاني !!!

 

كملّناشي من مصر ؟؟؟ بسرعة الفرطسة إنتقلنا إلى الجزائر . توانسة حاطة  تصاور بوتفليقة في شبابو موش في كرّوسة مشطبين عليها بالأحمر . توانسة حاطين تصاور الجزائر . توانسة يبارتاجيو في أرقام و إحصائيات على نسبة  الفقر  و البطالة و التهميش في الجزائر. توانسة تبارتاجي في تصاور المسيرات و الفيديوات الي صحيح و الي مفبرك . لين وصلت شكّيت قلت لعلّ  و عسى  أنا من غير ما نفيق في الجزائر عايشة.

 

 

صحيح  إذا إنسان يحمل قيم ماينجمّش ماينخرطش ولا علقليلة يكون مساند لقضايا التحرّر في العالم أمّا موش لازم يفكّ العزاء لإمّاليه و نورمالمون الكلنا نغزروا لجارتنا ليبيا  و نتفكروا الدور الي لعبناه قبل و بعد ماطاح الڨذافي. نقول هالكلام لسببين بسيطين :

 

ــ مساندة الشعوب يبدى يوفى بالنسبة ليا في إنجاح تجربتنا الديمقراطية. البلاد الي غارقة في الديون و البطالة، البلاد الي نخبتها هي نكبتها ، البلاد الي على أبواب إنتخابات مصيرية و مازال شعبها مايعرفش لشكون يسوّط ، البلاد الي تعليمها التالي وليس القدام، البلاد الي نسبة الإنقطاع فيها عن التعليم وصلت لأرقام مرعبة ، البلاد الي جامعاتها في آخر ترتيب الجامعات في العالم، البلاد الي جوامعها مصدر إرهاب، البلاد الي هي أولّ مصدّر للإرهابيين ، البلاد الي الذمم تتابع و تتشرى فيها بالفلوس بصراحة رغم  بعض مكاسب الحريات الي لو كان تزيد الأزمة الإقتصادية تستفحل تو نترزاو فيهم ما نتصورش مازالت تنجم تكون بلاد مغرية بش شعوب العالم يتبعّوها و لا أصلا تنجم تكون هي في مركز أو موقع يسمحلها بإعطاء الدروس و التدخل في شؤون الشعوب الأخرى : الشعب الجزائري ، حسب رايي له من التجربة خاصة بعد العشرية السوداء، إنو يقرّر مصيرو وحدو دون تدخّل أي طرف . له واجب زادة تحمّل نتائج قراراتو و خياراتو .

 

ــ أنا كتونسية أكيد لو كنت في مكان الجزائريين راني كنت في الشارع ضدّ ترشح بوتفليقة لكن مانيش جزائرية و نعرفوا الكل شنوة تنجم تكون نتائج فوضى تحلّ بالجزائر الي نحبوا ولا نكرهوا بلا مساندتها و دعمها خاصة فيما يتعلق بالإرهاب و مراقبة و حماية الحدود رانا من هاك العام مشينا زيزي . هذاكة علاش ساعات لازم ساعات نختارو موقع المراقب و السكات إلى أن توضاح الصورة أكثر . تفرجت شوية على تصاور المسيرات التي جابت شوارع المدن الجزائرية : وجوه منورة ، أغلب المتظاهرات سافرات ، و شباب يعمل الكيف لا جلباب و لا قميص و لا شوالق كحلة و لا كتب قرآن مهزوزة في مسيرات : فكروني بحالنا نهار 14 جانفي . تقول من غدوة بش نصبحوا كيف سويسرا ولا فرنسا ... إلى أن طلع البدر علينا و صار الّي صار و هانا الي يوم الناس هذا نعانيو !!! نتمنّى انو كل شعوب العالم تعيش و تنعم بالحرية أما الي ريناه توة 7 سنين  من عنف و دمومات  من تونس لسوريا و نحنا متعدّين بليبيا و العراق يخلّي الأمل ضعيف ... أضعف من دولة يتمّ فيها تركيز معتقل لتدريب الإرهابيين على الكيّاس على بعد كيلومترات من معتمدية

تعليقك

(x) المدخلات المطلوبة

شروط الإستعمال

Les commentaires sont envoyés par les lecteurs de Business News et ne reflètent pas l'opinion de la rédaction. La publication des commentaires se fait 7j/7 entre 8h et 22h. Les commentaires postés après 22h sont publiés le lendemain.

Aucun commentaire jugé contraire aux lois tunisiennes ou contraire aux règles de modération de Business News ne sera publié.

Business News se réserve le droit de retirer tout commentaire après publication, sans aviser le rédacteur dudit commentaire

Commentaires

Commenter