إلي شاح يلبس …

إلي شاح يلبس … أفرقوا الحضبة. البارح إنتهى مسلسل اللطخات بالكارثة العظمى : 217 نائب ونائبة أداو القسم . و هو قسم ؟؟؟؟ عبد يتفرج تقسم بالضحك .

على وضوك يا سي خليفة مازالنا لا دخلنا لا في مناقشة ميزانيات و لا في مناقشة مشاريع قوانين إلا و بدى العياط و الزياط : عبير موسي تسيبت ترتع و تطلب في نقطة النظام ... النائب الي بجنبها يغني في النشيد الوطني و يدو قريب تتنطر تجي في وجهها ... الغنوشي تالمون مرّضتو ولّى يوكوك و بعد قالها "شد بلاصتك خيرلك" ... عاليمين من فوق غادي واحد هابط يتكركب في جبة تقول ماشي لطهور ولا لعرس ... عاليسار اللوطة زويز هازين أربعة صوابع ، مالأول حسيتهم يطلبوا في 4 قهاوي و بعد فهمت إلي هو شعار رابعة ... موش رابعة العدوية !!  لا رابعة متع الخوانجية ... وحيد متكي و حالل ساقيه تقول قاعد في قهوة على حرف كياس يڨانص في الماشي والجاي .... لاخر مسكر ساقيه خايف لا تهبط عليه العينين ... سوڨ ودلاّلة ... و إنتهت أول جلسة بإنتخاب رئيس مجلس نواب الشعب : راشد الغنوشي كرمه الله تربع أخيرا فوق كرسي من كراسي الحكم و عينيه مدمعة و صوتو يرعش بعد يديه من كثرة الفرحة .

هو فرح و بدا الغريد على فايسبوك : ماهو جماعة نبيل القروي الي عداو حملة كاملة يدعيو في الناس تصوتلهم خاطر مستحيل يتحالفوا مع النهضة صوتوا للغنوشي ! ماهو جماعة نبيل القروي الي حملة كاملة يقنعوا فينا إنو إذا  نبيل في الحبس راهو في جرة النهضة و النهضة ما تحبش نبيل يربح صوتوا للغنوشي ! ماهو المواطنين الي عملوا الحملة معاه و فرحوا إنهم لقاو مرشح ديمقراطي و حداثي بش ينقذ البلاد من آفة الإخوان و صوتولوا و هوما بش يموتوا بالفرحة بداو يندبوا و يهبطوا فيهم حيار على الفايسبوك ...

و تأكدلنا إنو الديمقراطية في تونس ولات حاجة مقرفة من قبيل : أعطيني صوتك و يعمل الله . ولينا نعيشوا مع طبقة سياسية و أحزاب  ماعندها حتى أخلاق وما عندها حتى مصداقية تتلاعب بالبرامج و بأصوات الناخبين كيفما ما عمروا صار في العالم على حد علمي .

كل الأحزاب في الفترة الأخيرة بعد ما طلع سعيد رئيس للجمهورية ، الكل تقريبا بما في ذلك كتلة إئتلاف الكرامة قالوا إنهم موش مستعدين يتحالفوا مع النهضة و إنو الشعب إختار النهضة للحكم و هي لازمها تحكم و تخدم البرنامج الي الناس صوتتلها عليه . كلام زين و شباب . لكن في نفس الوقت في أول تجربة ، في أول خطوة حكم , بينوا إنهم  الكلهم طامعين و ماعندهمش من الجرأة و الشجاعة إنهم يعطيو للنهضة بظهرهم و خير دليل الي عملوا حزب قلب تونس . مسكينة تونس و اكهو.

إلي يقهر بخلاف انو الشعب الكلو يعرف شنوة عملت النهضة في البلاد ، اليوم نلقاو شيخها رئيس مجلس النواب  و إنو هالطبقة السياسية متع ما يسمى الحداثيين و التقدميين طلعوا بلحق ينطبق عليهم الشعار " يا حداثي يا بوهالي عملت ثورة و عطيتهالي" : ياخي الي ترماو البارح بدون أدنى شرط كيفما قالت يمينة الزغلامي و صوتوا للغنوشي ، نساو ماعندهاش أشهرة شنوة صار في النداء ؟؟؟ نساو الي النداء الي كان الحزب رقم 1 خمسة سنين لتالي اليوم إندثر و جاب مقعد واحد ؟؟ ما فهموش ، ما خذاوش العبر ،  ما إستوعبوش إنو أي حزب يقرب للنهضة يتحرق و يموت ؟؟؟

يظهرلي فهموا و نحنا هوما الي ما فهمناش :

همهم الوحيد الكرسي  و من كثر الغباء و الطمع ينساو الي بهالطريقة ما ينجموا يدوموا في حتى منصب ولا ينجموا يعملوا حتى حاجة ، ولا قلي هوما أصلا شنوة يحبوا يعملوا ماعادا إنهم يخدموا مصالحهم الضيقة و يزيدوا يعبيوا كروشهم ؟؟؟

بعد المشهد السريالي و الكم الهائل من خيبة الأمل الي عشتها البارح كيفما برشة  توانسة لازم عبد يقبل بواقعو و يتقدم للنهضة بأحر التهاني و يقلها برافو ، طلعت إنت و قياداتك فاهمين الطرح و طلعتوا إنتوما وحدكم تعملوا في السياسة  و كيف عبد اللطيف المكي قال " بش يجيونا و بش يتحالفوا معانا ، هذا الكل فقط لتحسين شروط التفاوض " شخصيا قلت ملا رقعة وتوة نقول ملا حنكة و ملا خبرة . طلعوا يعرفوا الي ما يسمى بالحداثيين هوما كمشة خماسة  كيف ما  يقول القروي ، كمشة إنتهازيين و طماعة و قاتلتهم على أمل تقضي عليهم نهائيا اللهفة متع السلطة و الحكم . لك الله يا تونس ولك الله يا شعب تونس . السياسة في تونس ولات نهائيا مستنقع للجراثيم و الأمراض الخبيثة بأنواعها …