إلي تهزوا ساقيه العصا ليه

في فترة إنتقال ديمقراطي و أزمة سياسية و إقتصادية يخنقوا : كمّ المشاكل و التحديات الي تستنى في الشعب التونسي تحصى و لا تعدّ. بين دينار ماشي و يتفرشخ و الإقتصاد الموازي و الوضع الأمني و الحرب بين نداء حافظ قايد السبسي و حزب الشاهد الجديد و تلوعيب النهضة و الاضرابات بما في ذلك العامّ متع 17 جانفي و الإضرابات الاخرى ... الشعب التونسي الي هو جزء كبير من اللعبة السياسية و الضامن الأساسي في نجاح الديمقراطية ماعينوش ، ماظهرلوش ، ما في بالوش ، ما على بالوش بهذا الكلّ و كيف نقول الشعب نقصد الأغلبية منّو . باش متلاهي شعبنا السمح الذي أبهر العالم ؟؟؟

يرحمو إلّي قال " مخّي حبس !!!" خاطر شعبنا الي وطنيتو ولات مناسباتية و مربوطة بالعظم الي ما ثمّاش و الحليب الّي بلاش طابوات و حكك الطماطم الي بش تتقطع ... إهتماماتو غريبة و مريبة نوعا ما.

إذا كان حسب موقع الإتصال الإجتماعي و عناوين بعض الصحف و الجرائد و المجلاّت الموضوع الّي شغل فكرنا كشعب و طيّر علينا النوم و حرّك فينا شعرة معاوية و الوطنية و النضال هو : عقد قران مغني الراب كادوريم بنسرين بن علي فأعلم أيها القارئ أنّو القاع طلع ما عندوش حدود !!.

الحقيقة موش الموضوع في حدّ ذاتو الملفت للإنتباه قدّ ماهي التعاليق و ردّة الفعل الناتجة عليه هي الي تحبّس المخّ.

أوّلا ... و قبل كلّ شيء كيف نعرفوا على إمتداد سنوات بعد ثورة مات فيها الي مات و ضاعت فيها بلاد بش الناس تستمتع بحرية التعبير إنو الأخوين الشابي و حصصهم العقيمة تصدّروا  نسب المشاهدة ما ثماش علاش نتسغربوا من إنو عرس يشدّ الانتباه و يحدث هالشوشرة الكلّ.  التونسي ، عندو قدرة عجيبة و خارقة للعادة إنو يدخّل عينو من نقبة إبرة بش يشوف شنوة يصير في حياة التونسي الي بجنبو. التنسنيس و التكوليف ولاّو رياضة وطنية أصلا.

ثانيا التعاليق إلي قسمت التوانسة بين جماعة البندير ، الي توحشو الزعبع و فترة حكمو المزدهرة و ديمقراطيتو الي يضرب بيها العالم المثل و محاربتو للفساد و التوانسة الي نعتو نسرين و ليلى بن علي بأبشع النعوت .

الجماعة الأوّلانين لا لوم عليهم خاطر الي ذاق من قصعة التلحيس و الذلّ مستحيل يبعد عليها. و الأدهى و الأمرّ إنو الفصيلة هاذي من المخلوقات الغريبة اليوم تطالب بحقوقها و تتكلّم و تكتب و تحكي و تناقش بآليات منعهم عليهم بوهم الحنين. الناس هاذم ناسين الّي لو كان جاء بن علي في الحكم راهم حتى كان جاعوا و ماتوا بالشرّ و تفاقمت البطالة و زدم الإرهاب ماينجموا لا يقولوا و لا يعملوا شيء ، ولاّ راهم كل واحد فيهم و هو مازال يخمّم بش يقول كلمة يلقى روحو في بوفردة. ثقافة شدّ مشومك لا يجيك ما أشوم هي ثقافة العربان الي اليوم العالم كامل قاعد يقدّم و هو مازال شادد في الخيم و الصحراء و بول البعير. و التوانسة هاذم الي إختارو الأطلال و البكاء على نظام سكرّ بلاد بش ترتع فيها عايلة وحدة هوما بيدهم الي اليوم كيف تشوف نوايا التصويت تلقاهم ناوين يصوتوا للرجعية و الظلاميين.

أمّا الصنف الثاني من التوانسة لازمو لحقيقة ــ مساحة أكبر من كرونيك ــ لازمو معاهد إستراتيجية و مراكز بحث و جامعات دولية ثمّاش ما يحنّ علينا التعالى و نفهموا التركيبة الذهنية و النفسية متاعو:  تقول مخزّنين في قلوبهم قرون من النقمة و الكره للمرا. الصنف هذا من أتباع "الراجل ما يتعابش" و الرجال الكلّهم ضحايا كيف سيدهم آدم. و ماهماش قادرين ــ خاطر ما يخمّموش بمخاخهم أماّ بحاجة أخرى ــ يفرّقوا بين الإختلاف السياسي و السبان و التشويه. و فيهم الي للأسف من مساندي حريات المرأة أما كيفما يقولوا ناس بكري كسكسلو يرجع لأصلو .

ثالثا وقتاش شعبنا السمح الذي أبهر العالم ناوي يفيق شوية من سباتو العميق و يحلّ عينيه ، وذنيه و يصحصح.  التونسي يحبّها سابڨة و جرّاية و ما تاكلش الشعير، إستانس باللقمة الباردة و الرزق الي ماتت إماليه : بعد ما يفوت الفوت يخرج يندب و يعيّط على الوضع و الأحوال . خارج مالطرح جملة ، ما على بالوش و يحبّ الأمور تمشي عال العال.

نحبوا إقتصاد وطني مزدهر و نحبوا بلاد بلاش بطالة و نحبوا شعبنا لابس و شايخ و شبعان و نحبوا تونس تولّي دبيّ و نحبوا جامعاتنا من أقوى الجامعات : نحبّوا و نجّموا نقعدوا نحبّوا على أرواحنا. خاطر إذا الجزء المهمّ في اللعبة الانتخابية، إذا المنتخب، إذا المواطن اليوم إهتماماتو هي "بيوت نوم الناس" و ماهياش المشاريع السياسية و الاقتصادية شنوة الي بش يتبدّل ؟؟ حتى شيء . الجهد و الطاقة الي نبذلوا فيهم في متابعة هالتفاهات لو كان نعطيو شطرهم بش نحاولوا نفهموا بعض الأرقام في إقتصادنا و بعض النقاط في البرامج الي صوتنا عليها و ماصار منها شيء و كان نحاولوا نفهموا التركيبة الجديدة ــ القديمة لبعض الأحزاب الي للأسف شبابها نسجوا على منوال شيّابها موش خير ؟؟؟

و إذا موش خير : إذا عرس كادوريم خير و كلبة مريم الدباغ خير و حرقوس علاء الشابي في خطبتو خير و الأمثلة تحصى و لا تعدّ في هالقاع الي ولينا عايشين فيه مالة وقتها يصحّ علينا " مثلما تكونون يولّى عليكم" و الي تهزوا ساقيه العصا ليه.