alexametrics
آراء

سوڨ ودلاّلة ....

مدّة القراءة : 2 دقيقة
سوڨ ودلاّلة ....

 

كلّ يوم إسم جديد . كلّ يوم تشكيلة جديدة . كلّ يوم مبادرة جديدة . كلّ يوم باتيندة جديدة.... سوڨ و ودلاّلة ... و كلّ واحد برّاح يبرّح . الشيء من مأتاه ماينجمش يكون مستغرب و الكلنا كنا جاهزين نفساويا ( نفساويا هو مزيج بين نفسية و مأساوية )  للعرض الي بش يعيشوا الشعب التونسي قبل إنتخابات  2019. ما يزيش هالعرض يكمّلوا علينا شركات سبر الأراء : كل مرة يطلعولّعولك أسامي نوايا تصويت التونسيين تحسّ الدوخة تلعب عليك. و بالطبيعة قبل آوانها إنطلقت الحملات الانتخابية : مأساة . تصريحات تتراوح بين الشعبوية و بين ضرب من القباحة يأكّد إنو القادم أعظم . إنو القادم أتعس . إنو القادم أخطر.

 

و في إطار سوق الإنتخابات شنوة مازالنا ماريناش ؟؟؟ العجب ريناه !!! رينا أستاذ قانون دستوري يفسرلنا إنو قانون المساواة في الإرث ضد الإسلام ! رينا  إعلاميين يأسّسو في حركات سياسية و نساء تونس الكل ولاّو فجأة يحبّوهم !!! رينا عبير موسي راكبة على حصان و طبال يضرب في مشهد سريالي يحسسك إنو تونس الكل ولاّت نكتة تبكّي ما تضحّكش !!

بدات البنادر تسخن و في الاسابيع المقبلة شطرها بش تولّي مزاودية تنفخ في أشخاص بش تطيح كيف أوراق الشجر في الخريف .

 

كلّ واحد راكب على موجة : الي موجة "ضدّ الخوانجية " ، الي موجة "ضد الدساترة "، الي موجة" ضدّ المساواة " ،الي موجة "شرع الله"  ... كلّها إلى حدّ الآن حسب ما نقراو في التصريحات المختلفة ولا برنامج ، و لا كلمة على الإقتصاد، ولا كلمة على المشاريع و لا رقم ولا كلمة على الفساد: يعني إلّي خفنا منّو و نبهّنا ليه، طحنا فيه و مازالنا بش نزيدوا نغرقوا فيه لين  تغرق البلاد فرد مرّة .

 

من بين المترشحين الي شدوا انتباهي : ترشح منجي الرحوي . هو في الحقيقة البعض يقولوا مناورة و البعض الآخر يقولوا محاولة تفكيك الجبهة و البعض يقولوا سلوك غير ديمقراطي. كيفما برشة توانسة تابعت الترشح هذا و البوبلي إلي حلّوا في الجبهة الشعبية .

الجبهة الشعبية الي في الانتخابات البلدية أكدّت إنها اليوم حركة سياسية لا وزن لها و لا شعبية لها الا إعلاميا و عبر ملف الشهيدين البراهمي و بلعيد. الجبهة الشعبية إلي ولاّت عبارة على فرع تابع لحزب العمال الشيوعي االتونسي الي أمينو العام  أُنتخب لهذه المهمة مدى الحياة . الجبهة الشعبية الي اليوم بالأرقام و بسبر الأراء ناطقها الرسمي و مرشحها للإنتخابات يذكرّنا في مقولة لطفي زيتون كيف يحكي على جماعة الصفر فاصل. الجبهة الشعبية إلي اليوم تحولت لكاراكوز عند عدد مالتوانسة  :  ديمة ضدّ ، ڨفّة مباركة و هات من هاك اللاوي ...

وقتلي منجي الرحوي أعلن على نيتو في الترشح لاحظت كيفما عدد مالتوانسة إنو الغزرة تبدلّت و الي الناس تلفّتت للجبهة و الي الناس  في ظلّ هالرداءة و المشهد السايسي المقرف ، في لحظة ، راو في منجي الرحوي إمكانية تصويت للجبهة ... لكن للأسف الجبهة الشعبية ما تنظرش للأمور كيفنا نحنا المواطنين و الشعب ، عندها نظرة أخرى للأمر : نظرة محجّرة كالصمبة ، ما فيها حتى إمكانية نقاش و تبادل أراء و فيها و هذا الأخطر رفض قاطع للي يقولوه الناس  و إختاروا مرة أخرى إنهم يتلفّتوا للمرحلة و للتاريخ بظهرهم برفضهم من جهة لإستفتاء و لآليات ديمقراطية  بش يختاروا مرشح النهضة و برفض ترشح الرحوي. الي يزيد يبهّتك إنو ثمة ناس في الجبهة اليوم عندها من الوقاحة إنها تعطي دروس في الديمقراطية و هوما عاملين بمقولة " الله أحد الله أحد و حمة ما كيفو حدّ" و قتلي في الواقع الثمانية السنين لخرانين أكدولنا إنو "حمة حمة شيء ما ثمة ".

و قمنا ,في صباح  من صباحات أيامات ولات تشبه لبعضها,  على إعلان الجبهة عبر صفحتها رسمية و الإعلام على ترشيح حمة و نخليكم وحدكم ترجعوا لتعاليق التوانسة و لوابل السبان و النقمة و التفريك الي تعرضولو : فلذا من توة نجموا نهنّيو الجبهة الشعبية بفشلها الذي سيكون ذريعا في الانتخابات الرئاسية الجاية و يرحمك يا بلعيد آش خليت وراك !

 

تعليقك

(x) المدخلات المطلوبة

شروط الإستعمال

Les commentaires sont envoyés par les lecteurs de Business News et ne reflètent pas l'opinion de la rédaction. La publication des commentaires se fait 7j/7 entre 8h et 22h. Les commentaires postés après 22h sont publiés le lendemain.

Aucun commentaire jugé contraire aux lois tunisiennes ou contraire aux règles de modération de Business News ne sera publié.

Business News se réserve le droit de retirer tout commentaire après publication, sans aviser le rédacteur dudit commentaire

Commentaires

Commenter