دولة ولا كوري؟

ثمة سؤال ولّى تقريبا يوميا يجي لبالي نحنا وين نعيشوا؟ نعيشوا في وطن و لا حديقة حيوانات. في الحقيقة تالمون عندي ذكريات مزيانة على حديقة الحيوانات و على الشيخة الي كنت نحسها كيف نشوف كالحيوانات. يظهرلي مع الاخبار الي نقراو فيها كل يوم و نعيشوا على وقعها نجموا نقولو الس نحنا نعيشوا في كوري و لا زريبة.

مانيش بش نرجع على تضارب المصالح و تهمة الفساد الي توجهت للسيد رئيس الحكومة. اصلا انا هالفخفاخ لا صوتتلو و لا نهار نخمم نصوتلو و من اول نهار كنت عارفة صعيب يغلق العام.

مانيش بش نحكي زادة على التصعيد و الهجمة الشرسة الي يقودوا فيها الدواعش ضد الاتحاد العام التونسي للشغل و الحرب القريية حسب تصريحات امينو العام نور الدين الطبوبي. معركة كسر العظام الي قريبا قد تقود النقابيات و النقابيين إلى ساحة باردو.

الشأن العام مشين. خليني نحكيلكم على ما اتعس. على ما يندى اليه الجبين. على فضيحة أخرى تأكدلنا انو الدولة التونسية ما قعدلها من مقومات الدولة كان الاسم.

وائل تلميذ عمناول عدى امتحان البكالوريا. معدّلو وسط العام يتراوح بين 15 و 16 معدل. دخل وائل يعدي في الامتحان الوطني و هو ناسي و لا خلّى تليفونو في مكتوبو.  وائل ما فاقش بيه أستاذ و لا تشدّ متلبس مثلا ينقّل و لا يفسكي. هو كيف فاق مدّ تليفونو للاستاذ. و خلاوه يكمل يعدي امتحانو لكن رفعوا تقرير. اش صار؟ تمنع من بقية الامتحان و من الباكالوريا و دخول كل المؤسسات العمومية لمدة 5 سنوات.

توجه وائل و عايلتو للقضاء و ربحوا قضيتهم ضد وزارة التربية. و سمحتلو المحكمة انو ياخذ استدعاء و يعدّي السنة لكن…. وزارة التربية قالت لا.  في نفس التوقيت وائل يطيح في ديبريسيون و يفقد حتى القدرة على النطق و يدخل للسبيطار بعد انهيار عصبي. و في انهيارو انهارت معاه كل عايلتو.

سيدي وزير التربية تحية اما بعد،

فسرلي ، فسرلنا. دون الدخول في ملابسات القضية الس حسمها القضاء. حسب انا قلنون و شنية المشروعية الي عندك سيادتك انك ترفض تطبيق حكم قضائي؟

و فلنتفرض جدلا وائل خرق القانون بمعدللتو و بسيرتو الباهية الي شهدولو بيها اساتذتو مايكفيش انو عاود عام؟ كيف تدمر مستقبل طفل في مقتبل العمر و معاه عايلة شنوة الفايدة و الايجابيات؟ ماكانش اجدر بيك انك تشدد نظام المراقية و تحاسب الي صرفوا مياة الملاين في آلات التشويش على الذبذبات؟

كل يوم نتأكد انو تونس تحولت لزريبة. يحكمها الظلم و يغيب فيها القانون. و الي الضعيف يتداس و يتعفس و ما تتحمى فيها كان مصالح الفاسدين.

هاذي حادثة من بين برشة حوادث تهز في الرأي العام و تبين انو الوضعية بلحق كارثية. اذا اليوم المواطنين يلتجأو للقضاء للمطالبة بحقوقهم و الحفاظ على مصالحهم لكن رغم ذلك قرارتو تطيش في الزبلة على أنا عدل و على انا مواطنة و على انا دولة نحكيو. هاك العام كيف البارودي قال دولة البنان ماكانش عارف انو تونس بعد سنوات قليلة تحولت لكوري و الكوري منظم اكثر.

بوادر الانهيار التام للدولة اليوم ولات واضحة وضوح الشمس ما بقالنا كان نشعوذوا و نكبشوا في التراب السخون و الولية الصالحين.