تونس ولاّت دبي ؟؟؟

اللحظة عندما تأتي ، تأتي في أوانها و لقد أتت في اللحظة الي تكلم فيها عفاس نائب الكرامة و قال " علينا أن لا نخجل من التكفير فهو في شرع الله" .... عزمة على عزمة يا سيد ! إبداع! فريمون يرحم الدين والديك و أخيرا أثبتت و بصريح العبارة إنو عاش في تونس من خانها و من هو قادر على بيعها . إلي يغيض في الأمر و إلي يقهر إنو هالكلام ترفع في مجلسة قبة تدعي أنها مدنية و إنو الي قال هالكلام طلع بإستعمال وسيلة ديمقراطية بش يوصل للسلطة و يولي مشرّع ، شرَعّ، يشرّع موش بكفّ و إنما بالشريعة . الحقيقة ماعادش مهم لشكون تقال على خاطر مهما كان عدوك السياسي مغلّب عليك فإنو وجبت مواجتهه بإستعمال وسائل ديمقراطية تحترم القانون و القوانين المهيكلة لأكبر قطاع وحشي بعد التهريب ألا و هو السياسة .

تفكرت بعض وجه الشؤم الي سبقوه غادي على نفس الكرسي وقتلي دعاو بكل رقعة أشهرة بعد هروب بن علي و دعاو الي قطع أيادي المعتصمين : وقتها يحكموا ماذابيهم لا إضراب و لا إعلام ! و تفكرت في دقيقة كلّ الّي صار بعد هالنوعية مالتصريحات وصلنا بيه للإغتيالات السياسية و للإرهاب .  و كيف نربطوا بين الأمور و لو كان ما جيناش من أعداء نظرية المؤامرة لا قلنا : "سبحان الله، كل ما يبداو في خنقة سياسية و عارفين العباد على حافة الانفجار الوضع الإقتصادي يجيبولنا تسكرة ولا ثنين من أمثال العفاس و اكهو نغطسوا و نهبطوا في بعضنا و تخوض الدنيا و تلقاهم رابحين  شهير يمكمكوا فيه على راحتهم و يستغلوه بش يطبقوا برنامجهم التخريبي .

لكن خلينا بعاد على المؤامرة . ياخي نحنا فايقين بخطورة الي صار . ياخي نحنا واعين بفضاعة الي تقال ؟ لا لأننا أغبياء و حمقاء كعادتنا و كيفما أثبتنى في كل مرة في هالتسعة السنين الي تعداو . في عوض نفيقوا انو ايوم ثمة حركة إرهابية طلعت بأساليب ديمقراطية لمجلس النواب الشعب و تستغل في الجلسات العامة الي تتعدى في المباشر بش تكبر و توسع في قاعدتها باش لاهين ؟لاهين نسبوا في الشخص الي تم تكفيرو و بما إنها عبير موسي قريب يقولوا تستاهل بل و تقالت . تساتهل شنوة ؟ يعني مقتنعين إنو التكفير هذا بش يكون عندو عواقب على سلامتها الجسدية و حياتها و حياة عايلتها ولكن مصرين إلحاحا بفضل العماء السياسي و غياب البراڨماتية تعرضوا حياة سياسية للموت و الأتعس تهديد مسار كامل و أمن و إقتصاد بلاد ؟ هاذي حالة أشباه الثوريين لعنة الله على ثورة تصنع هالنوع من التفكير و الأساليب في التعامل ، الي خاطرهم فاشلين وخاطر ما قدروش يحققوا حتى هدف من أهدڤ الثورة اليوم مستعدين يعطيو مرة أخرى للنهضة و تفريخاتها . أيامات لتالي تعدات ذكرى إغتيال الحرس الرئاسي : بعد دعوة واضحة للتكفير في مجلس نواب شعب مازلنا عندنا وجوه مع عايلاتهم ؟ مازال فمنا نحلوه بش نبداو ننبحوا " يا شهيد إرتاح إرتاح !!!" ؟؟؟ السكات أرحملهم . بالنسبة ليا  من غير نقاش مهما صار : لازم التنديد بالتكفير كيفما التنديد بالعنف و ما ثمة حتى شيء يبررو ، لا و الأهم هو جريمة و لابد لمن إرتكبها يتعاقب و أشد عقاب زادة .

و كأنو الي حصل داخل القبة ما يزيش ، تتواصل الحرب و بلحق نجموا نقولولها خاطر هذاكة الي رينها ، فجأة تحول البرلمان لسقيفة حمام ... و عياط و زياط ... و عمت الفوضى المكان و هذا ما يزيد قناعتنا الراسخة إنو حال تونس مستحيل يصلح بمجلس مركب و معقد هكة و خاصة بسلطة تشريعية مكونة من مستويات رثة بهالشكل .  و شنوة بش يتصلح ؟ الناس شنوة بش تبدل؟ علاس الناس بش تتشجع تخدم و ثتني الركبة بعد ما وقفت لتونس كيف يراو ضرايبهم تخلص في شهاري ناس ايوم آخر أهمها واقع البلاد و حال ناسها ؟؟؟

الي قاعد يصير يشككنا إنو السيجومي ولات وجهة سياحية و تونس دبي… ....يظهرلي لا عندنا كورونا و لا عندنا بطالة ولا عندنا مشاكل دوايات و نقل و صحة و تعليم و بنية تحتية و أمن و فساد و إدراة و تعليم و إعلام و إقتصاد و تنمية و إستثمار .... ماعندنا حتى مشكلة لين ولى الشغل الشغيل لها أشباه السياسيين هو الانتصار لذواتهم المريضة و تصدّر المشهد الإعلامي بالفضايح .....