حلمة ولاّت كابوس

وفاو المسلسلات : وفى المايسترو . وفى القضية 460. وفى النوبة. ملا نوبة و ملا عبد الحميد بو شناق . و ملا شيخة  و ملا كيف . فروخ نار . كتيبة و ذوق و محبة بلاد و إحترام كبير للفن و للجمهور. عبد الحميد بوشناق إلي مانساش يشكر جمهورو على المتابعة و التشجيع .

 وفاو المسلسلات ، عادة البارح بعد القهوة العربي و صحين حلو تونسي ، قلت موش لازم تلفزة الليلة نقرى شوية . عندي كتاب محاذيني توة أيامات  كتاب " Fernando Pessoa " le Livre de l'intranquillité . قريت منو صفحات و هزني للبرتغال و شوارعو و تراكنو ، هزني زادة للبلايص الي نحنا العباد ماعادش نحبو ندخلولهم برشة خاطرنا نخافوا : كتاب يحكي فيه مولاه على روحو ، على وجه منو ، يغرق و يغرّقك معاه في جواجيه ، يغزر للناس و لي داير بيه كأنو لاهو منهم و لا هو عايش معاهم ... لين هزني النوم .... و

نلقى روحي في ربط الحلفاوين .  قفّة في يديا و هابطة خطيوة خطيوة لمارشي القلّالين . شارع يغلي بالعباد : كلها تحكي وحدها ، تعيّط كشاكشها هادرة ، عينيها زايغة، بزاقاتها تتناطر ، يديها متشعبطة في السماء : هذا يعيط يحيا بورڨيبية و لا خر يجاوب فيه : يحيا بن يوسف ، جدودنا فلاڨة و جدودكم ...

تقصّ عليها مرا و تبدى هيا بيدها تعيط : يحيا بن علي ! يحيا بن علي ! الله أحد و الله أحد ... و تقص عليها مرا عزوزة هازة قفة و لابسة سفساري و بدات " الله أحد الله أحد و البجبوج ما كيفو حدّ " .

 وفقت في وسط محطة الكيران متع باب الخضراء و قعدت نثبت ، باهتة ، و بديت نقرص في روحي لين لحمي زراق : ياخي نحلم ولا بلحق ؟؟؟ !!! " قدمتش شوية  نرى في راجل وجهو موش وجه هالربط ... شعرو بالڨومينة ، مكستم ،  مهندم ، وراه زوز شادينو ، خايفين عليه لا يطيح ، طالع متشعبط في السور متع بنية خايخة تدزها بصبع تطيح و بدا يخطب " أنا من منبري ، مباشرة من ستوديو خليل  نقلكم الي تونس بلاد فقيرة نتنتج كان في الغنية و أنا بصفتي غني بش نحي الفقر ... و الناس تبكي و هذاكة يعيط الله يرحم خليل: واحد في يدو زوز فرارش و لاخر في يدو بيدون زيت و وحدة هازة زوز باكوات كسكسي و باكو مقرونة ... متعدين زوز وليدات على موتور بداو يعيطو " تحيا الهايكا !!!!"  بداوش العباد يضربوا فيهم بالحجر . هربت نجري. دخلت للمرشي .

غلة بأنواعها و خضرة عالكيف و نرى في خوضة وسط المارشي ، ماني دايا و التنسنيس  عفانا وعفاكم الله كيف التوانسة الكل ، قدمّت ، قلت نشوف شنوة هالشوشرة . نلقى نصبتين مقابلين بعضهم حمة عاليمين و الرحوي عاليسار و كونفة في الوسط  وكل واحد يجبد فيهم لروحو . كانك من حمة يعيط "ڨفة مباركة، إسقاط الحكومة " شادد في هاك الجملتين لين وجهو حمار كدرابو تونس و مالجهة لخرى الرحوي يعيط " الشهيد وصّى وصية " .  و نحنا هكاكة و يهدّ الحاكم و بدات الناس تعيط " غاز ، كرطوش ، وينو الفنكوش ؟؟ "  فنكوش ؟؟؟ ياخي ماهو نقولوا ما يخافوش !! 

هزيت روحي و قلت لا فايدة ، خليني نروح بلاد داخلة بعضها و يقدّر الخير. و أنا راجعة لباب سويقة  ، عرضوني ناس الي هذا يغزرلي و يعيط " التبيني ، التبيني ... " و بديت نصيح سيبوني " ما نبّيش . رانا توانسة . في تونس نقولو تحبني موش تبّيني !!! " و هكاكة نرى في واحد راكب فوق تركتور لابس بالأبيض و شاشية حمراء و النساوين تزغرط ... ثبتت نلقاه التبيني و بداو يقولو : "يحيا سيدي الرئيس !! " نسأل في العباد لا واحد جاوبني يا ولد هذا رئيس شكون ؟؟؟ رئيسنا !! إنتوما شكون ؟؟ نحنا هوما ...  و قاموا الكل يغنيو نحنا الجود نحنا الكرم *** نحنا الشهامة نحنا الهمم ...

و يجي عاليمين حسن بن عثمان  في يدّو كتاب و ما تيسر من النبيذ و يعيط " أوووووه نغم لسنية مبارك زادة مرة أخرى !!!" . بديت نقرص في روحي لين لحمي زراق . فقت . اوووه كنت نحلم : "ملا حلمة ، كابوس "  . كيفاش تتكتب كابوس بالفرنسية القحة ؟؟؟ لازمني نسأل لبنى السديري !

طار عليا النوم ...

حلمتي أظمر مالواقع خاطر الواقع أظلم . حلمة و كانت . نعيشوا في مهزلة بأتمّ معنى الكلمة. إنتخابات مصيرية ولاّت كراكوز . كركر شلاكتك و ترشّح . الناس كانت عايفة السياسة توة ولاّت عايفة أرواحها. إعلان الترشحات إلي من المفروض يكون في كل مرة فرصة للنقاش الجدي حول برامج و مشاريع مجتمعية و إقتصادية ولّى فرصة بش الناس تنشر صابونها المسّخ على البلاتوات و التلافز . لا فكرة و لا قيمة و بعد ما نسفوا قيمة و المفهوم النبيل للسياسة تعدّاو للمجتمع المدني و الإعلام . يحبوا يكسّروا ثقة التوانسة في كل شيء بش وقتها ينجموا يعملوا كل شيء . تقريبا نجحوا: حولوا حلمتنا لكابوس . مبروك عليكم الخراب و تعميم الجهل و تخريب الدولة ومؤسساتها و مبروك عليكم التونسي الجديد الي صنعتوه جرة الإنتهازية و الفلوس و الكراسي . نجحتوا وين فشل بن علي : نجحتوا إنكم تقنعونا إننا نحنا "غرباء في وطننا ... وطنكم" , خاطر تونس تستاهل خير ببرشة ملّي تعيش فيه هالأيامات.