انقذوا المشهد الإعلامي

ما يخفاش عليكم إلّي احد أهمّ مقومات الديمقراطية هي حرية التعبير . و الي يقول حرية تعبير يقول بالطبيعة من بين عدة وسائل أخرى : الإعلام بمختلف أنواعه : المكتوب و السمعي و البصري و الالكتروني و دخلت معاهم في المعادلة وسائل الاتصال الاجتماعي . يبقى القطاع السمعي البصري و المادة الإعلامية الي يقدمها خاصة في بعض البلدان كيفما تونس من أهم وسائل الوصول للمعلومة و بعض المواضيع الي تخص حياتو اليومية . الإعلام هو السلطة الرابعة و الي ما يخليش السلط الثلاثة لخرين يتغولوا و نحكيو على السلط التنفيذية و التشريعية و القضائية ، فلذا ترذيلو و تبهيمو و تسقيطو لمستنقع الجهل و الشعوذة  أهم عند الي في السلطة من شريان السلاح لحماية حدود أوطانهم ولا من شراء اللقاح لحماية صحة مواطنيهم .

توة مدة و الجهود متكاثفة ولو إنو مازالنا ما ريناش نتائج مشجعة للقطع شوية مع المرتزقة و دعاة الجهل و الإرهاب في القنوات و كان هذا بعد دعوة نقابة الصحفيين لمقاطعة ائتلاف الكرامة و الحق ، رغم كل شيء غيابهم عن المشهد ماكانش حاجة خايبة و خلّى أعصاب الناس ترتاح . المقاطعة واجبة في هالنوع من الوضعيات لأنها تسمح لناس طلعوا بآليات ديمقراطية عبر وسائل ديمقراطية بضرب الديمقراطية .... بدينا ندخلوا للغريق؟ نسهلوها : البارح  ثمة حصة تلفزية ( بدات بداية مشجعة جدا) في قناة خاصة ظهرلها إستدعاء "الشيخ" الجزيري مولى حزب الرحمة و مولى إذاعة القرآن . بعد تصريحات العفّاس الي زلزلوا تونس . قعد الجاهل الجزيري و ظهرلوا بش يحكي في إذاعة البروباغندا الحزبية متاعو بش يحكي على النساء واجسادهن و فكرنا كيفاش المرا بدنها( الي شبّهوا بماكينة ) تبدأ في طنبكها في الأربعطاش سنة ( نجّم نفهموا الي هو حب يقول مازالت فرشكة و لحمتها طرتة و ماهايش خادمة برشة و زيتها نظيف ) . المرا بالنسبة لهالشرذمة هي ماكينة . ماكينة جنسية لتلبية شهوات المرضى و المعتوهين الي يعتبروا طفلة في 14 سنة تصلح زوجة . ماكينة انجاب بش يحافظوا على سلالة الجهل و البهامة .

تصريحات الجزيري داروا في فايسبوك . و لكن يبدو إن العباد بداو يفهموا في ستراتيجية هالرعاع فتجاهلوا تصريحاتو و شخصيا سمعتهم و فضلت نحقر هالاستفزاز لأنو ثمة حاجات أهم بياسر في حياتنا . لكن ظهر للزملاء في الحافلة إنهم يستدعاو الجزيري و يخليوه يعاود كلامو و يقولوا المرة هاذي موش لعشرات الآلف الي يتبعوا في صفحتو و إذاعتو . المرة هاذي ينجم يقولوا لملاين التوانسة  في مشهد يكون سريالي :

الي يصيح و بزاقاتو تتناطر و ناسي الي نحنا في فترة انتشار الوباء . الي تحب تبسط المسألة و تردها نكتة في مسرحية و بالطبيعة العياط و السبان و تشنج و وجوه مكشبرة ، يابسة ، قريب تتطرشق : هذا علاش يسهروا التوانسة فمن بعد علاش تستغربوا من وضع البلاد ؟ علاش تستغربوا من نتائج الانتخابات ؟

نفهم و نتفهّم إنو ثمة حرب على نسب المشاهدة و إنو اليوم السائد هي ثقافة " ابوز" و الي الفضايح تمشّي و تخدّم أما نتصور إنو ثمة حدود و خطوط حمر و انو قانون تجريم العنف ضد النساء والفتيات يتفعّل و يتطبّق بصرامة و مانيش نحكي على صرامة الحكومة.و من جهة أخرى لازمنا نحطوا ميثاق للاعلاميين والصحافيين التوانسة يحترموه و إذا لا يتعاقبوا و كان لزم يتم عزلهم و منعهم من ممارسة المهنة . وقتلي نستضيفوا شكون يدعي للزواج بفتيات قصّر و اعمارهم 14 سنة رانا نعملوا في دعوة للبيديفوليا و الي أغلب قوانين دول العالم ( الي تحترم حقوق الإنسان بالطبيعة ) مصنفينها جريمة وعقوبتها أشدّ من الجرائم الأخرى . وقتلي نعطيو ميكرو لشيخ كيفما الجزيري بش يعتدي بالعنف على الأطفال و النساء تحت غطاء حرية التعبير فهذا راهو بالنسبة ليا مشاركة في الجريمة .

مختلف الهياكل الموجودة في قطاع الإعلام بصراحة لازمها اليوم قبل غدوة تتلمّ و تناقش و تحكي و تلقى حلول لإنقاذ ما تبقّى لأنو هالمهازل المتكررة في القنوات الاعلامية و المحطات الاذاعية حقرّت المهنة و نقصّت بالتالي من قدرتها على التأثير الايجابي و البنّاء في هالمجتمع. من المفروض الإعلام  يسهر على احترام القوانين و الدستور لأنهم هوما أول ضامن لوجودو. المنابر الإعلامية مفروض تتسخّر لناس و لقضايا عادلة و مفروض تتعطى الكلمة للناس الي تبدع و تخلق و تنتج و تكتب و تنوّر العقول و إذا لزم إستدعاء أمثل الجزيري نحطوا عالقليلة بحذاه ضيوف عندهم ثقافة و قيمة و يكونوا قادرين على تفكيك خطابو مقارعتو بحجج و أفكار موش العياط و الترهدين. و كان نساو نذكروهم : ايامات لتالي الجزيري دعى جماعتو للتظاهر أمام مقر الهايكا  و رفعوا شعارات و طالبوا بتطبيق شرع الله فلذا نتصور مكانهم الطبيعي هو خيمة وسط قطيع من الإبل في صحراء الربع الخالي موش سهرية برايم تايم في التلفزة .