الليالي البيض دخلوا و عقاب العام زمّة

عقاب العام ولاّ راسو ديمة هالفترة صعيبة : العبد ياقف بينو و بين روحو و يبدى يقيّم فلّي صار و لّي تعدّى ولّي مالازموش يتعاود. ساعات عبد عقاب العام يقرّر يبعد ولاّ يقرب من حاجات ولاّ عباد نفعوه ولاّ ضروه . و كيف تزيد مع هذا الكلّ الامطار و السحب الرعدية و تقرير دائرة المحاسبات  و قانون المالية و الكتلة النيابية الي طاعنة في الدستورية و التحالفات السياسية و الشجرة العايلية و احتجاجات الناس المنسيّة و الاضرابات العمّالية عبد لازمو موش ياقف بينو وبين روحو : لازمو يتمدّ و يعيّط لفرويد ثمّاش ما يتجاوز حالة من القرف أصبحت وطنية.

عام 2018 ، عندنا أعوام يحضّروا فينا إنوّ بش يكون عام صعيب و لأوّل مرّة ما كذبوش علينا و قالولنا الحقيقة بريشها بحشيشها. عام بعامين ولاّ بعشرة كيف كل الأعوام الي تعداو صاروا فيه برشة حاجات : موش ياسر مزيانة ولا تفرّح يمكن أنا خاطر عندي ضرب من التفاؤل أسطوري.

شدّيت إلّي في تونس عندنا نظام أمن موازي ، حكات عليه  لجنة التحقيق في إغتيال الشهيدين بلعيد و البراهمي، حرّك الإعلام و المجتمع  المدني و حيّر التوانسة و العالم و الحكومة:  كلمة لا ، تعليق لا . القضاء مرّة يكذّب ، مرّة ينسّب. و حوّس تفهم

شدّيت إلّي في تونس كان عندنا حزب إسمو نداء تونس صوّتولو أغلبية التوانسة ، اليوم "بحّ" مفكرّنا بفازة إضغط على الزرّ يختفي النداء موش الأستاذ. و حتى الأستاذ من غير زرّ ، المرة هاذي بكلمة من قيادتو النقابية، إختفى من قاعات الدرس و الإمتحان و حسب التصعيد بين  الوزارة و النقابة ماشين لسنة  بيضاء.

شدّيت إلّي سعاد عبد الرحيم أوّل ما تمّ إنتخابها ــ معجزة قالك مرا شيخة تونس ــ و بعد ما سيّقت الشوارع، حبّت تبدّل القانون ــ بش تتمتّع بإمتيازات ــ ياخي الوزير قال لا . و غابت و رجعت مع والي تونس مصوّرين قدّام أخيب بوبالة ريتها مغروسة في شوارع مدينة في العالم.

شدّيت خطاب يوسف الشاهد في رمضان وقتلي شعب كامل يستنّى في إجراءات لمقاومة الفساد و الفاسدين، لتحسين المقدرة الشرائية ، كان موضوع الخطاب حافظ قايد السبسي و شدّيت إسم خالو زادة . شدّيت في 2018 حافظ قايد السبسي: إسم و عقلية و ممارسة سياسية هزّت تونس للهاوية و مازالت بش تهزّنا لما أتعس و تو نشوفوا إنتخابات 2019 بأنا مصيبة بش تهبط.

شدّيت في 2018 إسم مرا بألف راجل : بشرى بالحاج حميدة  و تقرير لجنة الحريات الفردية و المساواة إلّي  زعزع الشارع و حرّكو وخلّى مواضيع تمنع فيها الكلام منعا باتا تولّي موضوع نقاش فكري و إجتماعي ، خسارة موش ديمة راقي ومتحضّر أما هذيكة غلبة ناس تحكي بالعقل و الحقوق الكونية و ناس تحكي بالشريعة . اليوم بالسّيف على أعداء الحياة مطروح و عن قريب التصويت على قانون للمساواة في الإرث. شدّيت زادة الي تعدّى قانون نساء العالم لازم يضربوا عليه بالبونية بش يحميلهم حقوقهم: قانون تجريم العنف ضد النساء  والفتيات و تونس عدّاتو.

شدّيت  فيما شدّيت إنّي بعد ما كانت تونس أوّل بلد يلغي رسميًّا الرقّ ، إنّها ما تنكرّتش لتاريخها و صوّتت على قانون لتجريم الميز العنصري رغم الي هانا نراو في مسيرات و تظاهرات الجالية الاييفوارية بعد مقتل رئيسها و سمعنا حجم معاناتهم و إستغلالهم إلّي عرّاونا و فضحونا على حقيقتنا : إيه نعم نحنا شعب عنصري و كيف نسمّيو المرض نجّموا نداويوه.

أهمّ حاجة شدّيتها في 2018: شدّيت روحي بش ما نخرجش من تونس كيفما ال 600 طبيب إختصاص الي هجّوا بين 2017 و 2018 و مانلومش عليهم . شدّيت روحي إنّي ما ننساش علاش و كيفاش ناس ماتت و ناس تحرقت و ناس كبدتها تشوات بش تونس تكون بلاد مزيانة نظيفة حرّة الناس عايشة فيها بخير.

شدّيت روحي في أكثر من مرّة بش ما نقولش " يلعن بو الديمقراطية " على وزن" يلعن بو الكرة" في كلام الليل : خاطر فلقونا بإختصار الديمقراطية في التعددية الحزبية و الانتخابات و حرية التعبير، الّي قريب تولّي حرية تبهبير و قتلّي الديمقراطية هي ثقافة و قيم . ديمقراطية الأغلبية الي ما تحميش الأقليات هي دكتاتورية : مازال مابيننا و بين المساواة الفعلية و الحقيقية و التامة دنيا.

و توّة بعيدا عن السياسة و الأخبار مانيش بش نشدّ روحي بش نقلّكم ، كليمتين :

كلّ عام و تونس حيّة بخير: حرّة ، مستقلّة ، نساها ورجالها آمنين. كلّ عام  الحبّ، قبل القهر، مالينا و أحبابنا زاهية دايرة بينا. كلّ عام أحلامنا منوّرة و الجهل و القمع ،رغم كلّ المحاولات، مفوّرة.  تحيا تونس بينا ، بضحكنا و غنانا و شطيحنا و طرب ليالينا. تحيا تونس بينا الكلّ  .كان الظّلام خاطينا ....