alexametrics
آراء

ما بعد الكورونا ...

مدّة القراءة : 3 دقيقة
ما بعد الكورونا ...

 

و يتواصل مسلسل الكورونا و الحجر الصحي . تسارعت الأحداث بسرعة إنتشار الفيروس و تقلبت الوضعية بإرتفاع عدد الموتى هنا و هناك في برشة بلدان في العالم و خاصة إيطاليا وين وصلوا سجلوا 450 حالة وفاة في 24 ساعة فقط . الوضع في إيطاليا يوجع القلب . آخر الصور كميونات الجيش في Bergamo بالعشرات واقفين قدام على ما يبدو أحد المستشفيات بش يهزوا الجثث و يدفنوها في مدن أخرى . كارثة بشرية بأتم معنى الكلمة و ما يخفاش عليكم إنو الطلاين ما خذاوش مالأول الأمور بالجدية اللازمة و هذا الي وصلهم للوضعية الكارثية . في نفس الوقت توصلنا فيديوات و تصاور لشعب يحاول كسر حاجز حجر الخوف و الرعب بالغناء و الفن من براكن ديارهم ... مواطنين اختاروا  يقربوا من بعضهم رغم المسافات و العزل . و تصاور أخرى تأكدلنا انو الطبيعة أكثر من إستفاد من هالحجر الصحي الكوني : حيوانات و حوت يرجعوا لبلايص حرمهم منهم البشر.

الأغرب هو فيديوات من باريس ، فيها مواطنين مستغربين و باهتين في صوت العصافر : إيه نعم ، ثمة ناس عمرها ما سمعت عصفور في مدينتها.

الأكيد إنو ثمة قبل و بعد الكورونا : على الأقل في علاقة البشر بمحيطو و بالطبيعة .

 

ا السيستام الحالي و طريقة العيش الحالية الي خلات الناس تعتبر دورة في المغازات التجارية و تعبية الشاريو هي محواسة و تفرهيدة للصغار لازم تاقف.  حصران الوالدين 8 سوايع في بيرو قتلي ثمة حلول بش يخدموا من ديارهم حتى في فترة عطل صغارهم تنجم تكون وسيلة بش العايلات تعيش مع بعضها و تعرف بعضها .

 

من المفروض إنو مدة الحجر الصحي تكون فرصة بش نتخلصوا مالسموم الي بثتها فينا  حياتنا اليومية بالنسق متاعها: فرصه بش نعملوا الي قال عليه ماكرون " !Revenez à l'essentiel, lisez  "  ، فرصة بش نسمعوا الناس الي نعيشوا معاهم الي في ساير الأيام ساعات ماعدا صباح الخير و تصبح الخير ما نزيدوهمش كلمة و يمكن فرصة بش نعملوا حاجة ماعاد يعمل فيها حتى حد : مانعملوا شيء.

 

إيه و علاش لا ؟؟؟ نقوموا و نقرروا إننا اليوم مانا بش نعملوا شيء ! نستغلوا شوية شميسة كان توجدت ، نستغلوا النسمة و نقعدوا ما نخمموا في شيء لا في القروضات، لا في الكراء ، لا في الشهرية، لا في قراية الأولاد و غيرو... شطر العباد اليوم تاعبين مالتخمام و موش حتى كان يجي في كل الحلات يفيد و لا ينفع .

 

و لكن الأهم إنو نستغلوا الفرصة هاذي موش بش نكمشوا على أرواحنا و نسكروا أكثر : لازم تكون فرصة بش نخمموا في غيرنا و في كيفاش نجموا كأفراد ولا كمجتمعات نخلقوا سبل جديدة للتضامن الدولي كيفما حكى في آخر حوار ليه الفيلسوف الفرنسي  Edgar Morin في  Nouvelobs.

و من الواضح زادة إنو في مثل هالأزمات ،  تولي عقلية " نفسي ، نفسي و لايرحم من مات" قمة الغباء على خاطر حياتك و صحتك مرهونين بصحة و حياة الآخر فلذا لازمك تخمم فيه قد ولا أكثر ما تخمم في روحك : تمرين صعيب على ناس توة سنين ستانست ترى العالم و تتعامل معاه إنطلاقا من ذواتها المريضة . الا بالطبيعة العباد الي هوما أقرب للوحوش كيفما مثلا الي توافدوا على البلاد من خارج و ما احترموش الحجر الصحي الي تفرض عليهم .

 في كل الحلات و يمكن نحنا التوانسة كشعب نفسيا من أكثر الشعوب الي تنجم تتحمل الكورونا. بطبيعتنا تسعة سنين من مصيبة و عندنا خبرة أمور  حظر جولان و الدليل إنو مالثمانية متع الليل التوانسة  يركشوا في فايسبوك و ينطلقوا على بركة الله في التنبير و البلادة : طريقة التونسي ديمة بش يخرج مالهم و الغم هو الضحك و التفدليك. و عطات نرمين صفر الي تفرجوا فيها التوانسة أكثر من قيس سعيد شارة الإنطلاقة و لو إنو سبقها للأمانة دالي التريكي وقتلي نظم سهرية بالقانون متاعو هو الي عودنا ديمة  يختار أماكن و أوقات مخالفة للعادة كيفما عزفو في ترينو ولا في طيارة. برشة فنانين توانسة خذاو الفكرة و الليلة بش يقدموا عروض فنية عالإنترنت : حليم اليوسفي و رشدي بلڨاسمي و متأكدة إنو برشة بش يتبعوهم و هذا الي حكيت عليه فيما يتعلق بالتضامن في أشكال جديدة .

 

اليوم وصلنا ل 39 حالة ، ما نحبش نطيح في الخوف و الرهبة الزايدين لكن إذا بعض الأرقام الي تقالت تطلع صحيحة : نحنا ماشين لكارثة كبيرة و موجعة للشعب التونسي و ممكن ياسر تمسنا الكل بطريقة مباشرة و لا غير مباشرة. إذا منعنا من كارثة صحية الأكيد إنو بش تقابلنا أزمة إقتصادية ماعشناهاش قبل.  المهمّ إننا نحترموا كل شروط الوقاية و ما نلعبوش بصحة الناس كان عندنا شك إننا مرضى و ... تونس تحيا.

 

تعليقك

(x) المدخلات المطلوبة

شروط الإستعمال

Les commentaires sont envoyés par les lecteurs de Business News et ne reflètent pas l'opinion de la rédaction. La publication des commentaires se fait 7j/7 entre 8h et 22h. Les commentaires postés après 22h sont publiés le lendemain.

Aucun commentaire jugé contraire aux lois tunisiennes ou contraire aux règles de modération de Business News ne sera publié.

Business News se réserve le droit de retirer tout commentaire après publication, sans aviser le rédacteur dudit commentaire

Commentaires

Commenter

تقرؤون أيضا

03 جانفي 2022 16:04
0
30 ديسمبر 2021 16:29
0
27 ديسمبر 2021 17:00
0