مرحلة الانتقام اللاديمقراطي

قداش عندي نقلكم راهو كل يوم نقوموا على غريبة و قداش عندي نقول وصلت الزنقة بالهارب و قداش عندي نقول بلغنا القاع و مازنا نحفروا . في الواقع حبيت نقلك إلي أنا غلطت و نطلب منكم  السماح الي ستانستو تقراولي في هالموعد الأسبوعي . لم و لن نبلغ القاع نحنا في ثقب أسود : جبدنا الفساد الي عندنا توة سنوات نحكيو عليه و اليوم تغلغل لكل مفاصل الدولة و ولّى الحاكم الأول في البلاد .

في أقل من أسبوع ثمة جملة من الأخبار تورّي للتوانسة و للناس الي مازال عندها شك إنو تونس تعدات نهائيا  و بصفة رسمية من مرحلة الانتقال الديمقراطي إلى مرحلة الانتقام اللاديمقراطي .

أولا و قبل كل شيء تصدمنا نحنا التوانسة الي نستناو في التلقيح لعايلاتنا و للناس الكبار بتسريب مفاده إنو الحكومة التونسية و المديرين العامين و ما يقارب 60000 موظف دولة خذاو التلقيح خلسة . يعني رينا المشيشي في تصاور يلقح أما ما أعلنتش الحكومة في باين رسمي على بقية التلاقيح . في بقية الدول كيف الحكومات لقحت الشعوب ما إستنكرتش و نحنا بيدنا كنا نجموا ما نستنكروش لو إنو حكومة الفشل إختارت الشفافية و كانت في إتصال دائم مع شعبها و فسرتلو و خاصة لو كان بذلت أقصى مجهودها بش توفرلو التلاقيح و المراكز اللازمة و الكافية . أما هو لا يزي كانوا من آخر الدول الي طلبت التلقيح و كيف جات كمات محدودة خلات الوضع الصحي يوصل للكارثة الي نعيشوا فيها اعتبروا أرواحهم هوما الأولى  . و الحق كيف نشوفوا إنو رئيس الحكومة لقّح روحو بش من بعد مشى للقيروان الاحتفال بغزوة بدر نتفكر المثل التونسي الشعبي الي يقول " ياخسارة قمحي و شعيري في باردين الركايب". بلاد  مفلسة و شعب جاع ياكل مالزبلة  و في الغرنوق  و المشيشي يحتفل بغزوة بدر . و ما وقناش هوني النائبة عن حركة النهضة  أروى بن عباس و الي هي في نفس الوقت عضو في اللجنة البرلمانية المكلفة بالاصلاح الإداري والحوكمة الرشيدة ومكافحة الفساد. و مصورة في حملتها مع شعار " العدل أساس العمران" و   بكل وقاحة و صحة رقعة قالك هي متعدية من قدام مركز التلقيح في منوبة دخلت سألت قالولها مرحبا ثمة بلاصة تفضل لقح !! يعني و إن لم تستح فأحكي ما شئت . و تمت إقالة  المديرة الجهوية للصحة بمنوبة الدكتورة نبيلة قدور، خاطر مكنت جملة من الأشخاص من الانتفاع بالتلقيح من غير ماتوصللهم إرساليات قصيرة، إلي هو شرط أساسي للتلقيح و زيد نظموا وقفة إحتجاجية موش ضد المديرة الجهوية لا مساندة لها . يعني اليوم ماعادش نحكيو على محاربة الفساد أما نجموا نقدموا التجربة التونسية كمثال ناجح و باهر في دعم و مساندة الفساد .

 قول قايل مع الهم الي نعيشوا فيه . يكفي . خبر كيفما هكة متعلق بالسمسرة و المحسوبية  في علاقة بالتلقيح على حساب حياة المواطنين يكفينا شهر بش نفهموا خطورة الوضعية و بش القضاء التونسي يتحرك و يطيروا جملة و تفصيلا الي شاركوا و الي غطاو و الي يبرروا . بعدة  رفيق عبد السلام بو شلاكة قالك ميسالش نتعداو . عادي ! و من بعد يحبوا المواطنين ينضبطوا و يحترموا و يمتثلوا للقانون .

زيدو مازال يتنفس ! نقوموا  بعد هالكارثة على فضيحة أخرى و كيف العادة من بؤرة الفساد . ثمة نائب المكي الزغدودي  ضرب  ضيعة تبلغ مساحتها 415 هكتار بوادي زيتون من ولاية باجة بعد مشاركته في طلب عروض  في أوت 2020.  يعني فضيحة الفخفاخ الي بيها أسقطوا حكومة في جائحة صحية هزت العالم و في وضع اقتصادي دقيق تعاودت و الأغرب لا سمعنا صوت و لا سمعنا تنديد : الكلها راكشة وخانسة خاطر الكلها تعكعك . بالطبيعة النائب ما صرحش بمكاسبو و طفّى الضوّ و خرّج بيان بكل وقاحة قالك " في حال وجود أي موانع قانونية" . الموانع القانونية تو يتم دراستها من أهل الإختصاص و الموانع الأخلاقية شكون بش يحكي عليها . حتى حدّ ! علاش ؟ على خاطر الكلها تعكعك و الكلها مساعدها وضع الفوضى . طاحوا ينهبوا بوه على خوه الي ينجم يضرب ضربة ما يبخلش و الشعب ياكل مالزبلة وياكل في الغرنوق .  تو نتابعوا هالموضوع و نشوفوا شنوة بش يصير أما أنا نعرف الي ماهو بش يصير شيء ! صارتش حاجة للنائب الي معطل سكة الترينو بش يهز الفسفاط في كماينو ؟ شيء ! شصار لكل نائب / نائبة في هالعشرية الدحسة تشد في دوسي فساد ! شيء و بل بالعكس ولاو المخبرين عن الفساد هوما الي يتحاسبوا قبل و يتعرضوا لجميع أنواع التضييقات .

زيدو مازال يتنفس هالشعب . نرقدوا و نقوموا على فضيحة أخرى . المرة هاذي بالصيودة : مخلوف و الخياري الي يدوروا و يعكلوا يلقطوا في تسريبات بش يوكلوا بيها القطيع الي يتبع فيهم و يوريه الي هوما ماسكين بزمام الأمور و الي هوما يحكموا . عادة قمنا على فيديو لعميل إسرائيلي هو هكة يقدّم روحو بما تيسر من اللغة الحية و يثبتلنا كيفاش الصيودة الأحرار طلعوا يتعاملوا مع المخابرات الإسرائيلية . يظهرلي موش لازم نحللّ أولا الحق مانيش مختصة في دومان التخابر و ثانيا لأنو الشيء من مأتاه لا يستغرب .  الخوانجية و باراشوكاتهم أثبتوا تاريخيا و أينما حلّوا إنهم عندهم قدرة رهيبة على التخابر و المساس بأمن دولهم : مستعدين يحرقوا البلاد و يبيعوها بش يقعدوا في السلطة و الحكم . المشكلة إني شخصيا عندي قناعة راسخة إنو بش تكون فضيحة أخرى و ماهو بش يصير شيء مادام بوه الحنين مازال شادد المجلس و حاميهم. 

في نفس الوقت : مستشفى صفاقس بدون أوكسيجين و كيف العادة أنقذتنا الشقيقة الجزائر ولينا كالطالب الركيك نهار كامل نساسيو من دولة لدولة و ياكريم متع الله . و الأطباء داعين لإضراب عام نظرا للوضعية التعيسة . التعليم ماشين لسنة بيضاء و الصغار السنة تقريبا ما خلطوش حتى لشطر البرنامج . صندوق النقد الدولي قالهم من  غير ما تجيو أبعثولي خنشوف برنامجكم و بعد نحكيو .  بش يقرروا رفع الدعم بعد رمضان قرارات مؤلمة قال المشيشي : كلو يهون على تونس أما موش على المرتزقة الي يحكموا فيها و خربوها . الاتحاد العام التونسي للشغل على ما يبدو هزّ يديه . و الشعب ياكل مالزبلة و ياكل في الغرنوق. متأكدة الجمعة الجاية بش تقعد نفس الوضعية برئيس جمهورية  غير موجود و رئيس حكومة يعمل في شوية سياحة داخلية و سلطة تشريعية كالمنشار طالعة تاكل هابطة تاكل . ما نعرفش شكون بش يزفر خاطر خلت أما حبيت نقلو زايد : الوضع توة بش يهز تونس لأتعس السيناريوات و يبدو إنو ماعاد يفيد فيها شيء .