كل عام رغم الوجيعة و التعب تونس واقفة و شامخة

 2020 كانت  سنة ، الحق، مليئة بال "بش" : بش نعملوا ! بش نحققوا ! بش نغيروا ! بش نتفاوضوا ! بش نسعاو! بش نطبقوا القانون ! و في خضم هالتبشبيش نساو الي يحكموا بش يقولولنا، الي هوما بش يقتلونا عرق بعد عرق على سوء التصرف و غياب الحوكمة الرشيدة و محاولات تخريب و تفكيك الدولة و الاستهتار بمصايب الشعب التونسي .

في الساعات الأخيرة من آخر نهار في كل عام ، عادة ، الناس ، تاقف و تتأمّل شنوة صار و تقيّم روحها و تاخذ جملة من القرارات الصارمة و بالطبيعة ما يخفاش عليكم كتوانسة انو الصرامة ما تمشيش معانا برشة .

2020 ، عشرة سنين بعد الثورة . لحظة مهمة خلات التوانسة يغزروا بحنين لماضي كان يظهر أكثر أمان و يمكن هذا مرهون فقط بغياب المعلومة و عدم قدرتنا إننا نوصلولها . طحنا في "قبل خير" و ياحسرة على زمان بوعنبة ، و الحال إنو رغم كل المصائب ثمة حاجات ايجابية و باهية تنجم تصير . صعيب…  لأنو الضرب قوى علينا كتوانسة و خاصة بعد مصيبة الكورونا . فقدنا في 2020 برشة مواطنين و مواطنات في حوادث غبية ، غبية بحجم غباء الي يحكموا و الي حولوا حلمة مزيانة الى كابوس .

2020 كان سنة غريبة عدينا منها اشهرة الكلنا حبس بالنفاذ العاجل و لقينا رواحنا في حجر صحي كل واحد فينا عاود مشكى وصنع روحو و نفض تراكنو و اكتشف فيه بلايص ما يعرفهمش . عرفنا الي لحظات الخوف و اليأس هوما أكثر اللحظات الي عبد يحب فيهم الناس الي دايرة بيه و يعرف قيمتهم في حياتو . و شفنا توانسة بالآلاف تبرعوا و عطاو من فلوسهم و جهدهم و وقتهم بش يعاونوا بلادهم و يعانوا خاصة جيشنا الأبيض العظيم الي رغم قلة الإمكانيات و يمكن حتى غيابها التام في بعض المناطق ، رغم غياب الكفاءة عند المسؤولين واصلوا مهمتهم على حساب حياتهم و صحتهم و هذا يظهرلي في حدّ ذاتو ينجم يخلينا نكونوا ايجابيين حتى فقط للساعات الي مازالو يفصلونا على 2021.

2020 كانت سنة مليئة بالعياط و الزياط و العنف في مشهد سياسي يعيش في سقوط حرّ قد يتسبب في سقوط الي يلمنا الكل و الشقف الي هاززنا : تونس . شهدنا السنة بالذات تطور كبير و خطير لخطاب العنف و التكفير و سمعنا نواب شعب يمجدوا في أفكار ما ينجموا كان يعصفوا بالدولة و بكل وقاحة تحت حماية و غطاء سياسي للنهضة . و لكن زادنا رينا فرق صغير، على أمل ما يكونش نزعة و تتعدى ، إنو ثمة نوع من التوافق إنو اليوم ثمة في تونس و يعيش فيها من خانها و الي مستحيل الناس هاذم يكونوا قادرين على إنهم يقدموا بالبلاد و لا حتى يوصلوها لبر الأمان .

2020 صاروا فيه برشة حاجات . كان عام صعيب . و رينا شوارع  في أكبر المدن السياحية في العالم خالية  ترمي فيهم المساك تسمع حسوا . رينا مستشفيات تطلع في أيامات و مرضى و قبورات بالآلاف . سمعنا البكاء و رينا برشة دموع : ناس تودع في ناسها و هي ماهياش فاهمة شنوة قاعدة يصير . رينا عالم  منذ أشهر بلا حفلات موسيقية تلم مئات الآلاف من المحبين . رينا ستادات كرة في العادة يعطلوا شوية سير الكرة الأرضية فارغين و حتى الكورة ما ريناهاش . رينا مسارح مسكرة و في بعض البلدان ، للتعبير عن غضبهم أصحابها خرجوا كراسي قاعاتهم و حرقوهم . رينا متاحف فيها ابداعات و ابتكارات و معجزات الإنسان لأول مرة تتفرج في بعضها . رينا عباد بلاش وجوه . مخبية وراء ماسك . للحماية . ناس تتقابل و ماعادش تترمى في أحضان بعضها . للحماية . عباد يحبوا بعضهم و لا عاد يبوسوا لا عاد يعنقوا للحماية . رينا الخوف في عينينا و في عين الي كبرونا و نحبوهم و الي يبدو إنو فيروس كورونا قرر انو يرزينا فيهم .

2020 ماكانش أحلى وأزهى عام . أما كيف الي قبلوا و الي بعدوا ، كان فرصة بش نكبروا و نتعلموا . بش نعرفوا الي الناس معادن . بش نحاولو نبدلوا  الخايب فينا . بش نحاولوا نثمنوا الباهي فينا كأفراد . عام زمّة قعد في الواد كان حجرو و خسرنا فيه و ربحنا فيه عباد .

2020 خبالنا مصايب و خبالنا كان نبربشوا فينا حاجات مزيانة و تفرح بش نقعدوا نتفكروهم . هاو أنا بيدي وليت كيف حكوماتنا "نبشبش" . فبحيث : ما نعرفوش شنوة يستنى فينا . و ما نعرفوش كان غدوة خير و لا أخيب . أما الي نعرفوه أكثر من في أي عام آخر : إنو الحرية نعمة و إنو حتى شيء ماهو حق مضمون . إذا تعبنا لازمنا نتعبوا أكثر بش البشرية و في سلّم أصغر نحنا نقعدوا أحرار متحررين شوكة في حلق الجاهلين . كل عام و انتوما بخير و كل عام و انتوما لاباس و كل عام رغم الوجيعة و التعب ، تونس واقفة و شامخة .