alexametrics
آراء

قيس سعيد: الأتعس بعد المرزوقي ؟؟

مدّة القراءة : 2 دقيقة
قيس سعيد: الأتعس بعد المرزوقي ؟؟

 

عام 2020 حسب ما قاعدين نراو بش يكون عام حافل و كلّو أجواء فهتملا. و نحنا مازلنا 01 و 02 جانفي نعيشوا تحت مسلسل حكومة الحبيب الجملي و نقراو في أسامي الكفاءات  المستقلة إلي دبرهالنا  و تلحم في ليبيا :

أردوغان قالك بعث جنود و بدى يمضّي في سنيه بش ينهب ليبيا كيفما نهب سوريا في السابق و مازال . و نحنا هكاكة تكمّل تشعل بين أمريكا و إيران : ردا على مقتل سليماني تضرب شوية صوارخ على قاعدة أمريكية في العراق. 

حرب عالمية 4 كيفما قالو في الجزيرة تعداو للحرب العالمية الرابعة خاطر الحرب العالمية الثالثة  قاعدة تدور توة في تونس بين 3 رئاسات لا وحدة فيهم خير من أختها و بين الاحزاب و النهضة الي تحبهم يحكموا معاها بالسّيف.

 

الحقيقة متع ربي عبد ما عادش عندو كلام ينجم يوصف الحالة الي وصلتلها هالديمقراطية التونسية و هالشهد السياسي . كل أنواع الصفات إستعملناها و التوصيف زادة ، شنوة قعدلنا ؟؟؟ ما عدلنا كان نتفرجوا مزبهلين في الكوراث اليومية الي تتعدى قدام عينينا  و نحنا نسألوا في القوى الخارقة بأنواعها إنها ترحمنا . أما كيف سمعت البارح كلمة سيد رئيس الجمهورية مالڨصرين ، تأكدت إنّو مستحيل بش نترحموا. رئيس الجمهورية التونسية ، عندو حرب بجنبو و ، عندو حكومة ما تشكلتش إلي هي مرهون بيها إقتصاد البلاد ، عندو ألف كارثة و هو لتوة ماشي يشخّص في الأوضاع . إي يشخّص في الأوضاع " بالليل لأننا ننتظر بزوغ فجر جديد يحقق ارادة الشباب".

 

عظمة على عظمة ! فنّ و إبداع و أحاسيس و مشاعر جياشة ! عجبتكم بزوغ الفجر؟ شدوا عندكم:  "ينتظرونا كما كتبوا على أحد الجدران ، إن الدستور الحقيقي هو الذي خطّه الشباب على الجدران ". و بالطبيعة لأنو كيفما قلت كل الكلام و الأوصاف وفاو ، التوانسة مرة أخرى طاحوا ينكّتوا و يضحكوا ، إيه كثر الغلب يضحّك : جبدوا تصاور الحيوط في تونس الي أكثرهم مكتوب عليها نفس الجملة " الله لا ترحم الي يحط الزبلة هوني " و يظهرلي  الجملة هذيكة فعلا تنجم تكون أول فصل في دستور بلاد و شعب قرروا  نهارة أحد إنهم يلعبوا ببلادهم و يمدوها بين يدين ناس تنجم تهزها للهاوية.

 

عجبوكم الزوز درر متع سيادة الرئيس ؟ في جواب على سؤال شنوة بش تقدم للجهات كيفما الڨصرين ؟ قيس سعيد قالك المهمش هو الذي يعرف ماذا يريد و لازم نبدلوا الدستور بش الي يعرف ماذا يريد يعمل منوال تنمية يقضي عالفقر و التهميش !!! و الي خلقني هذا الي قالو، تقريبا مازدت و ما نقصت شيء .  و حسب كلام سيادتو "لم تكن حملة إنتخابيّة بالمعنى الكلاسيكي للكلمة وإنّما حملة تفسيريّة قادها الشباب" نجّموا  نعرفوا نحنا الي ما فسرتلناش و إلي ما قابلتناش شنوة مالة حكيت معاه كالشباب الي قعدت معاه في القهاوي؟ كان من المفروض إحتراما للعقل ما نوصلوش للذكاء خاطر نحنا في هالبلاد بعاد كل البعد عليه ! إنو كرئيس جمهورية رغم صلاحياتك المحدودة تعطي للتوانسة إجابات و إقتراحات . الناس تصوت لحكومات و لرؤساء موش للتشخيص ، أما بش يلقاولنا حلول و يقترحوا سيادتك منوال تنمية و يقدموا قوانين و لا إجراءات تنجم تحسن الإستثمار و التنمية , لكن ما أبعدنا على هذا. و من المفروض إنو سي سعيد إلي هو رئيس الشباب و عندو جماهيرية شعبية لا مثيل لها يحاول يلم كل القوى الفاعلة في حوار وطني عاجل و مستعجل حول الإقتصاد الكارثي للبلاد ، لكن ما أبعدنا.

إذا نوافق قيس سعيد في حاجة قالها هو النظام السياسي و الإنتخابي و الدستور التونسي الي لازمهم يتبدلوا خاطر ساهموا في تشليك الدولة و نتائج آخر إنتخابات و الفايزين فيها بطم طميمهم هو أكبر دليل على هذا .

 

الأكيد إنّو حكومة الجملي صعيب تتعدّى غدوة قدام مجلس نواب الشعب و ماشين بخطى ثابتة لسيناريو حكومة الرئيس و إذا تعدات حكومتو : بش يكون قيس سعيد رسميا في الواجهة قدام الشعب الي صوتلو و بش يتحمل مسؤولية حملتو التفسيرية و بش يظطر اخيرا يكشفلنا على مشروعو السياسي و الإقتصادي ، خاطر بصراحة نجموا نقولوا انو لتوة فترة حكمو تعتبر الأتعس بعد المرزوقي .

 

 

 

تعليقك

(x) المدخلات المطلوبة

شروط الإستعمال

Les commentaires sont envoyés par les lecteurs de Business News et ne reflètent pas l'opinion de la rédaction. La publication des commentaires se fait 7j/7 entre 8h et 22h. Les commentaires postés après 22h sont publiés le lendemain.

Aucun commentaire jugé contraire aux lois tunisiennes ou contraire aux règles de modération de Business News ne sera publié.

Business News se réserve le droit de retirer tout commentaire après publication, sans aviser le rédacteur dudit commentaire

Commentaires

Commenter

تقرؤون أيضا

03 جانفي 2022 16:04
0
30 ديسمبر 2021 16:29
0
27 ديسمبر 2021 17:00
0