موسي:ظاهرة صوتية ولاّ أكثر ؟

و أنا بديت نكتب في الكرونيك ثمة غناية تدور في راسي ولا جملة منها لحليم اليوسفي " شكون ڨال يجي نهار ، تتغير الأحوال ...." و نحبو عبير موسي جهار بهار.

إنطلاق أشغال مجلس نواب الشعب الجديد و كل الجلسات العامة تقريبا كان فيها نوع من الأبطال ديمة يقعد الرأي العام و الشعب التونسي يبارتاجي في فيديواتهم و تدخلاتهم . ثمة شكون يشدنا خاطرو ما يعرفش يقرأ و يشدّ ورقة في يدو و يبدى يهجّي سنة أولى فراشات و ثمة شكون يشدنا خاطرو يضحّك و ثمة شكون يشدنا خاطرو قبيح و لسانو طويل و ثمة زادة شكون يشدنا خاطر تدخلاتو فيها معرفة ولا دراية بالموضوع و تكون مداخلتو فيها حجج عقلانية قوية و أرقام .

بالنسبة للمجلس الحالي و بدون منازع و كيفما بديت "شكون قال يجي نهار" عبير موسي رئيسة الحزب الدسوري الحرّ كسبت شعبية و قاعدة تكسب في شعبية كل يوم أكثر.

عركتها مع جميلة الكسيسكسي و إعتصامها في المجلس بش ترد إعتبار نوابها و إعتبار التوانسة إلي صوتولها كانت فرصة بش الناس تكتشف ثبات عبير موسي على مبدأها في مواجهة الخوانجية و لكن موش هذا بركة . وقت التصويت على حكومة الجملي مداخلة عبير موسي كانت أكثر مداخلة شدتلي إنتباهي و خلاتني  بعيد على العياط و الزياط و التهريج نتسائل : عبير موسي ظاهرة صوتية ولا أكثر ؟؟؟

إلى حدّ وقت قريب ، كنت شخصيا نعتبر إنو عبير موسي من إفرازات الثورة كيفها كيف برشة سبقوها : تجمعية و مستعرفة و تعتبر إنو بن علي رجل دولة وطني : كلام  مستحيل تصورنا بعد 14 جانفي 2011 إنو ينجم يتقال و لا نجموا نسمعوه . لكن عبير موسي عكس برشة قلابة فيستة إلي دخلوا لبيوت الطاعة بش يرجعوا نظاف تقولوا و تحارب بش جزء من التاريخ متع تونس منذ 1920 تاريخ تأسيس حزب الدساترة موش أظلم و موش لهاك الدرجة تعيس كيفما عياو يصورولنا فيه سياسيي الغلبة ، الي تعلموا الحجامة في روس اليتامى !

و آخر حلقة هي مطالبة عبير موسي بمسائلة الغنوشي و العريضة الي يدور فيها حزبها لسحب الثقة من راشد الغنوشي كرئيس برلمان . مداخلة تفرجوا فيها ميات الآلاف مالتوانسة و أغلبهم كانوا متفقين إنو كلامها يفرهد عالقلب. سنوات و نحنا من إغتيال شكري بلعيد و نحنا التوانسة ولا جزء كبير منّا مقهورين لأنو جل الطبقة السياسية تفرشت زربية للنهضة و قبلوا بيها في اللعبة السياسية و الديمقراطية و قتلي في الواقع النهضة ما عمرها ما قبلت حتى حد معاها و الدليل مناوراتها و ممارساتها في علاقة بحكومة الجملي ، من موجة الإغتيالات و الناس يستناو في نهار الي النهضة تخلّص و تتحاسب و إذا اليوم القضاء ما يسمحش علقليلة تتقال الحقيقة و نقولوا للمجرم أجرمت . كيف رئيس البرلمان التونسي ، يحضر في مجلس الامن القومي و دوب ما حكومتو تطيح يمشي لتركيا و يقابل أردوغان ما تنجم تكون كان شبهة خيانة عظمى و خاصة إنو الزيارة كانت مغلقة و لتوة لا نعرفوا أعلم و لا شاور رئاسة الجمهورية  .

مرة أخرى عبير موسي تفضح النهضة و تفضح حتى الأحزاب إلي تسبها كان في التلافز و في الواقع يتعاملوا معاها بكل أريحية . راشد الغنوشي قضى على تونس و عمل جهدو هو و جماعتو في هالتسعة سنين بش تونس تكون ولاية إسلامية تابعة الأمة هذا بالطبيعة كيف كان ماشي في بالو تونس وكالة و نسى إلي تونس برجالها و نساها. و مازال مواصل و يرحمو الي قال ذيل الكلب حطوه مياة سنة في القصبة كيف خرج ، خرج معوّج ! و الغنوشي مهما حسب روحو ديمقراطي في الأصل الأصيل هو إخواني إنتماءو لعصابة الإخوان قبل تونس ... و اليوم أكثر من قبل ، مهم إنو في المجلس تخرج أصوات تقول الحقيقة هكاكة بدون تزييف و تزويق كيفما عبير موسي. عبير موسي  قاعدة كل يوم و نهار بعد نهار تربح في تعاطف الناس معاها و خاصة النساء إلي يراو فيها رغم كل الإنتقادات مرا قوية شقت طريقها في ساحة سياسية قلّ و ندر تلقي فيها نساء يوصلوا لمناصب قيادية. عبير موسي هي أكثر من ظاهرة صوتية و هي صوت العركة الجاية و الي لا مفرّ منها مع حركة الإخوان فرع تونس .