alexametrics
آراء

لا أمل بدون قضاء مستقل

مدّة القراءة : 3 دقيقة
لا أمل بدون قضاء مستقل

 

برشة ملي خرجوا في 25 جويلية 2021 ما صوتوش لقيس سعيد و لا كانوا حتى متطلعين على برنامجو ولا عندهم بالضرورة ثقة فيه أكثر من غيرو . ففترة حكمو قبل 25 جويلية تميزت بشعار اللسان الحارك . الرئيس ما إقترحش مشاريع قوانين ثورية و كان أكد في أكثر من مرة إنو موش بالتقدمية و الديمقراطية المطلوبين بالنسبة على الأقل لجزء كبير من الشعب التونسي و نحكي مثلا على مسألة المساواة بين الجنسين و نحكي على المساواة في الميراث و نحكي حتى على إلغاء بعض القوانين السالبة للحرية و الجائرة و الي تمثل إعتداء صارخ على حقوق الإنسان كيفما الفصل 230 . بعد القرارات التاريخية افي 25 جويلية و الشجاعة الي تحلى بها في مواجة جحافل الجهلوت و الفاسدين و المفسدين ، كبرت ثقة الناس فيه و لكن و الأهمّ كبرث ثقة الناس في مستقبل أفضل و الأمل في تصحيح مسار استولى عليه المال الفاسد و المال الأجنبي و رأت فيه فرصة إنو 25 جويلية هو فرصة لإعادة البناء و إننا نتوحدوا فعليا حول جملة من القضايا الأساسية و على رأسها : القضاء التونسي .

 

الكلنا نعرفوا مليح كيفاش بن علي ضرب المعارضة التونسية و حرية التعبير و حق التنظم : بخلاف بطبيعة العصا و القمع كان  يستعمل في السلطة القضائية : معارض ماعجبنيش لفقلو قضية و تهمة و يتعدى قدام قضاتي ( لأنهم كانوا ملكية و في تبعية تامة للسلطة التنفيذية)  و يتحكم و هوكة القضاء خدم خدمتو . و النهضة هي التلميذ النجيب لبن علي في هذا : فهموا الدرس و قراو و حللوا مقومات الدكتاتورية و تحولوا من ضحايا الى جلادين و الحق شخصيا أنا نعتبر إنهم عمرهم ماكانوا ضحايا و الي يستعمل السلاح و العنف ضد المواطنين و الدولة عادي الدولة تمارس حقها الشرعي في ممارسة العنف حفاظا على الصالح العام . من المفروض ، لكن هيهات : نحنا كالشهيلي إخترنا ديمة نطيبوا لغيرنا  و كل ما توفرتلنا فرصة بش نقلبوا الأوضاع موش لصالحنا و إنما لصالح الشعب الي مطلبو واضح من 17 ديسمبر 2010 " شغل ، حرية، كرامة وطنية " .

 

العشرة السنين الي فاتوا : كنا كلنا متفقين تقريبا إنو القضاء تمّ تطويعو و تركيعو من قبل النهضة و خاصة كيفما شهدوا برشة قضاة من قبل البحيري و لعل الي صار مع بشير العكرمي و الطيب راشد أحسن دليل و قضية القاضية الي تعدي في أموال خيالية بالعملة الصعبة ؛ فعلاش اليوم درنا على بعضنا و نعتبروا إنو الي يقول فيه رئيس الجمهورية و الي يأكدوا في برشة قضاة من باب التدخل في السلطة القضائية و مسّ من استقلاليته ؟ هل إنو مستعدين نخسروا هالفرصة التاريخية لتحقيق مكسب تاريخي ؟ يبدو إنو الإجابة هي نعم بما إنو المتمعشين من المنظومة السابقة . و الي هوما بيدهم يطالبوا بتغيير المنظومة السياسية و يحبوا على إنتخابات مبكرة و يحبوا على ديمقراطية ايه إذا القضاء موش مستقل وإذا اليوم دخول كولوارات المحاكم عبارة دخلت في متاهة شوف تلقى محامي نزيه و متمكن و كفء بش يخرجك منها كيفاش تحبوا نعملوا ديمقراطية ؟ و كيفاش تحبوا نحصنوا الحقوق و الحريات ؟ و كيفاش تحبوا ترجعوا الإستثمار و تشجعوا الناس إنها تجي لتونس ؟ 

 

و في المشهد الي كنا فيه و مع التقريطة الي قرطوها المجمدين و من معهم للدستور و للقوانين شنوة الحل للخروج من الأزمة ؟ شنوة الحل اليوم بش نفعلوا مجلس أعلى للقضاء مستقل فعليا و يسهر على استقلالية القطاع دون السقوط في القطاعية المقيتة الي هزت تونس للهاوية ؟ على ما يبدو و كيف نرى تضارب المواقف داخل القضاة بيدهم نقول لازمنا يد إلهية لأنو حلول الأرض إنتهت .

 

و الوضع أصبح لا يطاق  خاطر في غياب محاكم مجهزة لإستقبال المواطنين و قادرة على تسهيل عملية التقاضي إن كان ذلك ماديا و لا زمنيا و في ظل إنعدام الثقة  و التشكيك في نزاهة واستقلالية القضاء  شنوة صار ؟ المواطنين ولاّو قضاة و المحاكمات ولاّت شعبية موش في الشوارع يمكن لأنّو زمن الشوارع ولّي و إنتهى و إنما شعبية على وسائل الاتصال الإجتماعي . فالمحامين ولاو يعملوا في مرافعاتهم في ستاتوات الفايسبوك ! وثائق و دوسيات مفروتة على فايسبوك ! محاولات للحشد و التجييش و استعطاف على الفايسبوك ! بيانات و عرائض مساندة وقتلي القضايا في طور التحقيق ! تليفونات تصور في الأروقة و نتصور قريبا في قاعة الجلسات : هذا الكل ما يكفيش بش يبين إنو بعد عشرة سنين خربنا أهم ركيزة للدولة المدنية و الديمقراطية ؟ هذا الكل ما يكفيش بش نبيّنوا إنو تمّ إنهاك القضاة و القضاء و إستباحة علوية القانون واستقلالية قرار القضاة بعيدا عن كل أشكال الضغط ؟

يبدو إنو هذا الكل مايكفيش ؟ شنوة لازم ؟ لازم إننا نواصلوا في سياسة القدح و التشكيك و التخوين فمعارضي قيس سعيد  ما يختلفوش معاه ابدا في الممارسة متأثرين بالمثل الشعبي : ما أخيبك يا صنعتي كيف نراك عند غيري لين نقضيو على صبر المواطنين و أملهم الأخير و كيفما نبهنا في السابق نعاودوها ميسالش : شعب بلا أمل  هو شعب كلو إستعداد للوحشية في أقصى و أقسى أشكالها .

 A bon entendeur salut ! 

 

تعليقك

(x) المدخلات المطلوبة

شروط الإستعمال

Les commentaires sont envoyés par les lecteurs de Business News et ne reflètent pas l'opinion de la rédaction. La publication des commentaires se fait 7j/7 entre 8h et 22h. Les commentaires postés après 22h sont publiés le lendemain.

Aucun commentaire jugé contraire aux lois tunisiennes ou contraire aux règles de modération de Business News ne sera publié.

Business News se réserve le droit de retirer tout commentaire après publication, sans aviser le rédacteur dudit commentaire

Commentaires

Commenter

تقرؤون أيضا

03 جانفي 2022 16:04
0
30 ديسمبر 2021 16:29
0
27 ديسمبر 2021 17:00
0