alexametrics
آراء

الخمارات للشعب ... و الوطن للجميع

مدّة القراءة : 2 دقيقة
الخمارات للشعب ... و الوطن للجميع

 

يبدو إنّو قيس سعيد في ظل الأزمة الي باقية و تتمدّد، إختار إنو يكبّر في حجم الأعداء . من الواضح إنو بعد 25 جويلية، إختار سياسة اللاحوار و التقشف و لا نقولو غياب المعلومة : و برشة توانسة ،كانوا نوعا ما بعد الجوجمة الي عشناها في مجلس نواب الشعب ، فرحانين لها القرار . عدينا شهر أوت بهدوء نسبي من غير لا عياط و لا زياط و لا تهم و لا سبان منتشين بقرار تجميد المجلس و كنا الحق ننتظروا إنو بش تتسارع الأمور و بش نتعداو ديراكت للمحاسبة و القضاء بش يخدم خدمتو و تصورنا وقتها إنو بعد 6 شهر يمكن يكون الجوّ يسمح بإنتخابات . لكن هذا الكل ماصارش  و تصريحات رئيس الجمهورية قيس سعيد الي كانت في الأول مطمئنة و خلات  تقريب 90 % مالتوانسة يتفائلوا خير اليوم أولا ينقصوا و نتصور مازالوا بش يزيدوا ينقصوا لو إنو قيس سعيد مازال ملح إلحاحا على إتهام التوانسة بوه على خوه و لو إنو زادة ما قرّرش يدروس مليح كلماتو و خطاباتو .

 

ما كنتش من الناس الي تشنجوا برشة كيف سمعت رئيس الجمهورية يقسم في التوانسة بين : نظاف و فاسدين . هذا واقع و نحنا الكل نعرفوه و كمواطنين في حياتنا اليومية مع الي نشوفوا فيه من تفشي مظاهر ثراء فاحش مقابل فقر مدقع نفهموه . حكى رئيس الجمهورية زادة على الفقر إلي بالطبيعة يعكس قرائتو السياسية للأحداث بين 17 ديسمبر و 14 جانفي و إعتبر من موقعو انو 14 جانفي هو تاريخ الإستيلاء على الثورة و الحال إنو 14 جانفي شراكوا فيه آلاف التونسيين و التونسيات و كان يوم الاجهاز على نظام بن علي و مهما كانت تحاليلو نتصور إنو الاتفاق الي صار بالحفاظ على التواريخ الزوز حاجة باهية . ما علينا ماناش بش ناقفوا في هذا هو أصلا التواسنة كان تسأكهم تو 90 % منهم يطلعوا لا يعترفوا بهذا أو بذاك .

 

أخيرا في اجتماع المجلس الأعلى للجيوش. ، كيف العادة ، رئيس الجمهورية ينفعل و يتشنج و يخرج من صينتو و يحكي على من " يحوكون و يدبرون في المطاعم و الخمارات " . مرة أخرى رئيس الجهورية يضيع فرصة من ذهب إنّو يسجل أهداف تحصن المسار التصحيحي ل 25 جويلية . و بعيدا عن الانفعالات و عن فوضى الحواس، لازم نقولو إنو لو كان الجملة هاذي قالها قيادي خوانجي راهي البلاد قامت و ما قعدت . من الواضح إنو رئيس الجمهورية يحكي  بالأساس على الطبقة السياسية  لكن مواقع اجتماعاتهم ما يعنيش ، الأهم هو شنوة فحوى كلامهم و قدرة الرئيس على دحض افكارهم و التوضيح بالأرقام و الأفعال كان الي يقولوا فيه غالط . عوض هذا بالتشنج و الانفعالية ، يخليهم يزيدوا يسجلوا أهداف .

 

تواصل التشنج في خطاب رئيس بشعبية قيس سعيد ، هو بيدو الي متصدر في نوايات التصويت للرئاسية القادمة  ، تواصل الاتهامات دون المرور الفعلي و الجدي لمحاسبة من أفلسوا الدولة و نكلوا بكل مؤسساتها و غياب خطة واضحة لإنقاذ الاقتصاد هو الي يخلي أي خطاب يدخل فيما نسميه السفاسف الفارغة : حكاية الفساد و المفسدين و الغرف المظلمة و الخمارات حكاية كانت مفهومة  حد ل 28 جويلية ، أما توة حاجتنا بأرقام و بإصلاحات كبرى في الإقتصاد و إقحام الجيش في مثل هذه الخطابات ينجم يعطي صورة معاكسة لما يريد أن يروجه رئيس الجمهورية خاصة فيما يتعلق بالديمقراطية و الحريات . 

فيا سيادة رئيس الدولة خلي الخمارات و المطاعم على أرواحهم ماهمش أماكن لا يغتصب فيها الأطفال و لا تحاك فيها خطط الانقلابات ولا غيرو ... هي أماكن بمن وبما فيها مساهمة مساهمة كبيرة في الاقتصاد التونسي و مساهمة حتى في الحفاظ على السلامة النفسية لعدد  كبير من المواطنين و كيفما قام أبو نواس : "دع المساجد للــعباد تسكنها ** وطف بنا حول خمار ليسقينا

ما قال ربك ويل للذين سكروا ** ولكن قال ويل للمـصلينا " .

 

 

تعليقك

(x) المدخلات المطلوبة

شروط الإستعمال

Les commentaires sont envoyés par les lecteurs de Business News et ne reflètent pas l'opinion de la rédaction. La publication des commentaires se fait 7j/7 entre 8h et 22h. Les commentaires postés après 22h sont publiés le lendemain.

Aucun commentaire jugé contraire aux lois tunisiennes ou contraire aux règles de modération de Business News ne sera publié.

Business News se réserve le droit de retirer tout commentaire après publication, sans aviser le rédacteur dudit commentaire

Commentaires

Commenter

تقرؤون أيضا

03 جانفي 2022 16:04
0
30 ديسمبر 2021 16:29
0
27 ديسمبر 2021 17:00
0